Цагдан хорих 461 дүгээр хаалттай хорих ангид хоригдож байгаа “Эрдэнэс Таван толгой” ХХК-ийн захирал асан Б.Ганхуягийг өнөөдөр ухаан алдаж, эмнэлэгт хүргэгдсэн гэх мэдээлэл гарсан. Тодруулбал, түүний тархины хаван, ходоодны хорт хавдар сэдэрч, ухаан алдсан, одоог хүртэл ухаан ороогүй байгаа” гэх мэдээлэл олон нийтийн сүлжээгээр цацагдсан.

     Бид 461 дүгээр ангийн мэргэжилтнээс түүний биеийн байдлын талаар тодруулахад “Б.Ганхуяг ухаан алдаж, эмнэлэгт хүргэгдсэн гэдэг нь худал мэдээлэл байна. Манайд хоригдож буй хоригдогч нарын биеийн байдал өнөөдөр хэвийн байсан. Хэн ч эмнэлгийн тусламж, үйлчилгээ аваагүй” гэсэн юм.

Тэгвэл бид Б.Ганхуягийн эгч Б.Нарантуяагаас түүний биеийн байдлын талаар тодрууллаа. Тэрбээр “Өнөөдөр дүүгийн минь бие муудаж, даралт нь 90-ээс доош орсон. Байнга бөөлжиж, толгой нь хаван ихтэй учраас хорих ангийн эмнэлэгт яаралтай хэвтүүлсэн. Хэдхэн минутын өмнө эм, тариа оруулж өглөө. Эмчилгээ эрхэлсэн эмчтэй нь уулзсан. Биеийн байдал нь тогтворжиж байвал бидний санаа амарна аа. Утсаар ярих боломж байхгүй учраас хэцүү байна. Маргааш өглөө дүү рүүгээ очно. Бидний сэтгэл санаа үнэхээр хүнд байна. Нуун дарагдуулж, худал мэдээлэл тараагаад байх юм” гэлээ.

Хүний эрүүл мэндийн асуудал яригдаж байгаа энэ үед хууль хяналтын байгууллагынхан худал мэдээлэл тараасан эсэхийг бид маргааш тодруулан хүргэх болно.