Допингийн шинжилгээнд бүдэрч, давтан гэх шалтгаанаар барилдах эрхээ найман жилээр хасуулсан улсын арслан Э.Оюунболдын талаар түүний багш Б.Адъяахүү цахим хуудастаа ийн бичжээ.

Б. Адъяахүү “Эр хоёр эндэж, эрэг нэг биш удаа нурлаа...

                 Ямартай ч бөхөө гэсэн олон түмнээсээ уучлалт гуйгаарай. Миний хувьд ч сэтгэлийг нь татаж  өнөөдрийг хүртэл  хажуудаа байлгаж чадаагүй дээ уучлалт гуйж байна. 2016 оноос цөхөр ч эхэлсэн ба олон хүн “Одоо орхио, өөр багштай болсон хүн буянаараа болог” гэсэн ятгалтад орсон байх.

         Өөрт бодогдож буй зүйлээ хэлье. “Сэргээшний шинжилгээнд давтан  бүдэрсэн хайран сайхан шавь Э.Оюунболдын талаар байр сууриа илэрхийл, өмөөр, үгээ хэл” гээд олон хүн хандаж байна. Шавь минь 2013 онд улсын харцага цолонд хүрээл багшаасаа жаахан дөлж эхэлсэндээ. Дараа жил “Аварга” дээд сургуулийг 2014 онд төгсгөөд  наадмын бэлтгэлд аваад гарах гэтэл “Эрхэмбаяр  аваргатай бэлтгэлд гарна” гээд захлаад эхэлсэн ба тэр жил доогуур унасан юм даг. 2014 оны  намраас нь бага зэрэг гэмшээд бэлтгэл сайн хийж эхэлсэн бөгөөд 2015 оны дөрөвдүгээр сард 1024 бөхийн барилдаанд түрүүлээд л бас хэд хоног олдоогүй.  Долоо хоногийн дараа Баянмонгол орчмоос бүтэл муутайхан явж байхад нь олж авсан байдаг. Тэр үеэс л бид хоёрын нэг нь зугтаж нөгөө араас нь хөөцөлддөг ширүүхэн цаг эхэлсэн. Яах вэ, чих нь арай зөөлөн байсан болохоор бэлтгэлд 2015 оны зургадугаар сард аваад гарсан. Тэр жил бороо их оройтож нийт нутаг гантай байсаар долдугаар сарын 2 нд бороо орж  эхэлсэн. Сүүж уулын наадмын бэлтгэлд миний бие их л ядарч, харшиж наадамтай золгосон. Э.Оюунболд харцага торолгүй түрүүлж магнай тэнийлгэсэн билээ. Нуугаад яах вэ баярласандаа нулимс гаргаж байсан. Ер нь бол Обо хүү 2007-2015 он хүртэл “Аварга” сургууль дээр тууштай бэлтгэл хийсэн. Тэр он жилүүд нь сурагч, оюутан цаг хугацаа байж дээ. Гол зорилго минь чөлөөт бөхийн хүнд жинд дэлхийн аварга болгох гэж бэлдсэн.

             2016 оны хавар шилдэг 16 бөхийн барилдаанд сайн барилдуулах гээд л гэрт нь манаж байж л Бөхийн өргөөнд авчирсан юм. Гэх мэт багш, дасгалжуулагч, манаач, секурит, сэтгэл зүйч гээд олон жил араас нь гуйж, гувшиж явсан. Юу үнэн гэвэл энэ л үнэн.  Өөрөө ч залхсан байх надаас. Яагаад, юунаас гэхээр архи, бүтэл муутай, хумсаа нуусан муу хүмүүсээс хол байлгах гэж тэр л дээ.  Ташрамд хэлэхэд, “Залуу бөх Э.Оюунболд байхаас нь чамд юу хэрэггүй вэ гэвэл уураг, витамин хэрэггүй” гэдэг байсан даа. Тарган мах, цагаан идээгээ идэж уугаад барилд, юун допинг гэж хэлсэн. Нэг хэсэг холбоо тасраад наадмаар л тааралддаг болсон. 2019 оны наадмаар бараа бараандаа нэг сар хамт байх, бэлтгэлийг нь харах, алдаа оноогоо ярих боломж гар ч билээ.  Миний бие 2018 оноос “Аварга” сургуулиас гадна  “Даян” дэвжээний зөвлөх дасгалжуулагчаар давхар ажилласан.  2019 онд Гончигдамба гарьд, Оюунболд арслан хоёрыг олон барилдааны бэлтгэл хийлгэж наадмаар  түрүү, үзүүрт хосоор нь хүргэх зорилго тавьсан юм даг . Гэвч санаснаар арай болоогүй. Гончиг гарьд их шөвөгт үлдэж, Оюунболд түрүүлсэн. Наадмын дараа нэг сар орчим би Завхан аймаг, залуу Аварга Хэнтий зүг рүү амрахаар явцгаасан. Наймдугаар сарын 10 орчимд сэргээшний хариу ирж тэнгэр ниргэх шиг цочирдож билээ. Хүйн долоо худагт болсон барилдаан дээр уулзаад ахиж хоёр жил дөрвөн сарын хугацаанд гурван удаа тааралдсан байна. Сүүлийн 4-5 жилийн хугацаанд чөлөөт бөхийн ОУХМ Батням багш дээр тасралтгүй бэлтгэл хийсэн байх.  Өөрөө ч тэгж ярьж байсан, өрөөлөөс ч  би сонссон. Товчхондоо ийм байна. Цаашид юу болохыг миний хувьд таамаглах юм алга. Гэхдээ би хүүдээ хайртай  миний том охинтой нэг онд төрсөн юм. Барилдахгүй ч  хүрээд ирвэл тосоод л авна. Олон хүнд сургамж боллоо” хэмээн бичжээ.