Ховд аймгийн Засаг дарга асан Б.Дүгэржавыг хууль хяналтын байгууллагаас шалгаж, яллах дүгнэлт үйлдэх санал гаргасан талаар бид өнөөдөр мэдээлсэн. Энд дарж уншина уу. https://ergelt.mn/news/59/single/36964

Нэгдүгээрт, Засаг дарга асан Б.Дүгэржавыг эрх мэдэл, албан тушаалын байдлаа урвуулан ашиглаж, бусдад давуу байдал олгосон, тендер будилаантуулсан, хахууль авсан гэх үндэслэлээр хэрэг бүртгэл нээн шалгаж байгаа аж. Тодруулбал, Ховд аймгийн Жаргалант суманд баригдах Хүнс, хөдөө аж ахуйн газрын лабораторийн барилгын тендерт будилаан үүсгэж, бусдад давуу байдал олгожээ. Тэрбээр тендерт оролцсон компанид давуу байдал олгож, эрх мэдлээ ашиглан хуурамч бичиг баримт гаргаж өгсөн гэнэ. Тодруулбал, улсын төсвийн 1.9 тэрбум төгрөгөөр Хүнс, хөдөө аж ахуйн газрын лабораторийн барилга барих тендер зарласан байна. Уг тендерт оролцох компаниуд давхар ажил гүйцэтгээгүй, гүйцэтгэж байгаа тохиолдолд ажлын явц 90-95 хувь байх ёстой гэж заасан аж. Гэтэл уг тендерт оролцсон “Саруул цамхаг” ХХК нь Ховд аймгийн Жаргалант сумын Бичигт багт Малын гаралтай түүхий эд боловсруулах үйлдвэрийн цэвэрлэх байгууламжийн барилгыг барьж байжээ. Ингээд давхар тендерт хуурамч бичиг баримтаар оролцож, ялжээ.

Тэгвэл бид тендерт хууль бусаар хуурамч бичгээр оролцсон гэх “Саруул цамхаг” ХХК-ийн захирал Б.Бадрахтай холбогдож, энэ асуудлаар тодрууллаа. Тэрбээр “Ховд аймгийн Жаргалант суманд баригдах Хүнс, хөдөө аж ахуйн газрын лабораторийн барилгын тендерт оролцсон нь үнэн. Барилгаа бариад дуусаад, хүлээлгээд өгсөн. Ховд аймгийн Засаг дарга асан Б.Дүгэржав надтай ямар ч холбоо байхгүй. Энэ асуудлыг хууль бус гэж байвал Б.Дүгэржаваа л шалгах хэрэгтэй. Надад хамаагүй, хамаарал байхгүй. Хуурамч бичиг баримт үйлдүүлээгүй” гэлээ.