Түүнийг “Аавтайгаа адилхнаас гадна аав шигээ мундаг жүжигчин болох нь дээ” гэсэн хүмүүсийн бодол “Татар” киног үзээд улам ч батлагдах байх аа. Тэрц харц, нүүрний хувирал, дуу хоолойны өнгө, дүрийнхээ араншинг гаргаж байгаа байдал гээд тэр чигтээ киног амь оруулж, үзэхэд урамтай, бүр нэг сэтгэл баясгасан эсрэг дүр байв.

         Эсрэг дүр сэтгэл баясгана гэж байх уу гэж магадгүй хэн нэгэн бодож байж болох юм. Гэхдээ энэ бол тухайн дүрийг бүтээсэн уран бүтээлчийн ур чадварын тухайд тодотгож буй юм. Үнэхээр нэг тийм хор шар нь буцалсан халаасны хулгайчдын толгойлогч, хулгианы дүрд тэр тун сайн ажиллаж гэдгийг үзэгчийн хувьд онцолмоор байна.

    “Татар” киноны Кубанагийн дүрийг бүтээсэн МУГЖ Д.Бямбацогтын хүү Балжиннямыг үзэгчид  “Тагнуулч аав”, “Дурлах санал”, “Хамгийн сайхан нь-2”, “Ахан дүүс” зэрэг киноны дүрээр нь андахгүй мэдэх билээ. Тэрбээр СУИС-ийг 2015 онд Гавьяат жүжигчин агсан Л.Дэмидбаатарын удирдлагад төгссөн байдаг. Багаасаа аавыгаа дагаж, кино натурт өссөн хүүгийн зүрх сэтгэл урлагт татагдаж, энэ салбарын хүн болох хүсэл мөрөөдөл тээсэн нь мэдээж.

Энэ сонголтоо ч түүнд дуулгахад Д.Бямбацогт жүжигчин эхэндээ хүүгийнхээ жүжигчин болох шийдвэрийг нь эсэргүүцэж байсан  ч шалгалтыг нь өгөөд, тэнцчихсэн хүүгээ эцсийн дүндээ дэмжиж, өдгөө ч түүнд урам дэм, том түшиг тулгуур нь болсоор байгаа юм билээ.

        Хип хоп хөгжимд дурлаж, өөрсдийн гэсэн хит дуунуудтай хамтлаг болох хүсэл мөрөөдөлтэй хөвгүүдийн хүчтэй өрсөлдөгч байж, тэднийг хурцалсан хүн бол яах аргагүй Кубана. Тэр хэдий гаднаа хэнд ч ялагдахыг хүсдэггүй ч дотроо бол өр зөөлөн, бусдыг хайрлаж чаддаг нэгэн байсан нь киноны төгсгөл хэсэгт илэрдэг. Гэхдээ бусдад ялагдаж болохгүй гэсэн бодол нь өөрийгөө аварч гарах аргагүй болтол нь хол явуулсан байдаг нь даанч харамсалтай. Түүний энэ дүр, утга санаа, өгүүлэмж нь өөр ч яагаад ч юм аавынх нь “Ноён солиот” киноны Паанагын дүрийг санагдуулж байв. Б.Батдэлгэр найруулагч энэхүү киноны Кубанагийн дүрээр авьяас билиг дүүрэн том жүжигчний залгамж халааг ямархан нөөц бололцоотой уран бүтээлч болон өсөн торниж буйг харуулж чаджээ.

Түүнээс гадна энэ дүрээр киноны гол утга санааг өртөөлөн гаргасан нь тун сонирхолтой, ойлгомжтой байв.

     Үнэхээр л бусдын хайрыг хүндэлж байж л хүн хайрлуулна, түүнээс бусдыг хайрлахгүй мөртлөө зөвхөн өөрийгөө хайрлуулах гээд байвал эцэстээ амьдрал ямархан буланд биднийг шахан оруулж, эндээс явахаас өөр гарах гарцгүй болгож байгааг түүний дүрээр тодорхой илэрхийлсэн. Мөн бусдын хийснийг хулгайлж амьдарч байгаа хүн яавч амжилтанд хүрэхгүй гэдгийг ч дуугарсан. Магадгүй өдгөө түүний бүтээсэн Кубанаг үзсэн өөр нэгэн найруулагч түүнд ямар дүр оноовол болохыг ч харж байгаа болов уу. Жүжигчин Б.Балжинням “Тагнуулч аав” кинонд аавтайгаа тоглосон талаараа “Аавыгаа хэрхэн тоглож буйг харж, суралцахыг хичээсэн. Аав анхаарлаа маш сайн төвлөрүүлж, ухан бодон дүрдээ ордог юм. Хажууд нь жүжиглэхдээ их сандарсан” гэж ярьсан байдаг. Ингэж тэр аавыгаа дэргэдээс нь харж, түүний бүтээсэн дүрүүдээс суралцаж байдаг байна. Тиймдээ ч дүрээ үзэгчдийн сэтгэлд очтол сайхан бүтээж чадаж байгаа биз ээ. Ямартай ч Кубанагийн дүрийг нь үзээд аав нь гарцаагүй баярлана гэдэгт итгэлтэй байна.

Домогт “Татар”-ыг ирлэсэн тэр нэгэн этгээдийн дүрийг бидэнд ойртуулж, түүн шиг нөхдийг дэлгэцнээ харин ч нэг дархалж чадлаа. Үүнээс өмнө үзэгчид санаж буй бол "Ахан дүүс" кинон дээр өөдгүй, өөрчлөгддөггүй, бүтэлгүй хүргэний дүрд тоглосон. Ер эсрэг дүрийн рингин дээр тэр хүчтэй өрсөлдөгчдийн нэг болон түрж байна.