Тэр бол “Фантастик” продакшны урд нь ч ард ч оршигч уран бүтээлч. Тодорхой өгүүлбэл, дарга, продюсер, хоёрдугаар найруулагч, зургийн дарга, жүжигчин гээд бүх ажил үүрэгт тэр оролцоно. Монгол Улсын Соёлын тэргүүний ажилтан Б.Батсайхан өрхийг нь татаж, үүдийг  нь нээсэн  “Фантастик” хэмээх өрх гэрийнхээ хамаг ажлыг нөхөдтэйгээ хамт ингэж л нугалж ирсэн болов уу. Найзууд болон уран бүтээлчид нь түүнийг Можуух гэнэ.

   Тэр бидэнд их ажилтай дарга гэхээс илүү алиа хошин зүйл ярьж, юм асуухаар үргэлж “айн” гэдэг “Хэцүү анги” киноны Дөлгөөний дүрээр илүү танил. Сэргэлэн, цовоо, хэрсүү, зөөлөн түүний эл дүр яах аргагүй үзэгчдийн хайртай дүрийн нэг. Б.Батсайхан ч ялгаагүй хөгжилтэй яриа, аяс зөөлөн нуруутай нэгэн. Түүний тоглосон уран бүтээлд Б.Батсайхан гэх хувь уран бүтээлчтэй тун ойртох хоёр дүр бий.

Хэрэв түүнийг дүр төрх болоод зан чанарын хувьд уншигч танд илүү ойртуулж, таниулах гэвэл энэ хоёр дүрийг л дурдахад буугаад ирэх болов уу.

    Тэр бол “Хэцүү анги” киноны Дөлгөөн. Морьтойгоо үсрээд уулыг бугуйлддаг “Зүрхний хилэн” киноны  Сандагийн дүр. Сандаг бол хөдөө очоод жинсэн өмд, тамирын цамцаа дээлээр сольсон Дөлгөөн л байсан.

     Дүр адилхан байна гэхээс илүү тоглож байгаа жүжигчний характер, өнгө аястай ижил дүр гэж байдаг болов уу. Өөрөөр хэлбэл, энд дурдсан хоёр дүр түүнтэй ийм л төстэй. Тэр “Хэцүү анги” киноноос өмнө “Гоёлын даашинз”, “Сайн уу, амьдрал минь”, “Есөн мянга ес” уран бүтээлүүдэд тоглож байжээ.

     Үзэгч Б.Батсайханыг “Boomtown” хамтлагийн дуучин байснаар нь андахгүй мэднэ байх. “Охин чамтай”, “Дурлал хаа ч зэрэг” дуугаараа хит болж байсан тус хамтлагийн гишүүд өдгөө бүгд кино урлагийн салбарт яваа. Урлагт тэр хамтлагт дуулж эхлээд кино урлаг руу орж, олон ангит киноны хөгжилтэй хүүгийн дүрд тоглож, үзэгчдэд хайрлагдаж эхэлсэн. Дараа нь харин найзуудтайгаа продакшн байгуулж, өдгөө үзэгчдийн хүлээлт дүүрэн уран бүтээлчид болжээ.

-МЭДРЭМЖТЭЙ ПРОДЮСЕР-

    Уран бүтээлч хүний хамгийн гол жигүүр бол мэдрэмж. Тархи, зүрхэндээ ургуулсан мэдрэмжээрээ жигүүр хийж, урлагт дүүлэн нисдэг байх. Б.Батсайхан тийм л уран бүтээлчийн нэг. “Фантастик” продакшны “Зүрхний хилэн”, “Маш нууц”, “Байтагбогд”, “Зура” бол түүний продюсер гэх нарийн мэдрэмжээс үүдэн гарсан бүтээлүүд. Б.Тамир найруулагчийн гаргах гэсэн санааг гүйцээж, дүүргэж, хамаг баг бүрэлдэхүүнээ удирддаг алба бол продюсер. Энэ ч утгаар түүнийг ард ч оршигч нэгэн гэж дурдсан. Үндсэндээ тус продакшны уран бүтээлүүдийг дулаацуулж, амь оруулах албан тэр зүтгэж байдгийг дурдахгүй байхын аргагүй. Үүгээрээ тэр мэдрэмжтэй продюсер.

     Тэрбээр продакшныхаа талаар "Манай продакшны бүх жүжигчдэд киноны санал ирдэг. Гэвч бид 2016 оноос эхлэн уртын төлөвлөгөө гаргаад ажиллаж байгаа. Уран бүтээлүүд маань нэлээн шахуу хуваариар төлөвлөгдсөн. Төлөвлөгөөний дагуу ажиллахаар өөрсдөө ч амарч чадахгүй байгаа хүмүүс өөр кинонд тоглоно гэхээр толгойд буухгүй л дээ. Уртын төлөвлөгөөний эхний кино “Зүрхний хилэн” шүү дээ. 1800-гаад оны үеийг харуулсан кино. Дараа нь оноо наашлуулаад 1948 оны үеийг харуулах “Байтаг богд” киног “Жийж продакшн”-тай хамтарч хийсэн. Үүний дараагаар арван жилийнхээ ойд зориулж 1980-1990 оны үеийг харуулах “37 дугаар точка” киногоо бүтээж, үзэгчдийнхээ хүртээл болголоо. Үүнээс хойш бидний хувьд дахин шинэ хуудас эхэлсэн. Энэ хуудас маань 2025 он хүртэл үргэлжилнэ" гэж ярьсан байдаг. Тэд ийм л төлөвлөгч, алсын хараатай баг гэдгийг үүнээс харж болно.

  Ийнхүү “Фантастик” продакшн гэх шижигнэсэн залуусын нэг байж, тэдний эв эе, итгэл, сэтгэл, уран бүтээлийг зангидаж яваа нэгэн бол залуу уран бүтээлч Б.Батсайхан буюу бидний танил Дөлгөөн.