Хамаг бүхэн үймэрч, дахин давташгүй том сургамж авсан хүнд нэг өдөр өнгөрөв. Үндсэндээ хоёр өдөр дамнасан шүүх хурлын шийдвэр эцэслэж, нэгэн цагт Монголынхоо тугийг дэлхийн тавцанд мандуулж зогссон, тамирчин хамгийн сайн найзаа зодож, хөнөөсөн хэргээр шүүхээс 16 жилийн ял сонслоо.

  Шүүхийн танхимд тэрбээр гэмшиж байгаагаа нулимстай өгүүлэхэд, хүмүүс түүнийг даган өмөрч, уйлсан. Харин хэсэг уйлсны дараа тэр "Найзынхаа аминд хүрнэ гэж үнэхээр бодоогүй. Өмгөөлөгчийн минь хэлсний дагуу шийдэж өгөөч гэж хүсэж байна" гэсэн нь даанч уй төрүүлэм байв. Эр хүн шиг хэргээ хүлээж, хийсэн хэргийнхээ шийтгэлийг үг дуугүй хүлээх зориг, зүрх түүнд даанч байсангүй. Хэрэг болсноос хойш албан ёсоор ард түмнээс уучлал гуйж, ам нээгээгүй түүний хэлсэн үг дэндүү амиа бодсон гэхэд хилсдэхгүй болов уу. Үнэндээ түүнээс "Ямар л ял шийтгэл байна, хүлээхэд бэлэн" гэдэг үгийг л хүлээж байлаа. Гэвч тэр уучлалт гуйж, уйлахаас хэтэрсэнгүй. Хүмүүст өрөвдүүлж, "Эвий минь архинаас л боллоо" гэж  халаглуухаас цаашилсангүй. Уур омгоо барьж, өөрийгөө хянах ёстой байтал ямар нэгэн хүчин зүйлээс болж хорлогдлоо, ийм байдалд хүрлээ гэдэг даанч болхи, ичмээр зүйл.

  Гэхдээ хууль хэнийг ч ялгахгүй, хүүхдийн гомдлол шиг үгийг нь сонсдоггүйгээ харуулж түүнд хуулийн дагуу оноох ёстой шийтгэлийг оноолоо. Одоо ерөөс хэлсэндээ хүрч, шүүхээс өгсөн ялыг эр хүн шиг эдлэхээс өөр сонголт түүнд байхгүй. Харин ч хэргээ, хийсэн гэмээ нэр төртэй үүрээд ирэх хэрэгтэй. Алдаан дээр нь дэвсэлж байгаа юм биш, ард түмэн хайрлахын дээдээр хайрлаж, хамаг бүхнээрээ өмөөрсөн болохоор тань энэхүү бичвэрийг бичиж сууна.

  Сумын буйдхан ахуйд ноцолдож, хөлсөө гартал барилдаж, хөөцөлдөн, нэгнээ үүрч, дүүрч, хоолоо хувааж идэж, хувцсаа дундаа өмсөөд бэлтгэлийнхээ байр руу гэгээ татуулан инээмсэглээд, мөрөөдлөө ярин алхаж явсан найзыгаа та нартаас буцаасан. 

    2012 оны олимпд хөлөндөө бэртэлтэй ч барилдаад олимпоос мөнгөн медалийн болзол хангаад буухад, тосож үүрээд алхаж явсан хамгийн ойрын өмөг түшгээ та үгүй хийсэн. Эрхэмээс эрхэм хүүгээ хүний гарт, тэр дундаа өвөртөө орж, унтаж, өндийж босохдоо ч нөхөрлөсөн найзынх нь гарт алдчихаад, зүрхээ зүсэж суугаа аав, ээж хоёрыг нь та битгий мартаарай, алгын чинээ гурван үр нь хорвоог аавгүй туулах болсныг ч тунгаан нэг бодоорой. Ганцхан жишээ л гэхэд, Э.Энхбат начныг сүүлчийн замд нь үдсэн өдрийг та болон Монголчууд санаж байгаа болов уу. Өвлийн тасхийм хүйтэн жавартай өглөө ааваасаа үүрд хагацахдаа гурван балчир үр нь ээжтэйгээ мэгшин уйлж, өмөрч үлдсэн тэр дүр төрх одоо ч хүн бүрийн зүрх сэтгэлд халуунаараа байна.

   Эр хүн нэг алддаг юм л гэнэ. Амины үнэтэй алдаа гэж хаана байх билээ. Ийм алдааг эр хүн нэг алдлаа гэхгүй. Энэ бол харин ч үүрэх ял, шийтгэлээ хүлээж, эцсээ хүртэл эр хүн шиг, нөхөрлөсөн нөхөрлөлдөө үнэнчээр байж туулах зам шүү. Эцсийнхээ амьсгалыг хураах хүртлээ таны найз Э.Энхбат начин, ард түмний хайртай эгэл даруу нэгэн аавын хүү нөхөрлөлдөө үнэнч байж чадсан. Магад таныг ч уучлаад явсан байх. 

    Өнгөрсөн өдөр хоногуудад та цагдан хорих 461-р ангийн умгар өрөөнд найзтайгаа анхлан танилцсан үе, инээж, уйлж явсан цаг мөчөө нэхэн санаж,хэн хүнээс илүү дурссан болов уу. Таныг барилдахад захыг нь мушгиж, та түүнийг барилдахад захыг нь мушгиж хүлээдэг амь нэг,  амжилт, ололт, гунигаа тэнцүү хуваадаг найзууд явснаа эргэн бодож, гэмшиж суусан байх. Найзыгаа дурсаж, үгүйлж, хоосорч, дутаж, ганцаардсан ч байх. Үнэхээр бодож, үнэхээр гэмшиж байгаа бол шийтгэлээ хүлээсэн шиг хүлээх хэрэгтэй.

  Тэр л таны найздаа, түүний гэр бүлийнхэнд нь, энхрий үрсийнх нь өмнө бага ч болов гэмээ цайруулах хэрэг болов уу. "Найзынхаа гэр бүлд насаараа дэм тустай явна" гэж та ч амлаж, таны өмгөөлөгч ч хэдэнтээ дурдсан. Гэхдээ хэчнээн тус дэм, хөрөнгө мөнгө өглөө ч хайртай аав, халамжит хань, эрхэм хүүг нь орлохгүй шүү дээ. Тэгэхээр хийсэн хэргээ эрс шударгаар үүрч, эдлэх ялаа эр хүн шиг эдэлж, туулах ёстой бүхнээ туулаад гараад ирээрэй гэж хүсэж байна.