Түмэнжаргал овогтой Ундармаа миний бие нь 1983 оны арванхоёрдугаар сарын 27-нд Сүхбаатар аймгийн Халзан суманд төрсөн бөгөөд 2002 онд Сүхбаатар аймгийн нэгдүгээр сургуулийг дүүргэж 2006 онд Дорнод аймгийн Дорнод Дээд сургуулийг Бага ангийн багш мэргэжлээр төгссөн. Одоогоор Сүхбаатар аймгийн Баруун Урт сумын тавдугаар багд нөхөр хоёр хүүхдийн хамт амьдардаг. Миний хань Нямсүрэн овогтой Төмөр-Очир нь Сүхбаатар аймгийнОнцгой Байдлын газарт жолоочоор ажилладаг.

        Миний нуруу 2020 оны дөрөвдүгээр сараас өвдөж эхэлсэн бөгөөд энэ мөчөөс эхлэн эмнэлгээр удаа дараа явж шинжилгээ оношилгоо хийлгүүлсний эцэст нуруу нугасны хавдар гэсэн оноштой гарч тухайн оны есдүгээр сард П.Н.Шастины нэрэмжит Улсын гуравдугаар төв эмнэлэгт нуруу нугасны хавдрын онош болон зэргийг тогтоох хагалгаанд орж хоёр хөл дээрээ босож, чадахгүй суумгай болсон. Уг хагалгаагаар нуруу нугасны хорт хавдрын хоёрдугаар зэрэгт орсон гэсэн онош батлагдаж Хавдар Судлалын Үндэсний Төв Эмнэлэгт Туяа эмчилгээний тасаг руу шилжиж, 25 удаагийн туяа эмчилгээ, найман удаагийн химийн эмчилгээ, бай эмчилгээнд зургаан удаа орсон.

      Энэ хугацаанд зургаан сар тутамд MRI болон нарийвчилсан шинжилгээнд хамрагдсан боловч хавдрын хэмжээ томорсон гэсэн хариуг авсан. Эмч нар минь намайг Монголд эмчлэгдэх боломжгүй гэсэн. Ингээд бид БНСУ-ын хэд хэдэн эмнэлэг рүү хүсэлт явуулахад Солонгос улсын СӨҮЛ Их сургуулийн эмнэлгээс дахин нарийн шинжилгээнүүд хийж, оношийг баталгаажуулж эмчилгээнд оруулах боломжтой гэсэн нааштай хариу ирсэн боловч эмчилгээний эхний удаагийн зардал нь Монгол төгрөгөөр 200.000.000-250.000.000 болно гэсэн. Бид ах дүү хамаатан саднаараа нийлээд ч энэ төсвийг бүрэлдүүлэх хүч хүрэхгүй байгаа болохоор аргагүй байдалд орж, та бүхнээсээ сэтгэлийн өглөг өргөж тус болно уу хэмээн хичээнгүйлэн хүсэж байна.

Буянт та бүхний зам мөр нарны гэрлээр ивээгдэж буцаад түм бум болон үржиж Монгол түмнээрээ энх амгалан, эрүүл аюулгүй амьдрах болтугай!

Би эрүүл болж эргэж ирээд эх орныхоо олон бяцхан үрсийг эрдмийн мөрд хөтөлнөө гэдэгтээ бүрэн дүүрэн итгэлтэй байна. Гялайлаа.