Хэдхэн хоногийн дараа валентины баярын өдөр болох гэж байгаатай холбогдуулан манай сурвалжлах баг амьд цэцгийн үнэ ханш, эрэлт, борлуулалт ямар байгаатай танилцахаар Улсын их дэлгүүр болон Цэцэг төвөөр орж дараах сурвалжилгыг бэлтгэлээ.

-Улаан сарнай, цагаан сарнай, лили цэцэг хамгийн их борлуулалттай байна-

    Улсын их дэлгүүрийн нэг давхарт байрлах цэцгийн тасагт биднийг очиход, хүний хөл хөдөлгөөн их байх бөгөөд ид борлуулалтын үе гэсэн шиг худалдагчид нь цэцгийн үнэ асуусан, цэцэг худалдан авах гэсэн хүмүүст дор бүр нь үйлчилж, зарим хүнд цэцгийн бэлгэдталаар тайлбарлаж байлаа. Лангуун дээр удвал, сарнай, сараана, наранцэцэг, лили зэрэг төрөл бүрийн цэцэг өрөөтэй байх бөгөөд хүмүүсийн хамгийн түгээмэл худалдан авах цэцэг нь улаан сарнай байгаа нь ажиглагдав. Гаднаас орж ирэх хүмүүс "Улаан сарнай ширхэг нь хэд вэ" гэж асуухад, худалдагч ширхэг нь 9500, таван ширхэгээрээ 65 мянган төгрөг гэсэн хариултыг өгөхөд иргэдийн зүгээс "Арай л нэмэгджээ" гэж хэлэх нь нэгэн байхад, чимээгүйхэн  "Боолгоод авья" гэх нь ч сонстоно.

     Худалдагч Г.Амарсайханаас цэцгийн нийлүүлэлт, үнэ ханшийн өсөлтийн талаар тодруулахад "Манайх Голландаас цэцгээ авчирдаг, хил хаагдаж нэг хэсэг саатсан ч одоо бол хэвийн орж ирж байгаа. Үнийн хувьд тээврийн зардал өссөн болохоор 1000-2000 төгрөгөөр нэмэгдсэн. Өнгөрсөн жилийг бодоход энэ жил цэцгийн борлуулалт харьцангуй сайн байна. Учир нь, хүмүүс их ойр, ойрхон шагнал авсан нь цэцгийн борлуулалтад их нөлөөлсөн. Одоо валентин, март гээд эрэлт их байна. Өнөөдрөөс цэцэг хүмүүс их авч байна. Манайхан нэг үеэ бодоход соёлтой болж, гайгүй гэснийг нь үнэ харгалзахгүй авч байгаа нь цэцгийн худалдан авалтаас харагдаж байна. Мөн цэцгийн бэлгэдлийг их сайн мэддэг болжээ. Улаан сарнай, цагаан сарнай, лили цэцэг хамгийн их борлуулалттай байгаа" гэв. Ийнхүү Улсын их дэлгүүрийн нэг давхар хөл хөдөлгөөн ихтэй байлаа.

-Цэцгийн үнэ 9000-110 мянган төгрөгийн үнэтэй байна-

     Цааш явсаар бид Цэцэг төвд хүрэв. Манай улсын цэцгийн гол цэг болсон тус газар биднийг очиход мөн хүн ихтэй харагдана. Худалдагчид нь цэцгээ шинээр боож байх бөгөөд шинэхэн цэцгийн үнэр ханхийнэ. Энд, нэг ширхэг сарнай 9000 төгрөгөөр худалдаалагдаж бөгөөд таван ширхэгээрээ 65 мянгаар зарж байв. Харин лили цэцэг 40 мянган төгрөгөөр худалдаалагдаж байв. Цэцгүүдийн үнэ өөр, өөр байгаагийн шалтгааныг асуухад "Бэлгэдэл болоод үнэ цэнээсээ хамаарч үнэ нь өөр байдаг. Мөн боодлоороо илүү үнэтэй зарагддаг. Цэцгэн дээр боодол баглааны үнэ мөн нэмэгддэг. Тухайлбал, нэг ширхэг лили цэцэг 25 мянга, гурван ширхэг сарнайтай цэцгийн баглаа 35 мянга, удвал цэцэг ширхэг нь 7500 төгрөгөөр борлуулагдаж байна. Цэцэг гэдэг бол тансаглал болсон зүйл, хэдийгээр дорхноо гундаад үхчихдэг ч хүмүүсийн гоёлын хэрэглээ болсон зүйл. Энэ ч утгаар хүмүүсийн үнэтэй ч хайртай дотны хүмүүстэй мөнгө харамлалгүй авч байна" гэв.

   Энэ зуурт гаднаас нэг худалдан авагч 80 мянган төгрөгт улаан сарнай боолгоод гарав. Түүнээс цэцгийн үнийн талаар асуухад "Сүүлийн хоёр жил юмны үнэ их өсөж байна, мэдээж цэцгийн үнэ ч мөн түүнийгээ дагаад өссөн байх. Одоо тэгээд яая гэх вэ, хадам аав, ээж хоёр маань улсын малчин болсон юм. Тэгээд өнөөдөр шагналаа авч байгаа юм, тэгээд цэцэг аваад явж байна" гэж ярилаа. Ийнхүү цэцгийн үнэ өнгөрсөн жилээс 1000-5000 төгрөгөөр өссөн байх бөгөөд үнэ нь нэмэгдсэн ч борлуулалт ихтэй байлаа.