Хүслээ хэлнэ. Гурван сэтгэл, нэг хүсэл. Эндээс л “Киви” хамтлагийн дуунуудыг сонсож эхэлнэ.

“Яагаад би ганцаардаад

 Яагаад би санаашраад 

 Яагаад би итгээ вэ

 Гурван сэтгэл, нэг хүсэл...” гэх тэдний хүслийг ахлах ангийн сурагч байхаасаа сонсох дуртай болсон. Тэд гуниглангуй атлаа аргадаж хайрлангуй уран бүтээлийн ертөнцдөө сонсогчоо урин дуудаж, энхрий зөөлөн, ялдам охидын чин сэтгэлийг дуулдаг мэт. Гэхдээ хэнийг ч буруутгаж, хэнд ч гомдоогүй ирмэг.

Чамайг хайрласан зүрхээрээ

Чамд гомдож чадсангүй

Чам руу инээдэг харцанд

Нулимс удаан тогтсонгүй... “Намрын бороонд би гомдсон”. Хайр ийм хиргүй тунгалаг, эвдэж, хагаламгүй нандин зүйл гэдгийг энэ дууг сонсох бүрд мэдэрдэг. Гэхдээ цаана нь шаналан халуурал мэдээж давхар сонсогддог. Гэвч үргэлж ихэмсэг, бардам.

Араас чинь тэврэлгүй явуулсанд уучлаарай хайрт минь

Аз жаргалыг зөвхөн чамдаа хязгааргүй хүссэн учраас

Нулимсаа би чамаас нуугаад, нүүрэндээ бардам инээмсэглэж

Араас чинь тэврэлгүй явууллаа

Аз жаргалыг заавал олоорой. “Араас чинь тэврэлгүй явууллаа”. Энд тэдний гуниг үргэлжилж буй ч хүч орж, учрыг ойлгож, хайртай хүнээ тавьж явуулах нь ч бас хайр гэдгийг мэдэрч, хэцүү байсан ч гэгээн сайхныг хүсээд, аз жаргалынх нь эрэлд гаргаж байгаа юм.

Халуухан харагдаж байна уу

Харамсаж хараад хэрэггүй

Хаяад явсан тэр хүн чинь

Биш гэж үү... “Харамсаж хараад хэрэггүй”. Одоо харин өндийн босож, угаас өөрсдөд нь зохидог ихэмсэг оршихуйдаа эргэн орно. Яг л гуниглан суугаа жаахан охин баяр хөөртэй болох шиг тийм мэдрэмж. Ер бусын тайвшрал, эрх чөлөө, танхи гоог дотор оршоож, охид, бүсгүйчүүдийн тамир тэнхээг тэтгэх мэт.

         Үүнээс цааш харин халуухан, галзуу доргио, тэсрэн дэггүйтсэн дуунууд нь үргэлжилж, сонсох тусам сэм гуниглахаас гадна хязгааргүй эрх чөлөө, сэтгэл уудлалт, хүч зоригийг олж, итгэл нэмэгдэнэ. Тэдний дуунуудыг ерөөс нэг хүн гэж үзвэл гэнэн жаахан охин анхны дурлалтайгаа учирч, анхны гэсэн бүхнийг мэдэрч, уйтгар гуниг, ганцаардалтай өдрүүдийг ч туулж, хамгаас чухал нь хайр гэдгийг ухааран өндийж, биеэ даасан хүчирхэг эмэгтэй болж байгаа мэт мэдрэмж төрнө. Энэ бол “Киви”. Өөр өнгө, өөр хүсэл, өөр ертөнц, ондоо имиж.

Тэд будрах цас, шиврээ бороо, үдэш тэнгэрээр аялах сар мэт. Тэд халуу шатам дүрэлзэх гал, хуйрнан шуугих шуурга, аяга халуун кофе мэт. Үргэлж эмзэг турьхан, энхрий зөөлөн, ялдам гоо, яруу тансаг.

     “Киви” хамтлагийн тухай ийн бичих болсон нь 20 жилийн ойн тоглолтоо хийхээр товоо дуулгасантай нь холбоотой. Тэд энэ оны арваннэгдүгээр сарын 30, арванхоёрдугаар сарын 1-нд 20 жилийн дурсамжаар үзэгчдийг аялуулж, өдгөө ютүүбээс л нэхэн сонсдог дуунуудаа тайзнаас хүргэх нь. Хэдийгээр тэд ердөө хоёр жилийн өмнө л тоглосон ч үзэгчид үргэлж л тэднийг тайзнаас санан үгүйлж, тоглолтыг нь хүлээдэг. Тэдний зүгээс фэнүүдээ хэрхэн өсөж том болсныг хараад, тэд энэ хугацаанд үргэлж дэмжсэн хэвээр буйг мэдрээд хамгийн их сэтгэл нь хөдөлсөн тухай ярьсан байдаг. Үнэхээр ч би л гэхэд ахлах ангиасаа сонсож эхэлсэн гэхээр лав арван жил өнгөрсөн байна. "Өмнө нь огт сонсоогүй хэрэг үү" гэж уншигч та гайхах байх. Мэдээж сонсолгүй яах вэ. Гэхдээ идэвхтэйгээр, бүр фэн нь болж эхэлсэн цаг хугацаагаа онцлоод буй нь энэ юм. Ямар ч үед тэдний дуу хуур надад хань болж, мөрөөдөл хүслийг минь улам хөглөн нэмдэг билээ.

            Анх тэд 2004 оны арванхоёрдугаар сарын 1-нд хамтлагаа байгуулсан гэдэг. Үргэлж шинийг эрж, хайж, өөрсдийн тогтоосон өнгө аясаа алдахгүй явсаар хэдийнэ 20 жилийн ард гарчээ тэд. Магадгүй энэ хугацаанд хамтлагийн гишүүдийн хувьд олон өөрчлөлт гарсан ч тэдний бүтээсэн дуу уран бүтээлүүд үргэлж л халуунаараа тэсрээж, хамаг бүхнээс ангид аваачиж, нэг тийм эрч хүчээр цэнэглэдэг гэдгийг дахин өгүүлмээр байна.

Тоглолтын хоёр үдэш хэдийнэ хит болсон хайрын дуунууддаа тэд үзэгчдийн зүрх сэтгэлийг уяж, сэргээн тэтгэх гал цогтой дуунуудаараа урам зориг тэтгэнэ гэдэгт итгэж байна. Энэ жилийн арванхоёрдугаар сар “Киви” хамтлагийн гал халуун тоглолтоор эхлэх нь.