Эзэмшсэн мэргэжил нь сансарын физикч, эрхэлдэг ажил нь бизнес, парламентад суугаад төр түшиж, сайд болоод үйлдвэрийн салбарт дуу хоолой болж явсан, өөрөө нам байгуулж, Ерөнхийлөгчид нэр дэвшиж, өнөө алдарт долдугаар сарын 1-ний бослого тэмцлийг зохион байгуулж, турхирсан гэж “аавын хаалга” хүртэл татсан шулуухан үгтэй ч голыг нь олдог, ярихдаа егөөтэй, ямбалахдаа ёжтой нэгэн эрхэм Монголд бий.  Түүнийг Буянгийн Жагаа буюу Базарсадын Жаргалсайхан гэдэг.

Үймээн шуугианы ч гол эзэн. Хэвлэлийн салбарт бол “хэрүүлч”, хэдэр ёдор гэдгээрээ бүр цуутай. Телевизийн нэвтрүүлэгт зочноор уригдаад хоцорч очихдоо сэтгүүлчтэй муудалцсан супер нэгэн жишээг нь бид мэднэ дээ. “Би чиний ажилтан юм уу” гээд мань эр ёстой мандааж байсан. Болоогүй бүр “Танайд хоноё” нэвтрүүлгээр ороод хөтлөгч Г.Алтантүрүүг “оймсгүй хулгайч” хэмээн дуудсан нь ч бий.

        Ийм л нэгэн тэрслүү, тэсрэх бөмбөг мэт л энд тэндэх асуудлыг үгээрээ “тэсэлж”, голыг нь олж хэлээд “гохийг нь дарж” суудаг. Хүмүүс бараг түүнийг нам жим байвал илүү гайхах байх. Нийгэмд өрнөж буй асуудал бүхэнд л үзэл бодлоо илэрхийлж, үгээ хэлж л байдаг. Гэхдээ тэр нь хүмүүст хүрч, “Үнэн” гэж хүлээн авдаг нь хэд бол. Үнэнээс зугтдаг,  гэхдээ үнэнийг нуудаг болсон нийгэмд түүн шиг шүүмжлэгч, шударга бус яригч нүцгэн үнэнийг нүүрэн дээр нь нүд цавчихгүй хэлээд, тас шүүмжилдэг хүмүүст хэн дуртай байх билээ.

         Тийм болохоор л түүнийг зөвхөн өөртөө л ойлгогддог, өөрөө өөртөө л үнэнч хүн гээд байгаа юм. Түүний үг, ярьж байгаа зүйл гашуун мөртлөө үнэн, гарцаагүй байх үе бишгүй ээ. Үүний энгийн нэгэн жишээ татахад, одоо ютүүб сувагт бий дээ, түүний л орсон ээлжит нэвтрүүлэг.  “Та сайхан өвөлжиж байна уу” гэсэн сэтгүүлчийн асуултад, “Тааруу өвөлжиж байна, утаа ихтэй, цас багатай байна, хулгай, дээрэм, луйвар үргэлжилсээр л байна” гэж хариулж суусан. Үнэхээр ч монгол хүний ёсоор мэнд мэддэг болохоос начир дээрээ, бодит ахуйдаа нийслэлд хүн таатай өвөлжөөд байхаар газар биш шүү дээ. Ёстой хурдан өвөл дуусаасай гэж санаа алдмаар бараан өдрүүд өнгөрөөд, арайхийн хавартай золгодог. Болоогүй ээ, тэгээд хаврын хавсаргатай өдрүүд ч үргэлжилнэ гээч.

Үнэнийг ингэж ил хэлдэг болохоор л тэр “ад үзэгдэж”, оноод хэлсэн зарим нь “Энэ өвгөн доромжиллоо” гэж бухимдах нь л их.

БАЗАРСАДЫН ЖАРГАЛСАЙХАН ГЭЖ ХЭН БЭ

             Тэгвэл олноо Буянгийн Жагаа гэж нэрлэгдээд буй тэр хэн бэ, төдийгөөс өнөөдрийг хүртэл юу хийж ирэв гэхээр мэдээж түүний амьдрал, явсан замнал бидний өмнө ил байх бөгөөд хэн бүхэн л их, бага хэмжээгээр түүний тухай сонссон байдаг. Туг ч барина, тугал ч хариулна гэдэг шиг юм, юм л үзсэн эрхэм юм билээ. Тийм болохоор ч амьдралтай хатуу үгсийг шулуухан хэлдэг байх. Таван хүүхэдтэй айлын дундах хүү тэрбээр арван жилээ 23 дугаар дунд сургуулийг төгсөөд, Зөвлөлт холбоот улсын Эрхүү хотын Политехникийн дээд сургуулийн сансарын физикчийн ангийг төгссөн байдаг. Сургуулиа төгсөж ирээд “Говь” ХХК-аас ажлын гараагаа эхэлж байжээ. Дараа нь, хувиараа бизнес эрхэлж эхэлсэн түүнийг Үндсэн хуульт Монгол Улсын анхны саятан ч гэгддэг. Хятадаас арван төгрөгөөр худалдаж авсан бараагаа Орост 1000, Сингапураас 2000 ам.доллараар худалдаж авсан видео камераа Хятадуудад 4000 ам.доллараар зарах зэргээр хөрөнгөтэй болсон ч гэх нь бий. Ямартай ч тэр үеэс “Буян” ХХК-наа үүсгэн байгуулж, ид эхэлж байсан юм билээ. Компаниа хамаатнуудтайгаа нийлж үүсгэсэн ч гэдэг. Үүгээр зогсохгүй анх компаниа байгуулаад ажилчдынхаа цалингийн оронд бараа авахыг шаардаж байсан тухай нь ч шуугиж, түүнийгээ өөрөө ч юман чинээ тоож байгаа юмгүй “Та нарт мөнгө ямар хэрэгтэй юм бэ, цалингаа аваад Хятадын бараа л худалдан авна биз дээ. Үүнийхээ оронд надаас бараа ав, үгүй бол зайл” гэсэн байна. Ийм л дураар, "том" нэгэн. Хэзээнээс тэр чухам ийм тэрслүү, хэлэхээ хэнээс ч айхгүй шууд хэлдэг болсныг яг таг он сартай нь тооцоолж мэдэхгүй. Гэхдээ заримдаа ч юуны төлөө ийн явдаг байна гэж бодогдох нь бий. Магад ийн хэлвэл тэр “Юуны ч төлөө яваагүй, та нарын байдал л ийм байна шүү дээ, би үнэн зүйл л ярьсан” гэж гэдийх байх. Нээрээ тэгээд хэлэхээр хариу үггүй ч болох юм шиг байна. Яг ингэж хариугүй болтол тас хэлж, нам цохидог.

          Бизнесийн салбараас тэр улс төр рүү “нүүсэн”. Улсын Их Хурлын гишүүн болж, дараа нь Засгийн газрын гишүүн болж, Худалдаа үйлдвэрлэлийн сайдаар хүртэл ажилласан. Гэхдээ тэр төрийн албыг богинохон хугацаанд хашиж, дараа нь хоёр ч удаа сонгуульд нэр дэвшсэн ч амжилтыг олж чадаагүй. Илүү ч үгүй, дутуу ч үгүй, хэлсэн үгэндээ гэмших ч үгүй, “Хэлсээр ч байх болно” гэж гэдийн суух тэр одоо ч хэлж, ярьж, дуугарсаар л байгаа. Магад тэр өөрөө өөртөө л онцгой нэгэн зүйлийг бүтээж яваа байх, онцгой зүйлийнхээ төлөө цаашид ч бүтээсээр л явах биз ээ. Угтаа бол түүний задгай шоуны техник хэрэгслийн эрэн үе нь ирсэн ч түүнд "гар дүрэхгүй" салбар байхаа больжээ.