ЗУЛ: Хөл бөмбөгийн "од" тэнгэрийн од боллоо

Д. Бямбасүрэн:
Монголчуудын амьдрал- Мэдээ мэдээлэл

2021-12-16, 1317

Бидний дундаас дахин нэг од харвалаа. Түүнийг од гэхийн учир тэр бол хөл бөмбөгийн гайхамшгийг бидэнд мэдрүүлсэн ганц хүн. Түүний тайлбаргүйгээр хөл бөмбөг үзэх амтгүй. “Үүнийг л гайхамшиг гэхгүй юм бол. Өөр юуг гайхамшиг гэх юм бэ” гэсэн түүний хамгийн супер эшлэлгүйгээр эл спортын гайхамшгийг мэдрэх аргагүй. Тэр бол хөл бөмбөгийг эд, эсээрээ мэдэрч, сэтгэл зүрхээрээ огшиж тайлбарладаг. Тэр хөл бөмбөгийг ахуй орчноос тасарч, түүний гүнд нь автаж мэдэрдэг, түүний амьдралын баяр, гуниг, ололт, амжилт, ухаарал, сэхээрэл цөм хөл бөмбөгийн ногоон дэвжээнд өнгөрч, тэр хөл бөмбөгөөр хорвоог хардаг нэгэн байсан. Тэрээр өөрийнхөө тухай:

-Сэлэнгийн хөвөөнд эмээтэйгээ өссөн

Сэлэхийг нь биш орилохыг нь сурсан

Балжинням тайлбарлалаа үзэгчид ээ... гэж өөрийгөө зарлаж эхлээд, яг энэ эрчээрээ хөлбөмбөгийн тоглолтыг тайлбарласаар дуусдаг юм. Тэгээд л,

Эрээн асрын өмнө зодог өмсөн дэвсэж

Эртэй, бяртай бөхчүүдтэй мөр зэрэгцэж яваагүй ч

Үе тэнгийн нөхөдтэйгээ шороон талбайд тоглож

Өвдөг, тохой хоёроо шалбалж явсан удаатай

Би хөл бөмбөгийн фанат аа...

гэж өөрийгөө хэдийнэ тодорхойлоод хэлчихсэн тэр.

Тэр ингэж л итгэж, дурласан зүйлийнхээ ирмэг нь байсан, цохилох зүрх нь байсан. Хамгийн том бамбар нь байсан. Телевизийн буйдхан өрөөнд шууд дамжуулалт хийхдээ тэр дэлхийгээс том оршиж, хамгийн жаргалтай нэгэн болдог байлаа. Хэнийг хэлээд байгааг уншигч та хэдийн мэдсэн байх. Дээрх эхлэл маань цөм өнгөрсөн цаг дээр бичигдсэн шиг түүний нэрийг ч мөн энэ удаад өнгөрсөн цаг дээр бичих нь. Тэр бол Монголын хөл бөмбөгийн шилдэг тайлбарлагч Э.Балжинням агсан байлаа.

Өнөөдөр Монголын олон хөл бөмбөгийн тамирчид, хөл бөмбөгт хайртай, сонирхолтой хүмүүс цөм түүнийг үгүйлж, хоосорч суугаа. Тэдний тэн хагасыг, бүр бүгдийн ч байж магадгүй тэр л энэ салбарт хөтөлсөн, оруулсан, дурлуулсан. Кино шиг яриа, ид шидийн гэмээр үгсэд хэн чих тавихгүй байх билээ. Цөм л “Энэ чинь юу болж байна вэ. Энэ юу яриад байна вэ” гэж түүнийг сонсоно. Ингэж л тэр дэлхийн хөл бөмбөгийг Монголын сонорт хүргэж, монголчуудыг хөл бөмбөг үзээд, огшиж, уйлах хэмжээнд хүргэсэн юм. “Арьсан бөмбөг өшиглөөд” гэж хэнд ч хэрэггүй юм хийж байгаа мэтээр ярьдаг хүмүүст "Тэр хөл бөмбөг гэдэг чинь гайхамшиг юм, эд ингэж тоглодог юм" гэдгийг өөрийн тайлбараар тэр үлдээж, спорт гэдэг чинь хэзээд үргэлжлэх хүч хөдөлмөр, хөлс, хүч гэдгийг мөн л тэр дахин давтагдашгүй тайлбараараа бидэнд үлдээсэн юм. Түүний тайлбарыг сонсож, урам зориг авсан тамирчин хэд бол.

Тэр “Хөл бөмбөгийн бурхан тэнгэр гомдоно биз дээ” гэж тайлбар дундуураа хэдэнтээ хэлдэг. Тэгвэл тэр өөрөө хөл бөмбөгийн бурхан тэнгэр болж, бидний дунд ирээд, буцлаа. Хөл бөмбөгийн "од" тэнгэрийн од боллоо. Энэ мөчөөс эхлэн бид түүнийг зөвхөн дурсана. Эцэст бүх зүйлийг дурсаад үлддэг жамаар түүнийг дурсаж, хэчнээн том тайлбарлагч байсныг нь санаж, их спортын ертөнцөд эргэж төрөхийг ерөөнө. Ерөөл, хүсэл хоёрын давхцал дунд тэр одоо буцаж яваа. Түүний дотор мянга мянган хөл бөмбөгчний итгэл, зүтгэл, их тоглолтууд оршиж, түүгээрээ тэр дүүрэн буцаж яваа.

Ингээд түүний хэлдгээр хөл бөмбөгийн гайхамшиг мөнхөд үргэлжилж, түүн шиг нэгэн бидний дунд гарч ирэхэд цаг хугацаа хүрэхгүй ч байж магад. Гэхдээ түүний үлдээсэн бүхэн бидний сэтгэлд цаг хугацаатай хамт үргэлж дурсагдсаар байх болно.

ЗУЛ: Хөл бөмбөгийн "од" тэнгэрийн од боллоо

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.