Тэр эдгээр өдрүүдэд “Клеопатра” жүжгийн Ромын жанжин, Юлый Цезарын зэр зэвсгийн анд Руфийн дүрд тоглож буй юм. Дэлгэцийн дүрээрээ үзэгчидтэй илүү дотно тэрбээр харин тайзандаа илүү хайртай гэмээр. Энэ мэдээж үзэгчийн өнцгөөс миний олж харсан зүйл л дээ. Түүнээс тэр өөрөө тусгайлан ангилаагүй юм. Гол учир нь театр гэдэг авьяас билиг, хөдөлмөр зүтгэлтэй хэнийг ч алгаа дэлгэн тосож, өөртөө соронз мэт татан донтуулдаг гэдэг. Тэгэхээр бичихээр сонгож буй энэ уран бүтээлч гарцаагүй театрт дурлан татагдсан л байж таараа болов уу. Тэр бол Дорноговь аймгийн “Саран хөхөө” театрын захирал, жүжигчин Э.Идэрболд.

           Уншигч танд нүдээрээ инээсэн, хөгжилтэй нэгний дүр тодорч байгаа байх. Дүрүүд нь ихэвчлэн тийм сэргэлэн, зальхай, хөдөлгөөнтэй нэгэн байх бөгөөд цаад мөн чанар нь эвдрээгүй, хүнлэг сэтгэл нь алга болоогүй байдаг.

Үүнийг ганцхан жишээ гэхэд “Амьдрал чиний төлөө” киноны Сүххуяг. Найзуудаасаа хамгийн авхаалжтай, манлайлагч, удирдагч нь. Алдаж, онож, урвасан гээд аль муу нэрийг “зүүж”, кинонд нууцлаг эрхмээр гардаг ч нөхөрлөлд үнэнч, мөн чанар нь бүдгэрээгүй дүр. “Хайр эргэсэн хавар” олон ангит киноны Анкагийн нөхрийн дүр байна. Мөн л хайр дурлалдаа үнэнч, амьдралын төлөө мөнчигрөөрөө зүтгэх залуу. Энэ бол бидний дунд ч байдаг дүрүүд. “Нээрээ л яг ийм байдаг даа” гэж үзэгчид өөрсдөдөө ойртуулан үзэж, даган инээж, уйлж, уярах нь ч бий. Тийм дүрийг бүтээгчдийн нэг бол тэр. 

“Эхнэрийн эзгүйд”, “Сөрж болдоггүй тавилан”, “Босуул”, “Цэн тогоруу”, “Босго тотго”  зэрэг олон бүтээлд тоглосон.

           Э.Идэрболд багаасаа л дуулах, бүжиглэх дуртай хүүхэд байжээ. Гэхдээ урлагийн хүн болно гэж бодож байгаагүй мөртлөө жүжигчин мэргэжлийг сонгох тухайгаа нэг өдөр бодоод л шийдсэн гэдэг. Одоо харин тэр зөв сонголт хийж гэж талархдаг гэсэн. Түүнээс зөв зүйтэй шийдвэр нь сургуулиа төгсөж ирээд, нутагтаа ажиллах гэрээтэйгээр аймгийн Засаг даргаараа сургалтын төлбөрөө даалгаж байсан гэдэг. Үнэхээр ч үзэгчдийн хувьд ч тэр энэ мэргэжлийг сонгоогүй байсан бол  олон сайхан дүр бидний сэтгэлд буугаагүй л байна байх.

Хамгийн гол нь эзэмшсэн мэргэжилдээ чин сэтгэлээсээ дурлаж, түүгээрээ жигүүрлэн амьдарна гэдэг л өөрөө энэ урлагт зүтгэх гол үр дүн байдаг биз ээ.

 Тиймдээ ч орон нутгийн театртаа ажиллахын хажуугаар “Монгол театр”-ыг уран бүтээлч нөхдийн хамт үүсгэн байгуулалцаж, анхны бүтээлээрээ Египетийн хатан Клеопатраг сонгон тавьж байгаа болов уу. Тэдний хамт олон жүжгээ хэдийнэ нээсэн бөгөөд түүний хувьд Юлы Цезарын зэвсгийн анд Руфийн дүрээр үзэгчидтэйгээ уулзаж байгаа. Театраа байгуулсан талаараа тэрбээр “Монгол театр”-ыг найруулагч А.Чингүн, жүжигчин Н.Баярмаа нартайгаа хамт байгуулсан. Энэ бол бидний хүсэл мөрөөдөл. Өөрсдийн гэсэн театртай болж, бүтээлээ тавихыг хүсдэг байсан. Мөрөөдлөө биелүүлж байгаад баяртай байна” гэсэн юм. Тайзны бүтээлээс нь онцолж өгүүлбэл, хамгийн анх СУИС-ийн гуравдугаар курст байхдаа М.Ю.Лермонтовын “Багт наадам” жүжгийн Звёздич вангийн дүрд тоглож байжээ.

Тэгээд бүр зүүн бүсийн сонгодог жүжгийн уралдаанаас энэ дүрээрээ шагнал хүртэж байсан байна. Сургуулиа төгсөөд мэдээж олон уран бүтээлд тоглосон байдгаас түүнийг өлгийдөн авч, мөн л театрт хүчтэй суурийг нь голлон тавьсан “Black box” театрыг онцлохгүй өнгөрөх аргагүй.

                 Тэгээд “Саран хөхөө”, Улсын драмын эрдмийн театр гээд ажилласан байдаг. 2015 онд Улсын драмын эрдмийн театрын туслах найруулагч, жүжигчнээр орж ажилласан байдаг бөгөөд их зохиолч Д.Нацагдоржийн амьдрал, уран бүтээлээр бүтсэн “Жаргаагүй нар” жүжгийн туслах найруулагч, Д.Нацагдоржийн дублёр дүрд тоглосон нь хамгийн онцлог уран бүтээл нь. Театраас сурсан, мэдсэн зүйл нь өдгөө “Саран хөхөө” театрыг удирдан явах үндэс болж байгаа болов уу. Уран бүтээлч хүн дүр аваад тухайн дүрээ хэрхэн гаргахыг л зорьж ажилладаг бол харин театрын даргын хувьд тайзнаа ямар жүжиг тавихаас эхлээд бодох зүйл бишгүй их нь мэдээж. Тиймдээ ч тэр тайзнаа ямар бүтээл дэлгэж, үзэгчдэд юу үзүүлэхийг бодож төлөвлөхөөс гадна шинэ театрынхаа ажилд ханцуй шамлан орж, эхний бүтээлээ догдлол дүүрэн нээчихээд, тайзнаа түүхэн жүжгийн анд нөхрийн дүрийг бүтээж байна.

“Тархи, оюун бодлоо зогстол урлагийн төлөө зүтгэнэ” гэж чин үнэнчээр зорьж яваа түүнд амжилт хүсье.