Монголын тайз, дэлгэцийн урлагийн нэгэн залуу од харвалаа. Одоо хошин урлагийн тайз түүнгүйгээр, түүний дулаан сайхан инээмсэглэл, хөгжилтэй төрхөөр дутах нь. Гэхдээ тэр амжиж олон сайхан дүрийг тайз, дэлгэцэд үлдээж чаджээ. Урлаг гэх их айлын хошин урлагийн төрөлд тод нэгэн өнгө төрх, дуу хоолой, дүр төрх нь болж, хүний орчлонд удаж төдөлгүй, түрүүлээд буцлаа. Мөр зэрэгцэн ажиллаж байсан, уран бүтээлчид гуньж, дурсан сууна. Түүний урлагт орсон түүхээс товч өгүүлбэл, 2006 онд СУИС-ийг жүжигчин мэргэжлээр төгссөнөөс хойш “Шинэ үе” продакшн, "Мөрөөдлийн театр"-т ажиллаж олон сайхан дүрд тоглож, авьяас билгээ үзэгчдэд үзүүлж байж.

   Түүнээс үзэгчдийн санаанд хамгийн тод үлдсэн нь Засаг даргын эрх хүүгийн дүр. Энэ нь хүмүүст хүрч, ийм нэгэн өнгө төрхтэй жүжигчин байдаг юм байна гэж үзэгчид мэдэж эхэлсэн анхны дүр. Өөрөөр хэлбэл, энэ дүрээс хойш тэр дэлгүүрийн худалдагч, бүдүүн том биетэй эмэгтэй, эрх хүү, атаман, бүтэлгүй залуу, хүргэн хүү гээд олон дүрийг тайзнаа гаргаж, дэлгэцэд мөнхөлсөн. Үзэгчид Ганбааг гарч ирэхээр заавал инээдэг. Тэр төрх байдал, үг яриа бүхнээрээ үзэгчдийг соронз мэт татаж чаддаг байсан. Хаанаас ч , хэн ч "Энэ нөгөө Ганбаа байна" гэж түүнийг хүлээж, үзэж, дүр бүхэнд нь дуртай байсан. Айхтар үзэн ядагдсан дүр цөөн юм. Ихэнхдээ инээж, хөгжилдөж байгаа дүр төрхийг тэр гаргаж, үзэгчдэд түүгээрээ гэгээн мэдрэмжийг өгч байсан болов уу.

   Тэрбээр хэвлэлд өгсөн нэгэн ярилцлагадаа "Надад яагаад ч юм, атаман, дарга, хайртай нөхрийн дүр оногдоод байдаг юм. Миний биеийн онцлогоос шалтгаалдаг болов уу.  Гэхдээ жүжигчин хүн заавал энэ тэр гэлтгүй бүх л дүрийг бүтээдэг байх ёстой. Заавал хаан, ноён биш л дээ. Хааны гэрийн үүдэнд жад бариад зогсдог баатрын дүр ч сайхан" гэж ярьж байж. Ийм л мэргэжилдээ чин хайртай, оногдсон дүр бүхэндээ дурлаж, хайрлаж гаргадаг нэгэн байв. Хүмүүс түүнийг мөн "хөөрхөн Ганбаа" гэж өхөөрдөн, хайрлана. Учир нь, эрх хүүхдийн дүрд тэр ихэд зохицно. Урлагийн найзууд болон хамтран ажиллаж байсан хүмүүс нь түүнийг “Зөөлөн сэтгэлтэй, уужуу тайван, нөхөрсөг, хөгжилтэй зантай" нэгэн байсан гэж ярьдаг бөгөөд хүнтэй муудалцаж, сөргөөцөлдөж, эвдэрч байх нь цөөн гэдэг юм билээ. Ихэнхдээ бүгдтэй эвсэг, арга эвийг нь олж харилцдаг зан чанартай байж. Үнэхээр л тэр тайз, дэлгэцэд ч мөн тэр л хэвээрээ үзэгчдэд хүрч, их сайхан инээмсэглэсэн дүүрэн уран бүтээлч байсан.

  Тухайлбал, “Доргио долоон эр”, “Хоёр хоёрын тав”, “Хөгжилтэй өдөр”, “Хуримын сюрприз”, “Том толгойтын романс”, “Их хотын залуус”, “Гацуурхан”, “Хөгжилтэй дүр”, “Буруу эргэлт” зэрэг дэлгэцийн олон уран бүтээлд гол болон туслах дүр бүтээсэн байдаг бөгөөд цөм хөгжилтэй, бүтэлгүй, гэнэн цайлган дүр.

   Монголын урлагт тэр бүтээж үлдээсэн дүр шигээ гэгээн гэрэлтэй, цайлган сэтгэлтэй, наргианч уран бүтээлч болж тогтон үлдсэн. Уран бүтээлч байхын хамгийн сайхан нь бүтээлээрээ үүрд үлдэх. Ганбаа ч мөн бүтээлээрээ бидний дунд мөнх үлдэж, түүнээс гадна телевизийн нэвтрүүлэгт хүртэл инээж, хошин алиа зүйл ярьсан нь тэр л хэвээр үлдсэн байна. Үргэлж инээж, хүмүүсийг инээлгэж баясгасаар тэр нартаас буцлаа. Түшигтэй найз, сайн аав, авьяаслаг нэгэн уран бүтээлч, сайхан хүү байсаар явлаа. Богинохон энэ цаг хугацаандаа өөрийнхөөрөө гэрэлтэж, авьяас билгээ хүмүүст хүргэж байгаад буцлаа. Түүний үлдээсэн дүрүүдийг, гэгээн гэрэлтэй инээмсэглэл хүн бүрийн зүрх сэтгэлд дурсагдан үлдэж, "Монголын урлагт ийм нэгэн уран бүтээлч байсан шүү" гэж үгүйлэн хайрлах болно. Тэр бүтээлээрээ мөнх үлдсэн. Үзэгчид түүний гэнэн цайлган дүрийг санавал, хамтран зүтгэж байсан уран бүтээлчид нь түүнийг санаж, дурсвал харж, үгийг нь сонсож, тоглосон уран бүтээлийг нь үзэх бүхнээ тэр үлдээгээд буцсан. Тэр бүтээлээрээ үүрд мөнх бидний дунд оршиж, тайзан дээрээ дуулж, бүжиглэж, хөгжилтэй зүйл ярьж, уйлж, өгөгдсөн дүр бүхэндээ одоо ч хувирч байгаа...