Дорноговь аймгийн Сайншанд сумаас энэ сарын 3-нд 12 настай охин сураггүй болсон. Охиныг эрлийн багийнхан гурав хоног хайж, өнөөдөр цогцсыг нь олсон байдаг. Тодруулбал, эрлийн багийнхан 12 настай охины цогцсыг Дорноговь аймгийн Мандах, Өмнөговь аймгийн Манлай сумын чиглэлээс олж, эрэн сурвалжлах ажиллагааг зогсоожээ. Цагдаагийн байгууллагаас хэргийн газарт үзлэг хийж, бусад хойшлуулшгүй ажиллагааг үргэлжлүүлж байгаа юм.

Талийгаач охины алга болсон Дорноговь аймгаас зургаан жилийн өмнө найман настай Д.Сэржмядаг охин алга болж, өнөөдрийг хүртэл олдоогүй байна. Д.Сэржмядаг охиныг алга болох үед Замын-Үүд сумын яналтын камер ажиллагаагүй байсан учир эрэл мухардаж, олон нийтийн шүүжмлэлд өртөж байлаа. Тэгвэл гурав хоногийн өмнө алга болж, цогцос нь олдсон 12 настай охины сургууль, гэрийн ойролцоо хяналтын камер дутмаг, хангалтгүй байснаас болж, гэмт хэрэгтнийг илрүүлэхэд хугацаа алдсан нь тодорхой болоод байна.

Харамсалтай нь, 12 настай, талийгаач охин аравдугаар сарын 3-нд алга болсон байдаг. Харин Дорноговь аймгийн удирдлагууд охиныг алга болсноос хоёр хоногийн дараа буюу аравдугаар сарын 5-нд гэмт хэргээс урьдчилан сэргийлэх ажлын хүрээнд шаадлагатай байршилд камер суурилуулахаар тендер зарлажээ. Өчигдөр зарласан тендерийн үнэлгээ нь 135 сая төгрөг гэнэ. Тендерт оролцох компаниудын материалыг 2023 оны арваннэгдүгээр сарын 06-ны өдрийн 10:00 цаг хүртэл хүлээн авах ажээ.