-Коронавирусийн халдвараас үүдэн товлолын вакцин оройтжээ-

  “Хоолой сэрвэгнээд, толгой өвдөөд, хоёр өдөр халуурлаа” гэсээр хорь гаруй настай болов уу гэмээр охин Чингэлтэй дүүргийн XIII хорооны Өрхийн эрүүл мэндийн төвд коронавирусийн шинжилгээ өгөхөөр иржээ. Эмнэлгийн ажилтан “За, түр суугаад хүлээж бай, 12:00 цагаас нэгдсэн байдлаар шинжилгээ авна, тестээ авчирсан уу” гэж асуулаа. Охин толгой дохиод, хүлээлгийн сандал дээр суух таван хүний эгнээнд шилжив. Түүний араас хоёр ч эмэгтэй ханиалгаж, хамар битүүрээд, толгой өвдөөд намддаггүй гэсэн шалтгаантайгаар мөн шинжилгээ өгөхөөр дугаарлана. Товлосон цагтаа эмнэлгийн ажилтан “За шинжилгээ өгөх хүмүүс дөрөв номерийн  өрөө рүү ороорой” гэх нь тэр. Шинжилгээ өгөхөөр ирсэн гурав ороод, удаа ч үгүй гарч ирэв. Тэгээд таван минут хүрэхгүй шахам хугацаанд эмнэлгийн ажилтан “Хоёр зураас, эерэг гарлаа, эмийн багцаа аваад гэртээ тусгаарлагдах хэрэгтэй” гээд бүртгэл хийв. Тус эмнэлэгт ийнхүү үд дундын үед найман хүнээс халдвар илэрсэн нь энэ.

Өрхийн эмнэлэгт шинжилгээ өгөхөөр ирсэн хүмүүсээс гадна даралтаа үзүүлэх, хүүхдийнхээ товлолын вакциныг хийлгэх, эм бичүүлэх гэсэн иргэд ирнэ. Амралтын өдөр болоод тэр үү санасныг бодоход эмнэлгийн ачаалал бага байх бөгөөд шинжилгээ өгөх иргэд орж, гарах нь их байв.    

  Тус эмнэлгийн дотоод үйл ажиллагааны талаар захирал Г.Нина эмчээс асуухад “Коронавирус болон омикрон хувилбарын тархалт ихэссэнээр энгийн иргэд эрсдэлтэй гээд өрхийн эмнэлгээр үйлчлүүлэх нь багассан. Иргэд өөрсдөө гэртээ даралтаа үзэж, ханиадаа намдааж, эм уун биеэ эдгээж байна. Харин хүүхдүүдийн товлолын вакцин л оройтож байгаа. Сүүлийн хоёр жилийн хугацаанд вакцинаа хийлгээгүй өнжсөн тохиолдол ч бий. Энэ бол маш муу үр дагавартай. Бага насны хүүхдүүд тогтсон цагтаа вакцинаа хийлгэхгүй байна гэдэг нэгдүгээрт, улаан бурхан, салхин цэцгээр өвчлөх нь ихэснэ. Хоёрдугаарт, дархлаа суларч, амархан ханиад хүрнэ. Эмнэлгийн зүгээс гэрээр нь яваад вакцин хийх боломж бага байгаа. Манай эмнэлгийн ихэнх эмч нар коронавирусийн халдвар авсан болохоор хүн хүч дутмаг байна. Өдөрт халдварын шинжилгээ өгөхөөр ирж байгаа иргэдийнхээ ачаалалд дарагдаад л байж байна” гэв. Өрхийн эмнэлгийн дутагдалтай тал нь коронавирус болон омикроны шинжилгээ өгөхөөр ирсэн иргэд болон энгийн үзлэгийн иргэдийг тусгаарласан зүйл үгүй. Нэг хаалгаар оруулж, үүдний танхимд холилдон суух нь халдвар тархах эрсдэлийг нэмэгдүүлж байгаа нь анзаарагдаж байлаа.

Коронавирус болон омикрон хувилбарын тархалт ихэссэнээр энгийн иргэд эрсдэлтэй гээд өрхийн эмнэлгээр үйлчлүүлэх нь багассан. Иргэд өөрсдөө гэртээ даралтаа үзэж, ханиадаа намдааж, эм уун биеэ эдгээж байна. 

-ИРГЭДЭД КОРОНАВИРУСЭЭС ИЛҮҮ ОМИКРОНЫ ШИНЖ ТЭМДЭГ ИХ БАЙНА-

   Дараа нь бид Сүхбаатар дүүргийн XIII хорооны өрхийн эмнэлэг хүрэв. Мөн коронавирусийн халдварын улмаас шинжилгээ өгөх хүмүүсийн хөлд дарагджээ. Түрүүчийн өрхийн эмнэлгийг бодоход энд хүн их байна. Эмнэлгийн ажилтан “Коронавирусийн шинжилгээ авч байна” гэсэн өрөө рүү шинжилгээ өгөх хүмүүсийг дагуулан орж, шинжилгээг авч, хариуг танилцуулна. Тэгэхдээ тус эмчид эерэг гарсан үйлчлүүлэгчийн нэг “Хамаг бие шархирч өвдөөд, цээжээр хатгаж, жаахан хоол унд идчихээр хөлс ус шиг урсаад байгаа юм” гэхэд эмч, “Омикроны шинж тэмдэг байна. Эмийн багцаа аваад гэрээрээ харзнан гамаа барьж бай, хүндэрвэл дүүргийн эмнэлэгт хандаарай” гэж зөвлөв. Халдвар илэрх иргэдийн шинж тэмдгийн талаар тус эрүүл мэндийн төвийн эмч Г.Баянжаргалаас асуухад “Манай ӨЭМТ-д өдөрт 30-50 коронавирусийн халдвар илэрч байна. Өмнө нь эмийн багцийг халдвар илэрсэн хүн бүрт өгч байсан бол одоо тухайн иргэний биеийн байдлыг эрэмблэн насанд хүрэгчид болон хүүхдийн эмийн багцийг олгож байна. Эмч нар халдвар авч байгаатай холбогдуулан амралтын өдрүүдэд эрүүл мэндийн сайдын тушаалаар 2-3 резидэнт эмч дайчлагдан бидний ачааллыг хуваалцаж байна. Иргэдэд коронавирусээс илүү омикроны шинж тэмдэг их байна” гэлээ.

Халдвар илэрх иргэдийн шинж тэмдгийн талаар тус эрүүл мэндийн төвийн эмч Г.Баянжаргалаас асуухад “Манай ӨЭМТ-д өдөрт 30-50 коронавирусийн халдвар илэрч байна. 

Ийнхүү Өрхийн эрүүл мэндийн төвд коронавирус болон омикрон хувилбарын шинж тэмдэг илэрсэн хүмүүс шинжилгээ өгөх нь их байгаа бөгөөд эмнэлгийн ачаалал, хөл хөдөлгөөнөөс сэргийлэн даралтаа үзүүлэх, эмч бичүүлэх,  хүүхдийнхээ вакциныг хийлгэж эмнэлэгт орох нь багассан байна.