...Жигүүртэй юм шиг залуу насны

     Жинхэнэ боловч гэнэн хайр...гээд урт тарпизан өмд, эрээн цамц өмсөж, үсээ дундуур нь хагалан самнасан эрхэм гитар тоглон, хоёр тийш хөлөө хаялан бүжиглэж, дуулна. Уншигч та ямар хамтлагийн хэн гэдэг дуучин гэдгийг хэдийнэ таасан байх. “Айзам” хамтлагийн үүсгэн байгуулагч Д.Ганболд агсан 70, 80, 90-ээд онд ийм л уран бүтээлч байлаа. Тоотойхон хэдэн хамтлагтай байсан тухайн цаг үед торойж гарч ирсэн хамтлаг бол “Айзам”. Ийн дурсахын учир тэрбээр хоёр хоногийн өмнө хорвоогоос буцлаа.   

    Одоо Монголын рок попын ертөнцөд том орон зай онгойн үлдлээ. Нэгэнт онгойсон зайг нөхөх аргагүй ч түүний үлдээсэн дуу хуур бидний зүрх сэтгэлд одоо ч эгшиглэж байна.

“Айзам” гэхээр “Итгэл”, “Дурсамж”, “Чи минь”, “Хайрын дууг минь сонсооч” зэрэг зуун дамнасан хит дуунууд аманд аялагдаж эхэлнэ. Хэчнээн хүний дурсамж, хайрыг санагдуулж, дуугаараа хөглөн үлдээснийг тооцвол ерээд оныхон лав тэр чигтээ байгаа. Өдгөө ч залуус “Айзам” хамтлагийн дууг шинэчлэн дуулж буй. Үнэхээр л жигүүртэй юм шиг залуу насныхаа ирээр тэд дуу хуураа амилуулж, тэр үеийн залуус  зохиосон дуунд  нь жигүүртэй юм шиг “нисэж” явсан.

      Д.Ганболд агсан анх тракторчин, комбайнч мэргэжлээр төгсөөд, Үйлдвэрчний эвлэлд гитарчнаар орсноор уран бүтээлээ эхэлж байсан түүхтэй. Жилийн хугацаанд клубт бүжиг явуулдаг хамтлаг байгуулаад, дараа нь “Айзам” хамтлагийг байгуулсан гэдэг. Рок поп төрөл жанрт “Соёл эрдэнэ” хамтлагаас өөр шинэ содон хамтлаггүй байсан цаг үед “Айзам” ёстой л өнгө нэмэн орж ирсэн.

Хамгийн зөөлөн хайрын дуунуудыг ар араас нь “төрүүлж”, аймаг, сум, дүүргийн “Соёлын төв”, клубүүдээр нэг эгшиглэж, залуус нэгнээ урин бүжиглэж, гитартай дуулж байсан үе.

   “Айзам” хамтлагийн хамгийн анхны дуу нь “Итгэл”. Д.Ганболд агсан ч энэ дуугаа бичүүлж, гаргахдаа эхнэртэйгээ танилцаж, гэр бүлтэй болсон байж. Дөнгөж амьдралд хөл тавьж, хайр дурлал, бүх зүйл нь шинэхэн түүний амьдралын үе энэ дуунаас тод мэдрэгддэг. Ёстой л залуу гэр бүл ийм л байдаг байх гэсэн зүйл “Итгэл” дуунд өгүүлэгддэг.

    Ингээд л тэр хайрын дууг “үйлдвэрлэж”, “Айзам” ёстой л мандаж байлаа. Гэгээн хайр, гэгээн бүхний сэдэвтэй дуу бол тэдний хамтлагийнх. Залуу гэр бүл, залуу хосууд, амьдралын эхлэл, өрнөл цөмийг нь дуулж байсан, тэд. Ийм сайхан нэгэн цаг үеийг эзэлсэн уран бүтээлийг бидэнд үлдээгээд, үүрд эгшиглүүлж орхиод тэр явчихлаа. Өөрөө дуу эгшгийнхээ айзам хэмнэлд шингэлээ. Хамаг бүхний дурсамж, түүхийг дуугаараа бүтээгээд буцлаа.

   Эцсээ хүртэл тэр тайзан дээр гарахыг хүсэж, гитараа барихыг мөрөөдөж, залуудаа цогтойхон эгшиглүүлсэн дуунуудаа дуулахыг хүсэж байсан нь лавтай. Гэхдээ ирсэн болохоор буцдаг хатуу дүрмээр тэр ч мөн буцлаа. Түүний дуунууд цагийн цагт эгшиглэж үлдсэн шиг тэр ч мөн өөр ертөнцөд дуу хуураа хүргэхээр явсан байх. “Айзам” хамтлаг бидний дурсамж хайранд үеийн үед мөнхөрч, өнө хожмоо ч мөнхөрсөөр байх болно.