Хоёрдугаар сарын 10-нд АИ-92 шатахууны үнэ литр тутамдаа 40-45 төгрөгөөр өсжээ. Шатахууны үнэ жилийн хугацаанд тав дахь удаагаа нэмэгдээд байгаа нь энэ юм. Шатахууны үнэ өсөхийн хэрээр гарах үр дагавар нь иргэдийн амьдралд тусаж, өргөн хэрэглээний бараа бүтээгдэхүүн өсөж, үнэ нь дийлдэхээ больдог. Тэгвэл энэ байдлыг угаас ийм гээд тоохгүй өнгөрч болохгүй. Нэг литр шатахууны үнэ нэмэгдэхийн цаана хэдэн жолооч, халаасаа хоосолж, хэчнээн айл хоолгүй хонож байгаа асуудал яригддаг. Нэг айл сарын орлогоо хоол, түрээс, унааны мөнгө гээд хувиарлачихсан байтал, гэнэт нэг өглөө босоод ирэхэд л шатахууны түгээх станцын самбар дээрх үнэ өссөн байх. Үүнээс үүдэн өнөө айлын төсөв хуваарилалт өөрчлөгдөнө. Энэ бол бидний бодит төрх. Хэчнээн олон айл шатахууны нэмэгдсэний маргааш хэцүүдэж суугаа гэдгийг угтаа хэн ч анзаарддаггүй.

Үүнтэй холбоотойгоор бид энэ удаад шатахуун нэмэгдсэнээр иргэдийн нөхцөл байдал ямар байгааг сурвалжиллаа.

-АИ-92 шатахууны үнэ 40-45 төгрөгөөр нэмэгджээ-

    Манай улсад “Магнай трейд”, “Сод Монгол”, “Петровис” зэрэг шатахуун түгээх станц бий. Бид эхлээд 32-ийн буудалд байрлах “Сод Монгол” шатахуун түгээх станцаар ороход, “Приус-30” маркийн машинтай иргэн шатахуун авч байхтай таарав. Түүнээс шатахууны үнэ нэмэг талаар асуухад “ Шатахууны үнэ нэмэгдсэн байна, ажилтай орлогтой  хүмүүс ч яах вэ, ажилгүй хүмүүст бол үнэхээр хүнд тусаж байна. Манайх гэхэд гэрээсээ би ганцаараа ажил хийдэг, би  шатахуунаа авахаас гадна хоол унд, түлш үлээ бүх зүйлээ бэлддэг. Нэг удаа нэмээд өнгөрсөн бол дуугүй өнгөрмөөр байна. Одоо бол үнэндээ хэтэрлээ, бараг сард хэд нэмээд байгаа юм бэ. Би гэхэд өдөрт 20 литр шатахуун хийхэд хангалттай явчихдаг байсан. Одоо бол өдөрт 20 литрээр нь хийж чадахгүй боллоо. Одоо энэ ард иргэдийнхээ амьдралыг яаж гэж байгаа юм” гэж өгүүлэв. Түүний хойноос хоёр “Приус” ирэх бөгөөд тэд цөм тоолуур дээрх үнийн жагсаалтыг харсан мөртлөө түгээгчээс шатахууны үнэ нэмэгдчихсэн юм уу” гэж лавлан асууна. Түгээгч заримд нь “Тэгсэн” гэсэн сулхан дуугаар хариу өгөх бол нөгөө нэгэнд нь “Самбар дээрх үнэ хараарай” гэж хэлэх нь сонстоно. Ийнхүү цааш бид хэд хэдэн шатахуун түгээх станцаар ороход АИ-92 шатахууны үнэ 40-45 төгрөгөөр нэмэгджээ. Түгээгч нарын ихэнх нь шатахууны үнэ нэмэгдсэн нарийн учрыг мэдэхгүй, бидэнд чиглэл өгсөний дагуу ажлаа хийж байна гэсэн хариултыг өгч байсан юм. Учир нь, шатахууны үнэ нэмэгдсэнтэй холбоотойгоор шатахуун авахаар ирсэн иргэд үнэ нэмэгдсэн талаар асууж, зарим нь түгээгч рүү бухимддаг  нь анзаарагдсан юм.

  Бид цааш явсаар ногоон нуур буюу “Шинэ зам”-д байрлах шатахуун түгээх станцаар орж, зарим иргэдийн шатахууны талаарх байр суурийг сонслоо. Биднийг шатахууны үнийн нэмэгдлийн талаар асуухад иргэд “Энийг л нэг ярьчихмаар байсан” гэмээр хариулж байсныг дор сийрүүлье. Иргэн Ж.Болдсайхан “Үнэхээр шатахууны үнэ бол тэнгэрт хадаж байна. Эхлээд 300, тэгээд 100, дараа нь 40-50 гээд нэмэгдэж байна. Цар тахал гээд юмны үнэ өсчихсөн байгаа энэ үед шатахууны үнэ нэмэгдчихээр бүр дийлдэхээ болино. Энэ ард түмний амьдрал ямар байгааг бодитоор нь харахгүй байгаа болохоор болоод байна гэж бодож байгаа байх. Гэвч угтаа бол нэг литр шатахууны үнэ нэмэгдэхэд, нэг айлд хэчнээн зүйл дагаад өөрчлөгддөгийг мэдэхгүй байна” гэв. Ийнхүү иргэдийн байр суурийг сонсоход шатахууны нэмэгдэл амьдралд нь хэрхэн нөлөөлж байгааг ам уралдан ярьж байлаа.

-Олон улсын зах зээлд газрын тосны үнэ нэмэгдснээс үүдэн шатахууны үнэ нэмэгджээ-

  Шатахууны үнэ өссөн талаар Газрын тосны бүтээгдэхүүн импортлогчдын мэргэжлийн холбооны тэргүүн Ж.Мөнхнарангаас тодрууллаа. Тэрбээр “Одоогоор ганцхан АИ-92 шатахууны үнэ өнөөдөр 40-45 төгрөгөөр нэмэгдлээ. Учир нь, олон улсын зах зээлд газрын тосны үнэ нэмэгдсэн. Гадаад үнэ нь  нэгээс хоёрдугаар сард тонн тутамдаа 10 хувиар өссөн. Цаашид шатахууны үнэ нэмэгдэх, эс нэмэгдэх нь дэлхийн зах зээлээс хамаарна. АИ-92 шатахуунд зургаан сарын дунджаар үнийг тогтоож байгаа. Нөөц гэвэл аж ахуй нэгжүүдэд дунджаар 45 хоногийн нөөц бий. Бусад нэр төрлийн шатахуун нэмэгдэх үгүй нь энэ сарын 15-20 хооронд тодорхой болно” гэсэн хариултыг өглөө.