-МАНАЙХААС ОЛГОСОН БҮХ QR КОДЫГ ХҮЧИНГҮЙ БОЛГОЖ ЖОЛООЧ НАРЫГ ЯВУУЛАХГҮЙ ГЭЭД ХҮНДРЭЛ УЧРУУЛЖ БАЙНА-

Арваннэгдүгээр сард бүх нийтийн хатуу хөл хорио тогтоох үеэр 18  салбарын үйл ажиллагааг хэвийн үргэлжлүүлж байсан. Ингэхдээ тухайн байгууллагын ажилчид, түгээлт болон ачаа тээврийн жолооч нар QR код бүхий зөвшөөрлийн бичгийг автомашины цонхондоо нааснаар хөдөлгөөнд оролцох эрх нь үүсэж байсан билээ. Уг ажлыг Шадар сайд, Улсын онцгой комиссын дарга Я.Содбаатарын тушаалаар Монголын авто тээвэрчдийн нэгдсэн холбооны www.teeverzuuch.mn сайт хариуцан хийж байсан аж. 

Гэвч арванхоёрдугаар сарын 23-наас дахин хатуу хөл хорио тавьсан бөгөөд ингэхдээ 15 салбарын үйл ажиллагааг хэвийн үргэлжүүлж байгаа юм. Гэтэл жолооч нар өмнө үүсгэсэн QR кодоор хөдөлгөөнд оролцох боломжгүй болжээ. Учир нь НОК-ын дарга Д.Сумъяабазар захирамж гаргаж www.smartcar.mn  сайтаас дахин шинэ QR код үүсгэж хөдөлгөөнд оролцох ёстой гэжээ. Үүнээс болж иргэд, жолооч нарт хүндрэл үүсээд байгаа аж. 

Энэ талаар Монголын авто тээвэрчдийн нэгдсэн холбооны Тээврийн мэргэжилтэн М.Мөнхтулгаас тодрууллаа. 

-Танай байгууллагаас олгож байсан QR кодоор жолооч нарыг явуулахгүй байгаа юм байна. Ямар асуудал үүсээд байна вэ?

-Арваннэгдүгээр сарын хөл хорионы үеэр нэн шаардлагатай бараа бүтээгдэхүүнийг улс орон даяар түгээх зорилгоор ачаа бараа тээвэрлэх жолооч нарт www.teeverzuuch.mn сайтаар дамжуулж зөвшөөрөл олгоно гэх Шадар сайдын найман хуудас бүхий тушаал гарсан. Гэтэл хэрэгжүүлж эхлээд нэг хоногийн дараа Нийслэлийн онцгой комиссын дарга Д.Сумъяабазар жижиг тээврийн хэрэгсэлд www.smartcar.mn  сайтаар дамжуулж QR код олгоно гэсэн захирамж гаргасан. Тухайн үедээ манайх түгээлтээ хариуцаад, тэднийх жижиг тээврийн хэрэгсэлдээ QR код олгоод явахаар болсон. 

Гэтэл дахиад хатуу хөл хорио тогтоох үеэр  Нийслэлийн онцгой комиссоос www.teeverzuuch.mn сайтаар QR код олгохгүй гэсэн байна. Ингээд манайхаас  QR код авчихсан байгаа жолооч нар явж чадахгүй нөхцөл байдалтай байна. 

Арванхоёрдугаар сарын эхээр Зам, тээврийн хөгжлийн яам, Хүнс хөдөө аж ахуй, хөнгөн үйлдвэрийн яамдын сайд нарын хамтарсан тушаалаар өвс тэжээл болон нэн шаардлагатай бүтээгдэхүүнийг www.teeverzuuch.mn сайтаар дамжуулахаар болсон. 

Гэтэл үүнийг ч явуулахаа больчихсон. Манайхаас олгосон QR кодтой нэг ч машиныг явуулахгүй гээд байна. НОК-оос www.smartcar.mn   сайтаас олгож байгаа шинэчилсэн загвартай QR кодоор явуулна гээд бүх цагдаа нарт үүрэг өгчихсөн. Улсын онцгой комиссын шийдвэрийг Нийслэлийн онцгой комисс нь дагахгүй байна. 

-QR кодын загварыг шинэчилж байгаа гэсэн мэдээллийг нийсэлээс өгч байсан. Танай үүсгэсэн QR кодонд ямар нэгэн асуудал үүссэн юм биш үү?

-Нийслэлээс гаргасан загвар нь манайхтай төстэй байсан. Тэгээд энэ удаад манайхаас өөрчилж шинэчлээд гаргаж байгаа гэсэн. Манай QR код ямар ч асуудал үүсгээгүй. Арваннэгдүгээр сард хэд хэдэн газарт QR код уншихгүй байх тохиолдол гарсан.  И патрол гээд цагдаагийн систем байдаг юм билээ. Тэр системийг нь дахин шинэчилж байж манай QR кодыг уншуулж байсан. Үүнтэй холбоотойгоор уншихгүй байх тохилдол гарсан. Одоо ямар ч асуудал байхгүй. 

-Танайхаас QR код авсан автомашинуудыг явуулахгүй байгаа гэлээ. Жолооч нарт ямар хүндрэл учруулж байна вэ?

-Жолооч нарыг явуулахгүй гээд гэрчилгээг нь хураан авч байна.  QR кодыг нь хуулж авч байна гэсэн гомдол ирж байна. Иргэд, жолооч нарт үнэхээр том асуудал үүсгэж байна. Зүүн аймаг руу явдаг машинууд QR код уншихгүй байна гээд явж чадахгүй байна. 

Улаанбаатар хот руу орж ирэх гэж байгаа автомашинуудыг зогсоочихсон байгаа. 

-Энэ талаар Тээврийн цагдаагийн алба болон холбогдох албаныхнаас тодруулсан уу. Ямар тайлбартай байна вэ?

-Тээврийн цагдаагийн албанаас тодруулахаар танайх QR кодын загвараа шинэчлээд www.smartcar.mn  сайтын QR кодтой адилхан болгочихож болдоггүй юм уу гэсэн тайлбар өгч байгаа юм. Ингэж болохгүй шүү дээ. Манайх өөр систем. Арга ядсан тайлбар хэлж байна. QR кодын загвар хамаагүй шүү дээ. Яах гэж QR код хэрэглээд байгаа учраа ч ойлгохгүй албан тушаалтнууд их байна. Энэ чинь цагдаа иргэн хоёрыг хооронд нь харилцаа үүсгэхгүй гэж QR код уншуулж мэдээллийг нь аваад явах ажил шүү дээ. 

-Танай QR кодоор явахгүй байгаа бол нийслэлээс бүх автомашинд QR код олгож байгаа гэсэн үг үү?

-Өчигдрөөс эхлээд нийслэлийн  www.smartcar.mn  нь QR код өгөхөө больчихсон байна лээ. Тоо хязгаарлалт тогтоох шаардлага гарсан учраас дахиж өгөхгүй гэсэн хариу өгч байгаа юм. Тэгэхээр түгээлтэд явж байгаа автомашинуудын 30 хувь нь QR код аваад бусад нь явахгүй гэсэн үг. 

-Танайхаас хичнээн машин QR код аваад явж байсан бэ?

-5214 QR код авчихсан тээврийн хэрэгсэл байна. Энэ бүх машинууд зогсчихоод байна. 

- Энэ QR кодыг авахад ямар нэгэн төлбөр төлдөг үү?

-Манай байгууллагаас хэзээ ч мөнгөөр энэ кодыг олгоогүй. Авто тээврийн үндэсний төв, ХХААХҮЯ-тай хамтран ажилладаг. Энэ системийг тээвэрчдийн санхүүжилтээр бий болгосон. Корона гарахаас ч өмнө байсан.  Харин хөл хорио тогтоох үеэр Зам, тээврийн хөгжлийн яаманд хандаад, тэд цааш нь УОК-д танилцуулаад ковидын үед зөв систем байна гэж үзэн цаашид нэвтрүүлье гэж ярилцсан. Гэтэл УОК, НОК хоёр нь уялдаж ажиллаж чадахгүй байна. УОК-ынхоо шийдвэрийг НОК нь дагахгүй байна. 

-Танай QR кодыг ашиглахгүй гэж мэдэгдсэн үү?

-Мэдэгдсэн зүйл ерөөсөө байхгүй. Анхнаасаа www.smartcar.mn  сайтаар дамжуулж олгоно гэсэн бол хамаагүй. Бидэнд явж болно гэж хэлчихээд гадаа гараад жолооч нарыг маань цагдаа нар явуулахгүй байгаа юм. Бид хохирохгүй шүү дээ.  Жолооч, иргэд л хохироод байна. 

-УОК-т энэ талаараа хандсан уу?

-УОК-т хандаж албан бичиг бичсэн. Зам, тээврийн хөгжлийн яамнаас УОК руу мөн албан бичиг явуулсан. Хариу ирээгүй л байна.