Яг одоо Нью-Йорк хотын "Barclays Center"-т NBA-ын драфтын хоёрдугаар тойргийн сонголт үргэлжилж байна. Лос Анжелес Лэйкерс, Милуоки Бакс, Орландо Мэжик, Даллас Маверикс, Мемфис Гриззлис таван багийн бэлтгэлд уригдаж, өөрийгөө сорьсон Ш.Энхийн-Одыг монголчууд амьсгаа даран хүлээж байна. Тайлбарлагч, судлаачид эхний тойргоор сонгогдох боломж бага байсан юм. Тэгвэл маргааш болох драфтын 2-р тойргоор сонгогдох магадлал өндөр байна.

        Тухайлбал, Ш.Энхийн-Одыг бэлтгэлдээ дуудсан таван багаас гурав нь 2-р тойргоор сонголт хийнэ. Тиймээс боломж бий гэлцэж буй. Тэр зургаан настайгаас сагсан бөмбөг тоглож эхэлсэн. УАШТ-д найман удаа түрүүлж, дөрвөн мөнгө, нэг хүрэл медаль хүртэж, долоо удаагийн шилдэг тоглогчоор шалгарч байлаа.  Мөн ESPN-ээс нэрлэдэг ахлах сургуулийн шилдэг 100 тоглогчийн нэгээр нэрлэгдсэн. Сан Франциско Донс багт тоглож байна. Үүгээр ч зогсохгүй I дивизионы спортын тэтгэлэг хүртсэн Монгол Улсын анхны тамирчин болсон билээ.

      Түүнийг гурван үе дамжсан сагсан бөмбөгч гэдгээр нь монголчууд андахгүй. Түүний аав Ц.Шаравжамц Монголын анхны мэргэжлийн тамирчин. Бүр “Harlem Globetrotters”-ын анхны Ази тоглогч. Ш.Энхийн-Одын өвөө Цэрэнжанхар гуай Монголын сагсан бөмбөгийн шигшээ багт тоглож байсан анхны шилдэг тамирчдын нэг.

     Өмнөд Каролинагийн спортын нэвтэрхий толь гэж нэрлэгддэг сэтгүүлч John Whittle Ш. Энхийн-Одын талаар нийтлэлдээ "South Carolina-н төгсөх курсийн оюутан Майк Шаравжамц гээд залууг зан араншины хувьд яг таг тодорхойлоход жаахан төвөгтэй. Дуу цөөтэй атлаа наргианч, хөгжилтэй. Нам гүм, амгалан тайван орчинд байх дуртай боловч багийнхан нь бүгд түүнийг лидер гэж үнэлдэг. Тэр ийм л тоглогч. Гэхдээ энэ бүх зан чанарын аль нь ч бие биенээ үгүйсгэхгүй. Тэр өөрийнхөө тухай ярихдаа олон таван үггүй цөөн үгээр илэрхийлдэг ч хэлэх гэсэн санаа нь яг голыг нь онож чаддаг нэгэн юм. Майк өөрийнхөө талаар хэлэхдээ: "Би ер нь л дуу цөөтэй талдаа. Өдөр бүр үргэлж талархаж амьдрахыг хичээдэг. Ууланд алхаж, байгальд аялах дуртай. Долоо хоног бүр ууланд алхдаг." хэмээн хэлсэн юм. Гэхдээ сагсан бөмбөгийн талбайд гармагцаа л Майк өөрийн тоглолтын чанарыг ахиулж, өсөж хөгжих тал дээр маш нухацтай ханддаг нэгэн. Багийн дасгалжуулагч Paris түүний талаар хэлэхдээ: "Түүний зан араншин манай багийн залуустай гайхалтай зохицож байгаа. Майк хэдий дуу цөөтэй ч гэлээ талбай дээр болон талбайн гадна багийнхантайгаа маш нээлттэй ярилцаж чаддаг нэгэн. Тэр сагсан бөмбөгт маш нухацтай, чин сэтгэлээсээ ханддаг атлаа үүний зэрэгцээ маш хөгжилтэй, наргианч залуу." хэмээн тодорхойлон хэлж байна. Майк бол дуу цөөтэй, маш даруухан хүү гэдэг нь эргэлзээгүй боловч үүнээс илүү эргэлзээгүй нэгэн зүйл бол түүнийг South Carolina-н сагсан бөмбөгийн хөтөлбөрт маш том, үнэ цэнэтэйгээр ул мөрөө үлдээхэд нь багт нь түүн шиг тоглогч амин чухал хэрэгцээтэй байгаа явдал юм” гэсэн байдаг. Үүнээс түүнийг хэр хэмжээний тоглогч гэдэг нь харагдаж байгаа байх.

Ш.МӨНХИЙН-ОД: МИНИЙ ДҮҮ ЭНХИЙН-ОД ЮУ ХИЙХЭЭ ХАМГИЙН САЙН МЭДДЭГ ТАМИРЧИН

         Дүү минь зургаан настай байхдаа л өөрөө спортыг  сонгож байсан. Тэгэхээр тэр үеэс л дүү минь спортоор хүмүүжиж ирсэн дээ. Аав нэг удаа “Мөнхийн одод сагсан бөмбөг хатуу аргаар заагаад хашраасан. Харин Энкүүлээд ингэж болохгүй юм байна” гээд зөөлөн зааж, байсан гэж ярьж байсан. Бид хоёр гурван насны зөрүүтэй, байнга л хамт байдаг байсан даа. Гадаа гарч тоглосон ч,  ер нь юу ч хийсэн хамтдаа. Энхийн-Одыг манай гэр бүлийнхэн Энкүүлээ гэж дууддаг. Нэг удаа Энкүүлээ алга болоод би өдөржин хайж билээ. Тэгээд олсныхоо дараа эхлээд баярлаж байгаад дараа нь дахин ингэж дураараа загнаж болохгүй шүү гээд зодож байсан. Манай дүү их сахилгагүй, хөдөлгөөнтэй, эрх хүүхэд байсан.  Миний дүү юу хийхээ хамгийн сайн мэддэг тамирчин. Өнөөдрийг хүртэл амжилтынхаа төлөвлөгөөг өөрөө гаргаж, түүнийхээ дагуу бүгдийг хийж байгаа.  Зан аашны хувьд анх танилцаж байгаа хүмүүст дотогшоо, дуугүй санагддаг байх. Харин дотносоод хамт байхаар их хөгжилтэй хүүхэд дээ.  Ахдаа их эрхэлнэ шүү дээ. “Агаа сүүлийн удаа” гээд л өдөрт хэд хэдэн удаа гуйдаг.  Дүү минь сайн явж байвал л ах хүний жаргал тэр шүү дээ.

      Тэр яг одоо түүх бүтээж, NBA-гийн драфтад оролцож байна. Энэ удаа зорьсондоо хүрэхгүй байсан ч чи аль хэдийн монголын сагсан бөмбөгийн түүхэнд шинэ хуудас нээж чадлаа. Бид чамаар бахархаж байна, Майк…