ХҮЧИРХЭГ ГЭГЭЭ

Д. Бямбасүрэн:
Соёл урлаг

2022-05-24, 1343

Эршүүд гэмээр дүрд тоглодог л болохоос тэр жинхэнэ эмэгтэй хүний мөн чанар, дотоод сэтгэлээр гэрэлтдэг уран бүтээлч.

Эл өгүүлбэрээс уншигч та хэний тухай өгүүлсэн бол хэмээн таамаглаж, ямар уран бүтээлч тийм бол гэж эргэцүүлэх болов уу. Магад зарим нь шууд тааж ч мэднэ. “Рашаантын-18” киноны ядарсан дүү нараа тэжээх гэж байдгаараа "мачийж", бохь тэргүүтэн зардаг, ааштай мөртлөө өр нимгэн эгчийн дүрийг мэдэхгүй хүн цөөн болов уу.

Ширүүн дориун, эв хавгүй, бүдүүн бараг эмэгтэйн дүрийг тэр Монголын урлагт “тамгалж” чадсан.

Ингэхдээ тачигнатал инээж, чанга хашгирч, харгис хүйтэн төрх, зэвүүн байр байдлыг ч үзүүлж, чангахан дүрүүдийг чадварлагаар бүтээж яваа нэгэн. Энэ ч утгаар эршүүд дүр бүтээдэг эмэгтэй жүжигчин хэн билээ гэхэд хамгийн түрүүнд эл уран бүтээлч дүрээрээ санаанд бууж, эрхгүй энэ л орон зайд эзэн суусан нэгэн.

Кино уран бүтээлд хөнгөн, хүнд, уян зөөлөн дүр гэж бий болов уу. Тэгвэл тэр бол хамгийн хүчирхэг дүрийг гаргадаг. Ер түүний тоглосон уран бүтээлд амьдралын төлөө тэмцэж яваа эмэгтэйн дүр илүүтэй зонхилдог бөгөөд өрх толгойлон амьдралаа авч яваа эмэгтэйчүүдийг тэр бүрэн төлөөлдөг. Эмэгтэй хүн амьдралыг ганцаараа авч явахад багагүй хүч тэнхээ, сэтгэлийн хат шаарддаг. Энэ байдлыг, эл дүр төрхийг тэр эрхгүй гаргаж, үзүүлдэг. Тийм ээ, Монголын урлагт Базаржавын Навчаа гэж шавхийсэн хөдөлгөөнтэй, ааштай, адтай, авхаалжтай, адармаатай, зоримог уран бүтээлч бий.

Б.Навчаагүй бол “Хэцүү анги” киноны ааштай захирал, “Помогите нам” киноны тэр эмэгтэй, “Рашаантын-18” киноны хулгайчийн эгч, “Ларьдма” киноны шоронгийн харгалзагч бүсгүйн дүр гарах байсан болов уу. Магад хэн нэгэн түүний оронд тоглох л байсан байх. Гэхдээ түүн шиг тохирох нь хэн бол. Эл уран бүтээлүүдээс харахад түүний дүрд ааштай, хүчирхэг эмэгтэйн дүр зонхилж буй учир түүний уран бүтээлийн ерөнхий өнгө аясыг хүчирхэг гэгээ гэж нэрийдэхэд буруудахгүй болов уу. Дайчин, зоримог, эрч хүтэй, гал цогтой түүний дүрүүд дотроо, дотоод мөн чанартаа бол гэгээ татуулж, гэрэл цуулсан байгаа нь олон ч уран бүтээлээс нь харагдана. Угтаа, үндэсдээ бол тэр ихэд гэгээтэй, Монголын урлагт өөрийн авьяас уран бүтээлээрээ гэгээ татуулж яваа, дотортой жүжигчин. Уудлаад байвал илүү ч олон зүйл гарч ирэх баялаг уран бүтээлч.

-Б.НАВЧААД ХАМГИЙН ОЙР ДҮР-

Эмэгтэй хүний гоо сайхан гэж угтаа ямар зүйл вэ. Жинхэнэ гоо үзэсгэлэн гэж гадаад гоо үзэмжийг хэлэх үү, дотоод гоо үзэмжийг хэлээд байна уу гэдэгт хариулт болсон бүтээл бол түүний тоглосон "Би эмэгтэй хүн" кино. Хувь Б.Навчаа гэх эмэгтэй хүний дотоод мөн чанар, эмэгтэй хүн юу хүсдэгийг тэр эл уран бүтээлээрээ тултал гаргасан. Б.Навчаагаас хэрэв эмэгтэйлэг дүр гарна гэвэл, найруулагч түүнд эмэгтэйлэг дүрийг оноож өгсөн бол эл уран бүтээлийн дүр л байх болов уу. Тэр тус уран бүтээлийн дүрээрээ жинхэнэ Б.Навчаа гэх эмэгтэй хүнийг бүрэн дүүрэн үзүүлсэн.

Эмэгтэй хүний дотоод ертөнц, ганцаардал, хайр халамж хүсдэг бүх л зан чанар, өнгө төрхийг тэр тус уран бүтээлийн дүрээрээ гаргаж, харуулсан. Үргэлжийн ааштай, эмэгтэйн дүрийг түүнээс хардаг бол хамгийн өр зөөлөн, өрөвчхөн, эмзэг дүрийг тэр эл уран бүтээлд гаргаснаараа бидэнд өөрийгөө илүүтэй танилцуулсан.

Бусдаар бол харгис хэрцгий, хүйтэн сэтгэлтэй, хүнлэг бус дүрд тоглож, үргэлжийн нэг зүйлийн төлөө тэмцэж явдаг түүний дүрүүд өдгөө ч монголчуудын зүрх сэтгэл, тархинд буудаг. Б.Навчаа гэхээр л хашгирсан, “зэрлэг”, “зэгзгэр” гэмээр дүр санаанд бууж, зэвүүн эсрэг дүрүүд санаанд тодорно. Аргагүй түүний тоглодог дүрүүд өөрөө тийм гэхэд хилсдэхгүй болов уу. Үргэлж асаж, өөрийгөө эвдэж дүрээ гаргадаг эл жүжигчин өөрөөрөө байж, өөрийнхөө дотоод ертөнцийг түлхүү гаргасан эл дүрээрээ үзэгчдэд өөр нэгэн өнгө төрхийг гаргасан гэдэгт итгэлтэй байна.

-ХҮМҮҮСТ ТАНИЛ ДҮРҮҮД-

Түүнийг "Рашаантын -18" киноны дүрээр бид илүүтэй мэднэ. Амьдрал дээр эгч гэдэг ямар хүн байдаг, угтаа амьдрал гэж ямар зүйл байдгийг бодитоор харуулсан дүр. Аав, ээж нь эрт өнгөрч, айлын том охин л дүү нараа авч үлдэж, амьдралын шуургад эрт ордог. Энэ ч утгаар өөрийн хүсэл мөрөөдөл амьдралыг золиосолдог эл дүр бол яг тийм олон эгчийн дүрийг төлөөлсөн. Дүү нарынхаа төлөө, хайртай бүхнийхээ төлөө хамаг бүхнээ зольж, сайхан, муухай бүхнийг үзэж, тэр чинээгээрээ ааш зан нь өөрчлөгддөг эмэгтэйн дүрийг яг л гаргасан.

Дараа нь түүний олонд хүрсэн, нэг талаараа хамгийн их үзэн ядагдсан дүр бол "Хэцүү анги" киноны сургуулийн захирлын дүр. Эд хөрөнгө, мөнгө төгрөгт дуртай удирдлагын дүрийг тэр харин ч нэг үзүүлсэн. Албан тушаалын шуналтай нэгэн бол яг түүн шиг байдаг болов уу. Энэ л үеэс хүмүүс Б.Навчаа гэж ийм нэг чансаатай жүжигчин байдгийг мэдэж, түүнтэй танилцсан. Түүнээс өмнө "Помогети нам", " Гоёлын даашинз" зэрэг уран бүтээлд тоглож байсан ч төдийлөн хүмүүст хүрээгүй болов уу. Харин дээрх хоёр дүр бол түүнийг тодруулж, товойлгосон гэхэд маргах хүн үгүй байх.

-ХОШИН УРЛАГИЙН "ЧИМЭГ"-

Хошин урлагт байх ёстой, мөнхүү өгүүлэгддэг хүн бол Б.Навчаа мөн. Түүний ерөнхий дүр байдал, инээд, алиа хошин яриа хошин инээдмийн дүрийг эрхгүй гаргачихдаг. Мөрөөдлийн театрын чамгүй ч уран бүтээлд ээж, эгч, эмэгтэй хүний дүрийг гаргаж, тайзнаас үзэгчдийг инээлгэж байсныг санаж байгаа болов уу.

Ялангуяа, хөгжилтэй, хөгтэй Монгол ээжийн хошин дүр түүнд ихэд зохидог. Түүнээс гадна Мөрөөдлийн театрын "Утасгүй бол үхлээ юү" жүжигт жаахан охины утас болж тоглодог номер бол Б.Навчаагийн доторх гэнэн цайлган, гэгээн төрхийг ил гаргаж, үзэгчдэд үзүүлсэн. Тэгэхээр хошин алиа төрх түүнд бүрэн тохирдог. Угаас адтай, авхаалжтай хошин дүрийг тэр торох юмгүй үзүүлдэг.

Ингэж тайзнаа "чимэг" болж, тайзнаас инээлгэж явсан тэрбээр сүүлд харин ахиж, урагшилж, чамгүй туршлагажиж яваа уран бүтээлчийнхээ хэргийг гаргаж, нийгмийн эмзэг нэгэн сэдэв болох гэр бүлийн хүчирхийллийн сэдвийг хөндөж, "Ларьдма" киног хийсэн. Дараа нь мөн "Амьдрал", "Үүр цайгаасай" зэрэг уран бүтээлийг хийж, шаггүй, найруулагч продюсерийнхээ авьяасыг үзүүлээд амжсан. "Ларьдма" бол нийгмийг доргиож, үзэгчдийг цочроосон уран бүтээл. Үнэхээр ийм амьдрал байдаг шүү, байгаа гэдгийг харуулсан "чанга” бүтээл. Үүгээрээ ч Б.Навчаа жинхэнэ уран бүтээлчийн сэтгэл, зүтгэлийг харуулж, өөрийнхөө ч хэлэх, ярих гэсэн бүхнийг гаргах гэсэн болов уу.

Ийн тайз болон дэлгэцийн бүтээлд өөрийнхөөрөө хувирч чанга чамбай, чансаа өндөр бүтээлийг дэлгэн үзүүлдэг хүчирхэг нэгэн уран бүтээлч бол тэр. Эхлэлд дурдсанчлан гэгээн бүхэн түүний дотор байж, хатуу ширүүн, эсрэг дүрийг гаргадаг ч жинхэнэ мөн чанартаа хамгийн зөөлөн, уярам тэр Монголын урлагийн хүчирхэг гэгээн уран бүтээлч мөнөөс мөн билээ. Одоо тэр харин юугаар, ямар дүрээр гарч ирэх л сонин байна. Б.Навчааг тэсэлж, эвдэж, илүү оргилсон бүтээл үзэгчдэд хүрнэ гэдэгт итгэлтэй байна.

ХҮЧИРХЭГ ГЭГЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2023-08-13 08:08:34

В.Ичинхорлоо : Үнэхээр мундаг сайн жүжигчин шүү энэ эмэгтэйд шагнал урамуулал одон тэмдэг авах ёстой үнэлгээг нь өх хэрэгтэй зарим нэг наль шал гэсэн 2 нүүртэй эмэгтэй жүжигчид байдаг шдээ тэдний дэргэд жинхэнэ шудрага сайн жүжигчин хол явах хүндээ эх орондоо хийсэн зүйлгүй ИХГишүүн заримдаг эмэгтэйчүүдийн оронд ИХГишүүн болгочихсон зөв юм хийх байх гэж боддог шүү хүчтэй зоригтой эмэгтэй амжилт хүсье
Сэтгэгдэл үлдээсэн: 2023-08-12 22:25:31

Тунгаа: Сайн уран бүтээлч яах аргагүй мөн шүү.

Шинэ мэдээ

Нийтлэлчид