Багын найзаа хүнд гэмтээж, танхайрсан, балмад олимпын аваргын хэрэг хэрхэн шийдэгдэж байгаа нь тодорхойгүй царцалтын байдалтай байна. Зодсон найз нь үхэл, амьдралын заагт, сэхээн амьдруулах тасагт долоо, найман сар тарчилж байхад тэрбээр теннис тоглож, хөгжилдөж байгаа талаар хохирогчийн ар гэрийнхэн мэдээлсэн байдаг.

           Хэргийг эргэн сануулбал, олимпын аварга Н.Түвшинбаяр улсын өсөх идэр начин Э.Энхбатыг зодож, биед нь хүнд гэмтэл учруулсан хэрэг өнгөрсөн дөрөвдүгээр сард болсон. Э.Энхбат тархиндаа хүнд гэмтэл авч, ГССҮТ-ийн Эрчимт эмчилгээний тасагт олон хоног ухаангүй хэвтэж, улмаар БНСУ-д эмчлүүлэхээр явсан билээ. Үүнтэй холбоотойгоор Э.Энхбатын биед хүнд гэмтэл учруулсан Н.Түвшинбаярыг ШШГЕГ-ын харьяа Цагдан хорих 461 дүгээр ангид 30 хоног цагдан хорьсон байдаг. Улмаар өмгөөлөгчийнх нь хүсэлтийн дагуу өнгөрсөн тавдугаар сарын 20-нд батлан даалтад гаргасан юм.

Э.Энхбат начин өнөөдрийг хүртэл ухаан ороогүй бөгөөд БНСУ-д эмчлүүлж байна. Энэ талаар Э.Энхбат начны дүү Э.Энх-Амгалантай холбогдож, тодруулахад “Ах минь БНСУ-д эмчилгээгээ хийлгээд байж байгаа. Өөр мэдээлэл өгөх боломжгүй байна” гэлээ.