ШУБИРАТАЙ ЯРИЛЦСАН БОРООТОЙ ҮДЭШ "ШӨНӨ ДУНДЫН БҮЖИГ" БОЛЖ БАЙСАН...

Д. Бямбасүрэн:
Соёл урлаг

2023-06-09, 3348

Дэндүү бардам, гал цогтой бүжигчин эмэгтэй Шубира гаднаас нь харахад ямар ч зовлон, дутуу зүйл үгүй мэт ч дотроо ганцаардсан, амьдралдаа хайр халамжаар дутаж яваа нэгэн. Гэхдээ тайзан дээрээ асан дүрэлзэж, хэний ч харааг булааж, сэтгэл зүрхийг ховстон татна. Түүний энэ эрхэмсэг төрхийн цаана уйтгар гуниг, ганцаардал, шаналал нуугдан байх бөгөөд жүжгийн турш нэг нэгээрээ илрэн гарч ирж байгаа нь харин ч сайн хэрэг, үзэгчийн хувьд үүнд л баярлаж суулаа.

Нэр алдар нь мандаж, өнгө гоо нь түглээ ч бороонд уйлан алхахад нь цуваа нөмөргөж, энгэртээ тэврэн зогсох хэн нэгэн л түүнд хамгаас хэрэгтэй. Угаас амьдралд хүн хүндээ нөмөр түшиг, хань бараа, ойр хажууд нь байх шиг дулаан дотно мэдрэмж үгүй. Тэр дундаа эмэгтэй хүн хайраар услагдаж ургаж байж улам гоо цэцэглэдэг.

-ТЭР БОЛ ШУБИРА-

-ДУДРААГИЙН ХҮЛЭЭЛТ, АНКАГИЙН АДГАЛТ, АМИГОГИЙН ӨШӨӨРХӨЛ-

Сорогдогийн Жаргалсайханы зохиол "Шөнө дундын бүжиг" жүжгийн гурав дахь хувилбар буюу М.Батболд найруулагчийн өнцөг, шийдэл, түүний л харсан дүрийг үзлээ. Орчин цагийн театрын үзэгчдэд ойрд үзээгүй орчин, өөр өнгө хоршил, мэдрэмж. "Фауст", "Гэм зэм", "Опал" гээд тавихад нь түүнийг өөрчлөлтийн салхийг авчирсан найруулагч гэж онцолж байсан минь энэ удаад ч талаар болсонгүй. Үнэхээр өнөөдөр бид ийм л "Шөнө дундын бүжиг" үзэх ёстой. Магад тайз, үзэгчид хоёр талдаа хуваагдаад, өнөө л хэвшмэл хэв маягаараа үзсэн бол жүжгийн "амт", "үнэр" амтагдаж, үнэртэхгүй, үзэгчдэд илүү ойр мэдрэгдэхгүй байсан байх. Үүнийг сайн бодож, голыг нь оносон орчин ахуй байлаа.

Дарс амтлангаа Шубира, Хавх хоёрын халуун мэт боловч учигтаа хоосон хөндий хүйтэн харилцааг, хаанаас ч юм хайрын илч төөнүүлэн гарч ирсэн Дудраагийн гудамж тосон түүнийг хүлээх хүлээлт, Анкагийн адгалт, Амигогийн өшөөрхлийг мэдрэхгүй л бол бүрэн гүйцэт мэдэрч, тэднийг сонсож, ойлгож чадахгүй мэт. Үзэгчдийн суудлаас үзээд суухад энэ.

Одоо харин эхлэлээ үргэлжлүүлж, жүжиг рүү гээ орьё. Дөнгөж сая гадна зогсохдоо аль дүрийнх нь дотогш нэвтэрч, хэн рүү өнгийхөө бодлоо. Мэдээж Шубира. Түүний дотоод сэтгэл, чин хүсэл, шаналал, өгүүлэх гээд чадахгүй бүхнийг илүү нээлттэйгээр сонсох нэг л арга бий нь ярилцах. Түүнийг ярилцлагынхаа зочноор урьж ярилцья, ерөөсөө л тэгье.

Тэр үзэгдэлдээ гарах гээд бэлтгэлийнхээ өрөөнд тун завгүй тольдож зогсоно. Эл өрөөнд хэн дуртай нь ордоггүй гэсэн ч би зүрх гарган дотогш орлоо. Шар дэрвэгэр хормойтой даашинзтай шаливхан биетэй тун ихэмсэг эмэгтэй "Хүүе, чи хэн бэ, энд орж ирж болохгүй" гэнэ. Тэр намайг Дудрааг хөөсөн шиг ширүүн дориун хөөсөнгүй. Тэгэхээр нь жаахан сандарсхийгээд "Би сэтгүүлч байгаа юм аа, таниас ярилцлага авах гэсэн юм" гэхэд, хачин чанга инээснээ "Надаас ярилцлага авах ий, сэтгүүлч чи андуурч, би тийм ярилцлага өгөөд байхаар хүн биш, гарч үз, би ажлаа хиймээр байна" гэж өнөө л ихэмсэг мөртлөө ялдам хоолойгоороо хэлнэ. Гэсэн ч би энэ өдөртөө өрөөнөөс нь гарч яваад Дудраа шиг харьж явах замд нь биш гэхэд өнөө л бэлтгэлийн өрөөнийх нь үүдэнд өдөр бүр очиж гуйсаар, түүний бодлыг өөрчиллөө. Уншигч, үзэгч та магад "Шөнийн цэнгээний зүгээр л бүжигчин эмэгтэй юу ярих юм бэ, утгагүй юм" гэж магадгүй юм. Тэгвэл ярина, ярина. Тэр шөнө дундын бүжиг болоод өөрийнхөө хүсэл мөрөөдөл, ганцаардлын тухай ярина. Ингээд бидний ярилцлагад уншигч та тавтай морил.

-ҮЗЭГЧДИЙН СУУДЛААС ШУБИРАТАЙ ЯРИЛЦСАН МИНЬ-

-Шууд л асууя, "Та Хавхад хайртай юу"

-Хайргүй ч түүнээс би явахгүй, тэр надад хайртайг би мэдэж байна.

-Тэгвэл та Дудраад хайртай байх нь?

-Эргэж хараад дуугаа хураана. Мөрөө хавчих нь ичингүйрч байна уу гэлтэй.

-Амиго харин таныг хотын төвд илүү том клубт бүжиглэх санал тавьсан шүү дээ, таны нэрээр клубээ нэрлэнэ гэсэн?

-Хэдий тийм ч би Хавхаас, мөн энэ тайзнаасаа явахгүй ээ.

-Анка таны сайн дүү юу?

-Мэдэхгүй ээ, гэхдээ тэр надтай төстэй. Тэр хэн нэгнээс хайр хүсэж, түүнийхээ л төлөө бүхнийг хийдэг нэгэн.

Бидний яриа өндөрлөхөд шөнө дунд болж байсан. Хаанаас ч юм Хавхын хоолой гарч, "Яасан бэ, Шубира алив үзэгдэлдээ бэлдээд гараарай. Энэ маш чухал үдэш шүү" гэнэ. Тэгээд би түүний өрөөнөөс гарсан. Замдаа Дудраатай таарсан. Тэр өнөө саарал цуваа өмсчихсөн зогсох бөгөөд энэ удаад шүхэр барьжээ. Амиго харин энэ мөчид хэдийнэ цэнгээний газрын суудалд хорон санаагаа найруулан, бүгдийг төлөвлөн суусан. Бидний дээр үүл хуралдсан шөнийн тэнгэр бүхнийг чагнан байх бөгөөд үүр хаяарахад л яг бороо шаагих нь...

-АМИГО ХАВХЫГ ОГТ ӨӨРЧЛӨГДӨӨГҮЙ ГЭЖ ХЭЛДЭГ Ч ШУБИРА ХАВХЫГ ХЭДИЙНЭ ӨӨРЧИЛСӨН-

Бичвэртээ Хавх Шубирад хайртай гэдгийг хэлэлгүй үлдээж болохгүй. Шубира хайрлагдаагүй биш, харин ч хэн хүнээс илүү хайрлагдсан эмэгтэй. Тийм л болохоор тэр Хавхаас явдаггүй. Хавх хурц тод гэрэлд тийм ч дуртай биш, тэр харанхуйд дуртай. Хүмүүс ч угтаа тийм л байдгийг тайзнаа хэлсэн. Харин түүний амьдардаг харанхуй тэр нүхэнд гэрэлтэгч, гийгүүлэгч нь Шубира. Тиймээс гэрлээ бөхөөхийг хүсээгүй. Харин өөрийг нь гэрэлтүүлэгч тэр жижигхэн алмааз эрдэнэ мэт эмэгтэйг эцсээ хүртэл аз жаргалтай, үргэлж гялалзан гийж байхыг л хүссэн. Амиго түүнийг өөрчлөгдөөгүй гэж хэлдэг ч Хавхыг Шубира өөрчилсөн. Өөрчлөлтөө л тэр нууж байсан юм.

-Үнэхээр гал цогтой Шубира байж чаджээ-

"Шөнө дундын бүжиг" жүжгийн бэлтгэлийн үеэр Д.Асардарь жүжигчинтэй ярилцахад, "Шубира бол маш гал цогтой, хүнийг өөртөө татаж чаддаг эмэгтэй. Харин миний хувьд аливаа зүйлд бууж өгөх дургүй, нэг эхлүүлсэн зүйлийнхээ ард амжилттай гарахыг хүсдэг. Өөрөөс гарч болох бүх хүч хөдөлмөрөө дайчилж дүрээ гаргахыг хичээдэг. Тэгэхээр хүсэл мөрөөдлийнхөө хойноос тууштай явж чаддаг гал цогтой зан минь Шубирагийн дүртэй төстэй болов уу гэж бодож байна" гэж ярьж байсан. Тэгээд л түүний энэ л яриаг бодож, хариулт эрж үзсэн. Тэр үнэхээр гал цогтой Шубира байж чадсаныг энд тодотгон хэлмээр байна.

Тийм учраас би эхлээд Шубирад тоглосон жүжигчинтэй, дараа нь Шубирагийн дүртэй ярилцсан юм.

ШУБИРАТАЙ ЯРИЛЦСАН БОРООТОЙ ҮДЭШ "ШӨНӨ ДУНДЫН БҮЖИГ" БОЛЖ БАЙСАН...

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2023-06-10 00:40:46

Оюун.: Жүжиг болон дүр нэг бүрийн учир холбогдол хоорондын уялдааг нарийн мэдэрч бичжээ!. Уран бүтээлийн амжилт хүсьее!.

Шинэ мэдээ

Нийтлэлчид