Сүүлийн өдрүүдэд цахим сүлжээнд Эрээний хилийн боомтоор амьд мал гаргаж байна гэх мэдээлэл цацагдах болсон.

Энэ талаар Замын-Үүд дахь Гаалийн газрын даргаас тодрууллаа. Тэрбээр “Хилээр амьд мал гарч байгаа гэсэн үг. Сүүлийн хоёр хоногт эрчимтэй гарсан. Гэхдээ тоо толгойг нь мэдэхгүй байна. Ямартай ч хэд хоног завсарлаад дахин гаргаж эхэлж байна. Ийм учраас олон тооны мал хил дээр байгаа зураг, бичлэг цахим сүлжээнд цацагдсан байх. Шаардлагатай шинжилгээ зэргийг авч, хууль, журмын дагуу ажиллаж байна” гэсэн юм.

Ташрамд дурдахад, өнгөрсөн 2019 онд Засгийн газрын хуралдаанаар хилээр амьд мал гаргах гурван Засгийн газрын тогтоолыг хүчингүй болгож байсан билээ.

Тодруулбал,

2014 оны 282 дугаар тогтоол (Н.Алтанхуяг)

2015 оны 474 дугаар тогтоол (Ч.Сайханбилэг)

2017 оны 142 дугаар тогтоол (Ж.Эрдэнэбат)

2017 оны 284 дүгээр тогтоолыг (Ж.Эрдэнэбатын үүрэг гүйцэтгэгч) цогцоор нь авч үзэж тухайн үеийн Ерөнхий сайд У.Хүрэлсүх шийдвэрүүдийг Засгийн газрын хуралдаанаар хэлэлцүүлж цуцлуулж байжээ. Өөрөөр хэлбэл, хонь, ямааг амьдаар нь экспортод гаргах тухай 2014, 2015, 2017 оны Засгийн газрын тогтоолыг тус тус цуцалж байсан юм.