Хэнтий аймаг байгуулагдсаны 100 жилийн ойн баяр наадам будилаантай болж, олон нийтийн шүүмжлэлд өртсөн. Тодруулбал, тус аймгийн 100 жилийн наадмын их насны морьдын уралдаанд түрүүлсэн Хөвсгөл аймгийн уяач Б.Отгонсэлэнгийн морийг тодорхойгүй шалтгаанаар хассан гэх мэдээлэл цацагдаж байлаа. Наадамчин олон Б.Отгонсэлэнгийг морио цоллуулах эрхтэй гэж үзэн цэнгэлдэх хүрээлэн рүү оруулсан ч хөөж гаргасан нь иргэдийг бухимдуулсан билээ.

Тухайн үед уяач Б.Отгонсэлэнгэ “Хэнтий амйгийн Шүүхийн шийдвэрийн  дарга  Д.Хатанбаатар гэх хүн “Хэний наадамд уралдаж байгаагаа мэдэж байна уу, морио аваад зайл” гэж хэлсэн. Гэтэл өөрийнхөө нэр дээр тод манлай уяачийн морийг уралдуулсан байсан. Тэгээд түрүүлүүлэхийн тулд миний морийг хассан юм билээ. Өөрөөр хэлбэл, миний морийг хасаад өөрийнхөө нэр дээр уралдуулсан морио түрүүлүүлсэн. Морины комиссынхон болон  Шүүхийн шийдвэрийнх нь дарга гэх Д.Хатанбаатарт гомдолтой байна” гэж ярьсан билээ.

Тэгвэл бид энэ талаар Хэнтий аймгийн наадмыг будилуулсан гэгдээд байсан Д.Хатанбаатараас тодрууллаа.

-Сайн байна уу, та. Та ажлаа хийж байгаа юу?

-Сайн, сайн байна уу. Би үүрэгт ажлаа гүйцэтгэж байгаа.

-Хэнтий аймгийн 100 жилийн ойн баяр наадмын түрүү морийг хасаж, таны нэр дээр уралдсан морийг түрүүлүүлсэн гэдэг асуудал үүссэн. Энэ талаар таниас тодруулах гэсэн юм?

-Энэ асуудал одоо чухал биш. Тухайн үед наадам болоод өнгөрсөн шүү дээ. Баяр наадмын комисс л уралдуулах морио мэднэ шүү дээ. Хэмжилт хийгээд хассан байх. Тэрнээс би эрх мэдэл, албан тушаалын байдлаа ашиглаж, хасаагүй. Мөн өөрийнхөө морийг будилаантайгаар түрүүлүүлээгүй. Үүнийг л ойлгох хэрэгтэй.

-Түрүүлсэн морь нь таны өөрийн уяж сойсон морь юм уу. Эсвэл хүний морийг өөрийнхөө нэр дээр уралдуулсан юм уу?  

-Хэнтий аймгийн наадамд түрүүлсэн морь хүнийх биш, миний өөрийн морь. Миний нэр дээр бүртгэлтэй, адуу минь байгаа юм. Гарал үүсэл нь н.Эрдэнэчулуун тод манлайгийн адууны унаган адуу.

-Таныг уяач Б.Отгонсэлэнгийг хөөж, хаана уралдаж байгаагаа мэдээрэй зэргээр дарамталсан гэдэг мэдээлэл байсан. Энэ үнэн үү?

-Би уяач Б.Отгонсэлэнгэ гэдэг хүнийг харж ч байгаагүй, уулзаж ч үзээгүй. Тэгэхээр тэгж хэлсэн зүйл огт байхгүй.

-Наадам будилуулсан гэдэг асуудал дээр ямар нэгэн хариуцлагын асуудал яригдсан уу?

-Баяр наадмын комисст ямар хариуцлага яригдаж, арга хэмжээ авсныг би мэдэхгүй. Хэнтий аймгийн Засаг даргын тушаалаар 10 гаруй хүн томилогдсон шүү дээ. Би тухайн наадамд албан тушаалаараа биш, иргэн хүнийхээ хувьд оролцсон.