Энх цаг ч гэлээ эх орон, төр, ард түмнийхээ өмнө Үндсэн хуулиар хүлээсэн үүргээ нэр төртэйгөөр биелүүлж буй мянга мянган хугацаат цэргийн албан хаагчид Монгол орны дөрвөн зүг найман зовхистод

“...Үнэнч хүчээ тандаа зориулж

Үлгэрийн орныг гардан байгуулж

Үеийн бид нар хоолой нийлүүлэн

Үдшийн зугаалганд дуугаа өргөе өө...” хэмээн дуулж, оройн тоонд жагсаж байгаа. Өдөр хоног 365 дахин улирч, навчис унасан намар, жавар тачигнасан өвөл, шуурга исгэрсэн хавар, нар шарсан зун... Эргэх дөрвөн улиралд эр хүний дотор юу эс бодогдох. Эргэлт.мн мэдээллийн сайт Батлан хамгаалах яам, Зэвсэгт хүчний жанжин штабтай хамтран “Цэргийн захидал” булангаа эхлүүлж байна. Эх орныхоо халдашгүй дархан байдлын төлөө амь, бие үл хайрлан тэмцэх андгай тангарагтай эгэл цэргийн захидлуудыг уншигч та долоо хоног бүрийн Лхагва гарагт Эргэлт.мн мэдээллийн сайтаас хүлээн авч үзээрэй.

ДЭД ТҮРҮҮЧ З.ОТГОНЖАРГАЛ: Хүү нь тантайгаа уулзахыг дэндүү их хүсэж байна, ааваа

          Сайн байна уу, хайрт аав минь. Таньдаа зориулж бичиж байгаа эхний бөгөөд сүүлийн захидал минь энэ. Хайрт аав минь надад таньтайгаа хамт байсан мөчөөс хамт байгаагүй цаг хугацаа илүү их санагдаж байна. Таньтай хамт байсан бага балчир насны тоотой хэдхэн дурсамж л санаанд орж ирдэг. Одоо өнгөрсөн цаг үерүүгээ эргэн нэг харахад их зүйл өөрчлөгджээ. Яагаад ч юм би танд зүгээр л гомддог. Учрыг нь бодож байгаагүй л дээ. Гэхдээ л би танд гомддог. Магадгүй жаахан хүүхэд байхад минь орхиод явсан болохоор тэр байх. Бага байхдаа айлын хүүхэд шоглочихоод аавд нь зэмлүүлж зогсохдоо, харанхуй шөнө гэрэлгүй гудамжаар ганцаараа алхаж байхдаа таныг их үгүйлдэг байж билээ.  

         Одоо таны орхиод явсан тэр балчир хүүхэд том эр болсон. Ардын армид, дэд түрүүч цолтой дэвхийсэн цэрэг болсон. Таны толгойд байх тэр жаахан хүүхэд одоо амьдралд таарсан саад тотгорыг туулж чадахаар зоригтой болсон шүү, хайрт аав минь. 

       Та мэдэх үү. Харанхуй шөнө согтуу хүн хаалга тогшиход эгч минь айчих вий гэж өөрийн эрхгүй санаа зовж, шөнөжин хажууд нь сэрүүн суудаг байсан. Хичээл нь оройтож тарах бүрд сургуль дээр нь очиж, хүлээдэг байсан. Гэхдээ одоо хүү нь танд гомдохоо больсон ааваа. Жаахан байх үед минь та орхиж яваагүй байсан бол би одоогийнх шиг тэсвэр хатуужил, сэтгэлийн тэнхээтэй болж чадахгүй байсан биз. 

     Одоо таны орхиод явсан тэр балчир хүүхэд том эр болсон. Ардын армид, дэд түрүүч цолтой дэвхийсэн цэрэг болсон. Таны толгойд байх тэр жаахан хүүхэд одоо амьдралд таарсан саад тотгорыг туулж чадахаар зоригтой болсон шүү, хайрт аав минь. Урьд нь таньд гомдож, туньж явсан тэр жаахан хүү таныгаа уучилсан ааваа. Хүү нь одоо тантайгаа уулзахыг дэндүү их хүсэж байна, ааваа. Орчлон хорвоод голомтыг тань залгах ганц хүүгээ ямар эр хүн болсон бэ гэдгийг хараасай гэж хүсэж байна. Хүү нь зүгээр л таныгаа дэндүү их санаж байна. Ааваа.

Тандаа хайртай шүү, ааваа

Таны хүү: Цэргийн гавьяаны улаан тугийн болон Байлдааны гавьяаны одонт Хурандаа генерал Жамсрангийн Ёндонгийн нэрэмжит Улаанбаатар цэргийн хүрээний Ёс журам сахиулах Зэвсэгт Хүчний 032 дугаар ангийн Харуул Үйлчилгээний Тусгай рот, хоёрдугаар салаа, хоёрдугаар тасгийн захирагч Дэд түрүүч З.Отгонжаргалаас