Хэнтий аймгийн Нэгдсэн эмнэлгийн мэс заслын эмч нар 25 настай зургаан сартай жирэмсэн эмэгтэйд мэс ажилбар хийжээ. Тодруулбал, 25 настай зургаан сартай жирэмсэн эмэгтэйн давсагт орсон ерөндөг буюу сприалыг шээсний сүвээр дамжуулан авсан гэх мэдээлэл олон нийтийн сүлжээнд цацагдсан. Энэ талаар Хэнтий аймгийн Мэс заслын зөвлөх, Клиникийн профессор, тэргүүлэх зэргийн эмч Д.Мөнхбатаас тодрууллаа.

     Тэрбээр “Бид зургаан сартай жирэмсэн эмэгтэйн давсгаас ерөндөг буюу сприалыг шээсний сүвээр нь дамжуулж, уян дурангийн аргаар авсан. Түүний умайн хөндийд суулгасан ерөндөг нимгэн хальсыг нь цоолж, давсаг руу орж чулуужсан байсан. Давсагт гаднын биет орж удсан тохиолдолд шээсний талст чулуужилт үүсгэдэг. Тус хагалгааг манай эмнэлгийн хамт олон өнгөрсөн жил хийсэн. Одоо эх, нярайн биеийн байдал хэвийн байгаа. Харин өчигдөр Мэс заслын тасгийнхан 1992 онд цөсний хүүдийгээ авхуулсан 65 настай иргэний цөсний ерөнхий сувгаас чулуу түүж, наалдцыг нь салгаж, 12 хуруу гэдэстэй залгах мэс засал хийсэн. Энэ мэс засал сүүлийн үед хийсэн манай эмч нарын том хагалгаануудын нэг” гэлээ.