Монголын кино урлагийн ертөнцөд “OI” энтертайнмент хэмээх айл өрхөө татаж, үүдээ нээгээд буй. Энэ хугацаанд тэд шинэ эрэлхийлэл, сонин сэтгэлгээ, хийж бүтээнэ гэсэн чин халуун сэтгэлээр чамгүй уран бүтээлийг үзэгчдэд хүргэсэн. Чухам ямар уран бүтээлийг үзэгчдэд хүргэснийг уншигч та андахгүй мэдэх учир энд дурдахгүй үлдээе. Эргэлт.мн мэдээллийн сайт тус энтертаймэнтийн эрэгтэй залуу жүжигчдийг өмнөх дугаартаа нийтэлсэн бол энэ удаад тэдний хамгийн отгон уран бүтээл болох “NO RULES” киноны эмэгтэй жүжигчдийг онцолж байна. Уг кинонд түүчээ үеийн залуу уран бүтээлчдээс эхлэн, дөнгөж сургуулиа төгссөн залуу жүжигчид тоглосон байх бөгөөд тэд цөм эл уран бүтээлд өөр, өөр өнгийг илэрхийлжээ.

-НАРАНСОЛОНГО БА OI ЭНТЕРТАЙНМЕНТ-

         МУСТА, "Эмоци" продакшны жүжигчин Г.Нарансолонготой бид "Харьд одсон бүсгүйн заяа", "Миний хөрш чөтгөр", "Дурласны маргааш", "Мөрөөдлийн хөлөг онгоц" зэрэг уран бүтээлээр нь анх танил болсон. Тэр дүрлэгэр алаг нүд, сэргэлэн төрхтэйгээс гадна Монголын тайз, дэлгэц, хошин урлагийн бүхий л төрөл жанрт торохгүй хувирах авьяастай нэгэн гэдгээ баталж, Монголын урлагт 20 гаруй жил зүтгэсэн нэгэн. Өдгөө харин жүжигчин О.Тэмүүжин, Д.Түвшинтөр нартай хамтран “Эмоци” продакшныг байгуулан уран бүтээлээ туурвиж буй. Багадаа эмч болно гэж мөрөөддөг байсан охин өдгөө монголын чансаатай жүжигчдийн нэг болсон. Тэгвэл тэрбээр 2019 онд “ОI” энтертайнментийн найруулагч Р.Эрхэмбүрэнгийн  “Солонго, үүл” киноны гол дүрд тоглосон бөгөөд эл уран бүтээл түүний хувьд өмнөх киноны дүр төрхөөс өөр дүрийг гаргаж ирсэн. Үүнээс хойш тэрбээр “ОI” энтертайнменттэй дөрөө харшуулж, уран бүтээлд хамтрах болсны нэгэн илрэл бол “NO RULES” кино. Хууль дүрэм нь хөрөнгө мөнгөтэйд нь үйлчилж, гэмт хэрэгтээ идэгдсэн тухай өгүүлэх эл кинонд эгчийн дүрд тоглосон. Тэр амьдрал дээр ч киноны уран бүтээлчдээс нас илүү, туршлага давуу. Иймдээ ч бусад кинонд тоглосон залуу жүжигчдэд том үлгэр болдог мэт. Цааш тэдний зам нийлэн хэр урт үргэлжлэхийг л харах үлдлээ.                                                                                                                            

-ИДЭР ДҮРҮҮД-

         NO RULES" кинонд нас насныхан тогложээ. Киноны эмэгтэй гол дүрүүд идэр насныхан. Энэ нь зөвхөн насаар ч биш. Тоглосон уран бүтээл, авьяас, ур чадвар цөм идэр. Энэ бол та бидний сайн танил залуу жүжигчин Г.Золзаяа, З.Номуундарь нар юм. Жүжигчин Золзаяагийн хувьд "Хувь тавилангийн ээдрээ", "Зүүдэнд ч оромгүй явдал", "Шүрэн бугуйвч" зэрэг уран бүтээлд тоглосон. Мөн сүүлд "Бүтэн амьдрал" кинонд тоглосон залуу, чадварлаг уран бүтээлч.  Харин З.Номуундарь бол МУГЖ И.Одончимэгийн охин бөгөөд "Х-ТҮЦ" продакшны жүжигчин. Ингээд харахаар эд бол үзэгчдийн хэзээний танил. Үүгээрээ тэд идэр гэх тодорхойлолтод багтаж байгаа юм. Өөрөөр хэлбэл, туршлага мэдлэгээ эд хуримтлуулж яваа үе аж.

-КИНОНЫ ЕРТӨНЦӨД ШИНЭЭР САЛХИЛАГЧИД-

Кино урлагийн салбарт залуу жүжигчид төрөн гарсаар байгаагийн нэг бол залуу жүжигчин Б.Хунцэнгүүн, Н.Нархажид, У.Уянга нар юм.

Шинэхэн цэрэг гэдэг шиг өнгөрсөн жил дөнгөж сургуулиа төгссөн тус залуу уран бүтээлчид тоглосон нь киноны бас нэгэн шинэ шийдэл.

Үзэгчид шинэ зүйлийг хүсдэг, шинэ дүрийг нэхдэгийг айхтар найруулагч олж мэдсэн нь эдгээр залуус аж. Хэдийгээр тэдний хувьд нэгээс хоёр уран бүтээлд тоглосон ч киноны салбарт "шинэднэ".

           Тэр дундаа Н.Нархажидын хувьд анхны уран бүтээл. Тэр эл киногоор кино баг хамт олон гэж ямар зүйл байдгийг мэдэрч, цаашид тоглох олон уран бүтээлийнхээ замыг нээж буй. Харин Б.Хунцэнгүүн “Хазаар цэцэгсийн дуулал”, “Гэгээн учрал” зэрэг уран бүтээлийн гол дүрд тоглосон. Үүгээрээ огт шинэ зүйл биш ч сайн жүжигчин болох хүслийг нь энэ кино нэг шатаар ахиулж байгаа нь тодорхой. У.Уянга бол "Фантастик" продакшны "37-р Точка" киноны Сувдын дүрд тоглосон. Дөнгөж сургууль төгссөн хүнд гол дүр оногдоно гэдэг ховор. Тэгээд тэр дүрээрээ үзэгчдэд хүрнэ гэдэг хүн бүрд олддог боломж биш. Гэвч тэр ийм нэг боломжийг атгаж, цаашид тоглох олон дүрийнхээ хаалгыг нээсэн нэгэн.

Ийнхүү залуу халуун эрч хүчээр нэгдэн кино хийж, жүжигчдээ ч өсөж хөгжих боломжтой залуусыг соргогоор харж, түүсээр залуу үе кино урлагийн том ертөнцөд мөрөө үлдээхээр зүтгэж байна. Тэдний мөр тод байг...