Барилга, хот байгуулалтын яамнаас Газрын багц хуулийн шинэчилсэн найруулгын төслийг танилцууллаа.

    Энэ үеэр тус яамны Газар зохион байгуулалтын газрын дарга А.Энхманлай “Газрын тухай багц хуулийн төслийг Засгийн газраас өнгөрсөн гуравдугаар сард УИХ-д өргөн барьсан. Тус хууль нь 2002 онд батлагдсан. Энэ хугацаанд энэ хуульд 32 удаагийн бусад хууль шинээр батлагдсантай холбоотойгоор өөрчлөлт гарсан. Өөрчлөлт гарсантай холбоотойгоор Хууль зүй, дотоод хэргийн яамнаас шинжилгээ хийж үзэхэд, 61 хийдэл, давхардал, зөрчил илэрсэн. Өөрөөр хэлбэл, энэ хуулиас гадна 60 гаруй хууль, 200 гаруй эрхзүйн актаар газрын харилцаатай холбоотой асуудлыг давхар шийдвэрлэж байгаа нь ийн зөрчил гаргах үндэс болжээ. Үүнээс үүдэн Газрын тухай хууль иргэн, олон нийтийн дунд ойлгомжгүй байдал бий болгож, нийгэмд сөрөг үр дагавар үүсэж байна. Иймээс Газрын тухай хуулийг шинэчлэх болсон. Мөн нийгмийн хөгжлийн явцад 20 жилийн өмнөх хууль шинэ нийгмийн үеийн шинэлэг зохицуулалт, харилцааг зохицуулах боломж нөхцөлийг хангахгүй гэх нөхцөл ч үүссэн. Энэ удаагийн шинэчилсэн хуулиар бид  газартай холбоотой олон асуудлыг нэг мөр шийдвэрлэхийг зорьж, давхардал зөрчлийг арилгах, талуудын оролцоог зөв зохион байгуулж хангах эрхзүйн орчныг бүрдүүлэхийг зорьсон. Улсын хэмжээнд 370 гаруй субъект газар олгох, шийдвэр гаргах эрхтэй байгаа. Өөрөөр хэлбэл, бүх шатны Засаг дарга, сайд нар газар олгох эрхтэй. Үүнээс үүдээд газрын харилцаа зохицуулалт мэргэжлийн түвшинд явагдахаа больсон. Иймээс одоогийн шинэчилсэн хуулиар мэргэжлийн байгууллага өөрсдөө тулгамдаж байгаа харилцаагаа бие дааж зохион байгуулах, иргэд болон Засаг дарга нарын саналыг үндэслэсэн, тухайн бүс нутгийн иргэдийн төлөөлөгчдийн хурлаас батлагдсан газар зохион байгуулалтын төлөвлөгөөг үндэслэн мэргэжлийн байгууллага зөвхөн зохион байгуулж, хэрэгжүүлэх ажлыг хийхээр хуульчилж байна. Ингэхдээ хүний оролцоогүйгээр цахим системээр дамжуулж явуулна. Бид энэхүү ажлын бэлтгэл ажлыг хангаж, цахим үйлчилгээ үзүүлэх долоон төрлийн системийг газрын харилцааны удирдах байгууллагад байгуулсан” гэв.