“Эрдэнэс Тавантолгой” ХК-ийн Бүрэн эрхэт төлөөлөгч Ж.Ганбат мэдээлэл өглөө.

              Тэрбээр “Эрдэнэс Тавантолгой" ХК-ийн Бүрэн эрхэт төлөөлөгчөөр томилогдсоноос хойш зургаан сарын хугацаанд бид 13 сая тонн нүүрсийг борлуулсан. Энэ хүрээнд бид 800 орчим сая ам.долларыг Монгол Улсдаа бэлэн оруулж ирсэн. Үүнээс энэ оны нэгдүгээр улиралд бид 440 гаруй сая ам.долларыг оруулж ирсэн байна. Эхлээд 7.5 сая ам.долларын нүүрс борлуулаад, үүний үнэлгээ нь 795 сая ам.долларын үнэлгээг хийсэн. Цаашид бид энэ хэвээр ажиллавал сард 2.0-2.5 сая тонн нүүрс борлуулаад байх бүрэн бололцоотой гэдгийг өнгөрсөн зургаан сарын хугацаанд харууллаа.Тиймээс үүнийгээ барьж ажиллахыг бодож байна. Бид ихэвчлэн сайн чанарын нүүрсийг ихэвчлэн борлуулж ирсэн. Тэгээд олборлож байгаа бүх бүтээгдэхүүнээ зарж, сорчлох зорилт тавьж байгаа. Энэ хүрээнд биржээр бид 200 орчим мянган тонн эрчим хүчний нүүрсийг борлуулсан. Одоо сул коксжих нүүрсийг борлуулахаар зорьж байгаа. Бид нүүрсээ аль болгох үнэд хүргэх ёстой. Үүний тулд нүүрсээ угааж баяжуулж, зарах ёстой. Энэ хүрээнд угаах үйлдвэрийн төсөл хэрэгжиж байгаа. Энэхүү үйлдвэр гэрээний дагуу 2024 оны долдугаар сард ашиглалтад орно. Харин тээврийн хэрэгслийн хувьд онцгой дэглэм тогтоохоос өмнө өдөрт 200-300 машин л нүүрс тээвэрлэдэг байсан. Бид экспортоо нэмэгдүүлсэн хүрээндээ бол өдөрт тогтмол 800 гаруй, хамгийн оргил үедээ 1100 гаруйн тээврийн хэрэгсэл гарч байгаа. “Эрдэнэс Тавантолгой” ХК-нд 178 гэрээ байсан, үүнээс 133 гэрээ нь ам нөхцөлтэй гэрээ бий. Үүнээс бид энэ оны гуравдугаар сарын 31-ний байдлаар хугацаа нь дууссан гэрээг бүгдийг нь дуусгавар болгосон. Харин хугацаа нь дуусаагүй гэрээг бид биржийн үнээр борлуулсан. “Эрдэнэс Тавантолгой” ХК-ийн 18.4 хувийг 2012 оны дөрөвдүгээр сарын 11-нээс өмнө төрсөн 2.5 сая иргэд эзэмшиж байгаа” гэв.