БНХАУ-ын Өвөр Монголын Өөртөө Засах Орны Ордос хотноо долдугаар сарын 9–12-ны өдрүүдэд болсон хөнгөн атлетикийн  23 хүртэлх насны  залуучуудын Азийн аварга шалгаруулах анхдугаар тэмцээн амжилттай зохион байгуулагдлаа. Тус тэмцээнд Азийн 27 орны 560 гаруй шилдэг тамирчин оролцож, хурд хүч, ур чадвараа сорин өрсөлдсөн бөгөөд нийт 14 улс медаль хүртсэн юм. МУБИС-ийн Биеийн тамирын сургуулийн оюутан тамирчид Монгол Улсын шигшээ багийн бүрэлдэхүүнд багтаж эх орноо төлөөлөн амжилттай оролцов. Б. Сувд-Эрдэнэ  уртын харайлт, Хонгорзул 800 м, 1500 м-ийн гүйлтэд,  Ц. Мөнххэрлэн 200 м, 400 м-ийн зайд,  Д. Отгон-Эрдэнэ 100 м, 200 м-ийн зайн гүйлтэд өрсөлдлөө.

    Тэмцээний үеэр МУБИС-ийн тамирчин, спортын мастер Цоодлын Мөнххэрлэн 200 метрийн урьдчилсан шатанд 24.52 секундийн амжилтаар финалд шалгарч, энэхүү амжилтаараа Монгол Улсын эмэгтэйчүүдийн 200 метрийн улсын дээд амжилтыг шинэчлэн тогтоосон юм. Мөн 400 метрийн төрөлд 54.97 секундийн амжилт үзүүлснээр Монгол Улсын насанд хүрэгчдийн болон “U23” насны улсын дээд амжилтыг шинэчилж, Олон улсын хэмжээний спортын мастер (ОУХМ)-ын болзол хангасан юм. Ийнхүү Ц. Мөнххэрлэн нэг тэмцээний хүрээнд 200 болон 400 метрийн хоёр төрөлд улсын дээд амжилтыг шинэчилсэн нь Монголын ойрын зайн гүйлтийн хөгжлийн томоохон амжилтын нэг болж байна.