“Baki Cup Championship 2026” уламжлалт гольфын тэмцээн 2026 оны зургадугаар сарын 14-15-ны өдрүүдэд АНУ-ын Чикаго хотноо амжилттай зохион байгуулагдав. Тус тэмцээнд АНУ-д ажиллаж, амьдарч буй монголчууд болон гольфын спортыг сонирхогч 50 гаруй тамирчин оролцож, өрсөлдөөн дүүрэн, нөхөрсөг уур амьсгалд өрнөлөө.

   Элчин сайд Ө.Батбаяр тэмцээнд оролцож, АНУ дахь Монгол иргэдийн санаачилгаар зохион байгуулагдаж буй спорт, соёл, олон нийтийн арга хэмжээг Элчин сайдын яамны зүгээс тогтмол дэмжиж, иргэдийн эв нэгдэл, хамтын ажиллагааг бэхжүүлэхэд онцгой ач холбогдол өгч ажилладгийг тэмдэглэв.

   Энэ жилийн тэмцээн нь цар хүрээгээ улам тэлж, Монгол, Буриад, Панам, Ирланд, БНХАУ, БНСУ, Вьетнам зэрэг улс, бүс нутгаас ирсэн тамирчид оролцсон нь онцлог байв. Энэ нь гольфын спортоор дамжуулан олон улсын нөхөрлөл, соёлын солилцоог бэхжүүлэхэд хувь нэмэр орууллаа.

   Жил бүр уламжлал болгон зохион байгуулдаг “Baki Cup” тэмцээн нь зөвхөн спортын арга хэмжээ төдийгүй АНУ дахь монголчуудын эв нэгдэл, нөхөрлөлийг бэхжүүлэх, эрүүл амьдралын хэв маягийг түгээн дэлгэрүүлэх, гольфын спортыг хөгжүүлэхэд чухал хувь нэмэр оруулдаг онцлогтой юм.