Автомашиныхаа хаалгыг зугуухан онгойлгон нэгэн жолооч “Приус-20” загварын автомашины 195 хэмжээтэй өвлийн дугуй хэдэн төгрөг вэ” гэж асуухад худалдагч хариуд нь "75 мянган төгрөг" гэв. Нийслэлийн томоохон автомашины материалын төвлөрсөн цэг “Өгөөмөр” техник захад өдөр бүр ийм яриа өрнөнө.

    Цас орохоос урьтаж, өвлийн дугуй авах "санаа өвөрлөсөн" иргэд "Өгөөмөр" захад ирж, худалдан авалт хийхээсээ илүүтэй үнэ асуугаад л буцаж харагдана. Өвлийн дугуй сонирхож явсан жолооч ярианаас үзэхэд автомашины өвлийн дугуй өнгөрсөн жилээс өссөн гэнэ. "Өгөөмөр" захад суудлын автомашины өвлийн дугуйны хамгийн хямд нь 50 мянган төгрөг байх бол, хамгийн их үнэтэй нь 1.4 сая төгрөг үнэтэй байна.

     Сурвалжилгын эхэнд дурдсан "Приус-20" загварын автомашинтай эрийн сурагласан 195 хэмжээтэй өвлийн дугуй 75 мянган төгрөгийн үнэтэй. Харин 16, 65, 215 хэмжээтэй “Приус-41” загварын автомашины өвлийн дугуй хээнийхээ хэмжээнээс хамааран 70-100 мянган төгрөгөөр борлуулагдаж байсан юм. Энэ үнэ нь өмнөх жилээс 10-20 мянган төгрөгөөр өссөн талаар жолоочид учирлаж байлаа. Учир нь өмнө жил суудлын машины өвлийн дугуй хамгийн хямддаа 25 мянган төгрөг байсан бол, дээд үнэ нь 1.2 сая төгрөгөөр борлуулагдаж байв.

-ТЭЭВРИЙН ЗАРДАЛ 2500 АМ.ДОЛЛАР БАЙСАН БОЛ 2700 АМ.ДОЛЛАР БОЛЖ ӨССӨН-

     Автомашины өвлийн дугуйны үнэ өссөн талаар суудлын автомашины өвлийн дугуй худалдаж байсан хижээл насны эр “Манайх дугуйгаа Япон, Солонгос Улсаас татдаг. Тэгээд тээвэрлэлтийн үнэ өссөнөөс хамаараад үнэ нь "жаахан” өссөн. Тяньжины тээврийн зардал их өссөн. Гэсэн ч бид ганц, хоёр мянган төгрөг нэмэхээс, тав, 10 мянгаар нь нэмээгүй. Ямар ч худалдаачид бараа таталт, тээврийн зардал өссөн гээд барааныхаа үнийг үсрээд л 1000 төгрөгөөр нэмэгдүүлэхээс хэтрэхгүй. Одоо уг нь ид сезоны үе. Гэхдээ худалдан авагчид муу байна. Хуучин бол манай захад хүмүүс жилийн энэ цагт бужигнаж байдаг байлаа. Одоо харин нам гүм байна. Нэг өдөрт тоотой хэдэн жолооч үнэ асуухаас өөр зүйлгүй байж байна даа” гэж ярив.

      Худалдагчийн хэлж шиг "Өгөөмөр" захын хөл хөдөлгөөн нам гүм байх бөгөөд худалдагчид өөр өөрсдийн агуулгын үүдэнд өнөө хэдэн дугуйгаа нааш цааш өнхрүүлэх дүр зураг л үзэгдэхээс өөрөөр сонирхол татах зүйл ховор гэж хэлж болно. Дугуйны үнийн талаар худалдаа эрхлэгч Г.Энхбаяр “Тээврийн зардал 2500 ам.доллар байсан бол одоо 2700 ам.доллар болсон. Тээврийн зардал өссөнтэй холбоотойгоор өвлийн дугуйны үнэ хамгийн багадаа 5000 төгрөгөөр өссөн. Тэр дундаа 95,65,15 гэхэд дугуйныхаа хээнээс хамаараад 50 мянган төгрөгөөс эхэлж байна. Бидний нөхцөл байдлыг ойлгохгүй жолооч нар “Ямар үнэтэй юм бэ” гэж бухимддаг. Тээврийн зардал өсөөд байхад хуучин үнээр зарах юм бол бидэнд ямар ч ашиггүй болж дампуурах дээрээ тулна. Тээврийн зардлын үнэ буусан цагт л дугуйны үнэ бууна” гэхчлэн тус захын худалдаа эрхлэгчид үнэ өсөж байгаа шалтгааныг тээврийн зардалтай холбон тайлбарлаж байлаа.

-АРАЙ ХЯМД ГЭЭД ЯПОН БОЛОН ХЯТАД УЛСААС ОРЖ ИРСЭН ДУГУЙНААС ХУДАЛДАА ХИЙСЭН-

Автомашины өвлийн дугуйны үнэ нэмэгдсэн талаар жолооч Н.Жамбалням “Угаасаа өвлийн дугуй, бензин маслоны үнэ жил бүр нэмэгддэг. Энэ жил бүр 10-20  мянгаар нэмэгдсэн байна. Арга мухардаад арай хямд гээд Япон болон  Хятад Улсаас оруулж ирэх дугуйнаас худалдаа хийсэн.  Хүйтрэх тусам үнэ нь өснө үү гэхээс буурахгүй. Үнэ нь тэнгэрт хадсан эөвлийн дугуйг авч чадах чадалтай хүмүүст бол юу ч биш. Харин ядарсан жолооч нарт ихээхэн дарамт болдог. Би “Приус -20” загварын автомашинтай. Миний машины 195 хэмжээтэй ширхэг дугуй 70-75 мянгаар худалдаалж байна. Үүнийг дөрвөн дугуйгаар бодоход 300 мянган төгрөг болно. Харин Япон болон Хятадаас орж ирсэн нь 50 мянгаас эхэлж байна. Хамгийн гол нь чанар. Гэхдээ үнийг нь дийлэхгүйн учраас л аль үнэ хямд, чанар муутайг нь авахаас өөр аргагүй болж байна" хэмээн учирласан юм.

     "Өгөөмөр" техник захад автомашины өвлийн дугуйнаас гадна тос, масло сонирхохоор ирэх хүн олон. Энэ жил ч мөн тос, маслоны үнэ тээврийн зардлаас хамаарч өссөнийг худалдагчид онцолж байлаа. Тухайлбал, дизель хөдөлгүүртэй моторын тос "Өгөөмөр" захад 40-50 мянган төгрөгийн үнэтэй, бензин хөдөлгүүртэй автомашины тос, масло 25-45 мянган төгрөгөөр худалдаалагдаж байв. Үнийг авч үзвэл өнгөрсөн жилийн мөн үеэс дор хаяж, 1000 төгрөгөөр өссөн байгаа юм. Өнгөрсөн жил дизель хөдөлгүүртэй моторын тос 30-40 мянга, бензин хөдөлгүүртэй моторын тос 20-40 мянган төгрөгийн үнэтэй байсан талаар үнэ асууж, сурагласан жолоочид хэлж байв.

Д.БЯМБАСҮРЭН