Их Британийн Засгийн газрын ордонд гурван ч Ерөнхий сайдын нүүр үзсэн даргын албан тушаалтай нэгэн муур бий. Түүнийг Ларри гэдэг. Их Британийн Ерөнхий сайдын ордон буюу Даунинг-стрийт-10-ыг зөвхөн хамгаалалтын албаны ажилтнуудаас гадна муур хамгаалдаг. Ерөнхий сайдын ордныг хулгана болон бусад мэрэгч амьтдаас хамгаалах үүрэг хүлээсэн Ларрид “Ахлах анчин /хулгана баригч/” цол хүртэл олгосон байдаг.

           Засгийн газрын тэргүүний орд, харшийг хамгаалах тэжээвэр амьтанд “дарга” цолыг Их Британид 1500-аад оноос буюу VIII Генри хааны үеэс олгож эхэлжээ. Харин Ларри муур уг албан тушаалд томилогдоод өдгөө 10 дахь жилдээ нэр төртэй ажиллаж байна. Их Британийн Засгийн газрын ордны ахлах цолыг 2011 онд хүртсэнээсээ хойш Ларри муур Дэвид, Камерон, Тереза Мэй болон өнөөгийн Ерөнхий сайд Борис Жонсоныг хамгаалах үүрэг гүйцэтгэж байгаа аж.

Албан байгууллагадаа хулгана болон бусад мэрэгч амьтнаас салах гэж муур байлгадаг ёс англичууд дунд хэдийнэ тархжээ. Энэ ч утгаараа төрийн алба хашдаг муур Ларри ганцаараа биш. Ердөө Ларригийн байрладаг Ерөнхий сайдын ордны урдхан талд Их Британийн Гадаад хэргийн яам байх бөгөөд тэндхийн “ахлах анчин” нь Палмерстон нэртэй муур. Ажил хөдөлмөрөөрөө, гаргасан амжилтаараа ч тэр Ларри, Палмерстон хоёр “алалцдаг” гэнэ. Ларри, Палмерстон хоёрыг ямарваа нэгэн албан байгууллага, оффист уулзуулбал нэгнээ хөөж, туугаад үзэж тардаг аж.

           Англичууд тэдний хэн нь илүү хулгана барьсныг тоолж, Ларриг зэмлэж, арай илүү хулгана агнаж, “онц дүн” авсан Палмерстоныг магтах нь олонтаа. Гэсэн ч ан агнуурт муу Ларри гадаад үзэмж, хүржигнээгээрээ хүмүүсийг татах нь Ларригийн Палмерстоноос илүү алдаршсан шалтгаан гэнэ.

-ГУДАМЖНЫ МУУР ЗАСГИЙН ГАЗРЫН ОРДНЫ МУУР БОЛСОН НЬ-

Анх Ларри муурыг Баттерсигийн амьтанд асрах төвд байхад нь Даунинг Стрийт буюу Засгийн газрын ордны ажилтнууд сонгожээ. Гудамжны тэнэмэл муур амьтан асрах төвд ирээд удаагүй байсан ч, Засгийн газрын ордны ажилтнуудаас сонгогдож, тухайн үеийн Ерөнхий сайд Дэвид Камерон болон түүний гэргий Саманта Камерон нарын тэжээвэр амьтан болохоор болсон юм.

           Харин Засгийн газрын ордны ажилтнууд “Зүгээр ч нэг гэрийн тэжээвэр амьтан биш. Хараа нь хурц, ан хийх өндөр чадвалтай” гэж үнэлснээр Ларриг Ерөнхий сайдын ордны албан тушаалд томилсон байдаг. Ларри муурт тохиолдолд энэ гайхамшигт үйл явдалтай холбоотойгоор Их Британид муур үрчилж авах хүмүүсийн тоо 15 хувиар өссөн гэдэг.