Жүдо бөхийн “Улаанбаатар Гранд слам-2026” тэмцээн зургадугаар сарын 19-21-ний өдрүүдэд манай улсад болох гэж байгаа билээ. Энэ удаагийн их дуулга тэмцээнд 2024 онд олимп, 2025 онд дэлхийн аварга болсон тамирчид оролцохоор мэдүүлэг өгчээ.

    Япон Улсаас 52 кг-ын жинд олимп, дэлхийн аварга Ута Абэ, 60 кг-д Ружу Нагаяама, 66 кг-д Такеши Такеоко, 63 кг-д Харука Кажу, 70 кг-д Шихо Танака, 90 кг-д Санширо Мурао, Азербайжан Улсаас 73 кг-д Хидаяат Хеядаров, -100 кг-д Зелям Гоцоиев, ОХУ-аас 81 кг-д Тимур Арбузов, +100 кг-д Инал Тасоев нар оролцох гэж байна. Харин манай улсаас олимпын мөнгө медальт, дэлхийн аварга Б.Баасанхүү барилдах бололтой.

    Олон улсын жүдо бөхийн холбоо “IJF”-ийн цуврал “Улаанбаатар Гранд слам-2026” тэмцээнд одоогоор 62 орны эрэгтэй 267, эмэгтэй 210, нийт 477 тамирчин оролцох мэдүүлэг өгөөд байгаа юм. Энэхүү их дуулга тэмцээн нь “Лос Анжелес-2028” олимпын эхний оноо олгох тэмцээн гэдгээр дэлхийн улс орнууд ихээхэн ач холбогдол өгч байна.