Хятадын Ханжоу  хотод IV дэх удаагийн Азийн пара спортын наадмын тэмцээн, уралдаанууд өнөөдрөөс буюу энэ сарын 19-ний өдрөөс Ханжоу хотод эхэлж байна. Энэ удаагийн наадамд нийтдээ 43 орны дөрвөн мянга гаруй тамирчин хурд, хүч, авхаалж самбаагаа сорино.

        Монгол Улсаас спортын 14 төрөлд 68 тамирчин өрсөлдөх болно. Тухайлбал, жүдо, таэквондо, шатар, туялзуур сэлэм, хөнгөн атлетик, ширээний теннис, усанд сэлэлт, бочи, го даам, буудлага, байт харваа, пауэрлифтинг, волейбол, бадминтон зэрэг спортоос монголчууд медаль хүлээнэ.

        Энэ наадмын Монголын баг тамирчдын хамгийн олон удаа оролцсон нь Э.Содномпилжээ болж байна. Тэрбээр дөрөв дэх удаагаа Азийн наадамд оролцож байгаа юм. Манай багийн хамгийн ахмад нь суугаа волейболын тамирчин Ч.Наранцэцэг 65 настай, хамгийн залуу нь усанд сэлэлтийн тамирчин Х.Намуун юм. Пара спортын наадмын нээлтийн ёслолын ажиллагаа ирэх ням гарагт  болох бөгөөд өнөөдөр тэргэнцэртэй сагсан бөмбөгийн тоглолтууд эхэлж байна.