Бороотой, бүрхэг өдөр гэрийнхэнтэйгээ хамт хооллох гэсэн ямар хоол хийхээ бодож олоогүй байгаа юм биш биз. Тэгвэл яг энэ л өдрөөр гэр бүлийнхэндээ хийж өгөх, хамт идэх таван хоол санал болгоё.

1.БАНШТАЙ ЦАЙ

Орц:

Цайны ус, цайны идээ, сүү, шар эсвэл цагаан будаа, сүүлний өөх, борц, хатаасан хавирга, давс

Хийх арга:

Юун түрүүнд хар цай чанаж дараа нь сүлээд дахин буцалгана. Ингээд цайгаа өөр саванд шүүж юүлээд тогоог сайтар цэвэрлэж халаана. Шар эсвэл цагаан будааг сүүлний өөхтэй хамт тогоонд хийж хуураад дээрээс нь шүүсэн цайгаа хийнэ. Үүн дээрээ нимгэн хөшиглөсөн сүүл, годгор борц, бог малын хатааж хуршаасан хавирга, эсвэл гургалдай нэмж хужир, давсаар амт тохируулан нэг удаа оргитол буцалгана. Энэ цайг аягалахдаа будаагаа шүүж аяганд хийгээд хэрчим сүүл, зүсэм хавирга дээр нь хөндөлдүүлж цай дүүргээд цагаан тос нэмнэ. Ингээд л бэлэн болно.

2.БРОККОЛИ, БЯСЛАГТАЙ АМТАТ ШӨЛ

Хийх арга:

Сонгиноо хэрчиж жижиглэнэ (улаан сонгино хэрэглэж болно). Дараа луувангаа угааж хальслаад ногоо үрэгчээр жижиглэн үрнэ. Гараар жижиглэн эсвэл өөртөө таарсан хэмжээгээр хэрчиж болно. Гэхдээ энэхүү шөлөнд лууван жижиг нарийн хэрчилттэй байх тусмаа амттай болдог. Брокколиг хүйтэн усанд угааж идэхэд тохируулан хэрчинэ. Бүр жижиглэн хэрчиж бас болно. Сайн чанарын, сайхан амттай маслог дунд зэргийн гал дээр хайлуулна. Масло хайлмагц хэрчсэн лууван, сонгиныг хийж зөөлөртөл нь 3-5 минут хутгаж бага зэрэг давс, перцээр амталж хуурна. Үүний дараа хутгах явцдаа хуурай гурил цацаж хутгаж хуурна. Гурил нэг газар хэт бөөгнөрөхөөс сэргийлж хутгаарай. Ингээд гурил хайлмаг мэт болж эхэлмэгц сүү хийж хутгана. Дараа нь тахианы шөл хийнэ. Тахианы шөл байхгүй бол тахианы цээж мах хийж болно. Мах хийсэн тохиолдолд ус хийнэ. Ингээд давс, перецээр тохируулан дахин амтлаад дунд зэргийн гал дээр 15 минут орчим буцалгана. Дараа нь хэрчсэн брокколи болон cheddar cheese/бяслагаа хийж хутгаад 20 минут орчим зөөлөн гал дээр хутгаж болгоно.Ингэхэд шөл өтгөрч, ногоо болон тахиан мах бүрэн болж, зөөлөрч, бяслаг хайлж тансаг сайхан үнэр ханхлах болно. Шөлийг зөөлөн гал дээр буцалгах тусам өтгөрч, зутан шиг болно.

3.ЦАГААН ГААТАЙ, АДУУНЫ МАХТАЙ ШӨЛ

Орц:

Адууны мах 120 гр, цагаан гаа таван грамм, шар манжин 30 грамм, юуцай 60 грамм, ногоон сонгино 10 грамм, хар перец нэг чимх, цайны халбага давс

Хийх арга:

Цагаан гаа, манжингаа арилгаад нимгэн хавтгай хэрчинэ. Адууны мах нимгэн зорж хэрчвэл зөөлөн мөн хурдан болно. Юуцайг хагаслан хуваана. Ногоон сонгиныг урт нарийн хэрчинэ. Махаа хүйтэн усанд 10 минут чанаж хөөс нитгэлийг нь хаман авч манжин, цагаан гааг хийж чанаж болгоно. Махаа давс, чинжүүгээр амт оруулж, юуцайгаа хийж нэг минут орчим хугацаагаар чанана. Аягалахдаа ногоон сонгиноор чимэглэнэ

4.ХӨЦ БУДААТАЙ ХЯРАМЦАГТАЙ ШӨЛ

Орц:

Хөц будаа 120 грамм, төмс 250 грамм, шар лууван 80 грамм, юуцай 30 грамм, хүрэн шош 30 грамм, бөөрөнхий сонгино 50 грамм, яншуй бага зэрэг, ургамлын тос 30 мл, ус эсвэл ногооны шөл 1.5л, давс, мөөг амтлагч, хар перец

Хийх арга:

Хөц будаатай шөлөө хийхдээ хамгийн түрүүнд төмс, шар луувангаа угааж хальслан шоо дөрвөлжин хэрчинэ. Бөөрөнхий сонгиноо хальслаад жижиг хэрчээрэй. Үүний дараа хүрэн шошийг 6-8 цаг дэвтээгээд хэд хэдэн удаа усаар зайлж угаах хэрэгтэй. Нам гал дээр чанаж болгосны дараа хөц будаагаа угаагаад ус хийж хоёр цаг орчим дэвтээх. Тос хийж халаасан саванд бөөрөнхий сонгино, шар лууван, төмсийг хийж бага зэрэг хуурсны дараа ус юм уу шөл хийж буцалгаад дээр нь дэвтээсэн хөц будаа хийж зөөлөртөл буцалгана. Шөл гаргахын өмнө хэрчсэн юуцай, чанасан хүрэн шош хийж мөөг амтлагч, давс, хар перецээр амтлаад хэдэн минут буцалгаад гаргана. Шөлийг таваглаад шинэ яншуй, гоньдоор чимэглэнэ.

5.БОРЩ

Орц:

Үхрийн ястай мах, төмс, байцай  хүрэн манжин, бөөрөнхий сонгино, лууван, нимбэгний шүүс, улаан лоолийн сүмс, давс, элсэн чихэр, нунтаглаагүй хар перец, лаврын навч, хмели-сунели, нунтаг хар перец, саримс, зөөхий, яншуй мэдрэмжээрээ

Хийх арга:

Үхрийн махаа чанаж, гарсан хөөсийг шүүнэ. Буцалсан шөл рүүгээ төмсөө нэмнэ. Хайруулын тавганд цөцгийн тос хийж, эхлээд сонгино, дараа нь луувангаа хийгээд бага гал дээр хуурна. Энэ зуур хүрэн манжинг үрээд лууван руугаа хийнэ. Үүний дараа улаан лоолийн сүмс, нимбэгний шүүс, давс, элсэн чихэр нэмэх хэрэгтэй. Махаа зөөлөртөл шөлөө 40 минут буцалгасны дараа хэрчсэн төмс, байцай хоёроо шөл рүүгээ хийнэ. Хуурсан ногоо болмогц шөл рүүгээ хийгээд, лаврын навч, нунтаг болон бүхэл хар перец, саримс, хмели-сунели амтлагчаа хийж хутгаарай. Аягалсан борщ дээрээ петрушка болон зөөхийгөө хийгээд л идэхэд бэлэн болно.