Азийн шатрын холбооны академийн Монгол дахь салбар Улаанбаатарт үүд хаалгаа нээж буйг тохиолдуулан энэхүү шатрын тойргийн түргэн тоглолтын тэмцээн өчигдөр болов. Тэмцээнд гавьяат тамирчин, Монголын анхны их мастер Б.Хатанбаатар, гавьяат тамирчин, их мастер Ц.Батчулуун, ОХУ-ын их мастер, саяхан болж өнгөрсөн 21 дэх Ази тивийн аваргын хүрэл медальт Цыдыпов Жамсаран, Монгол Улсын 33 дахь аварга, Үндэсний шигшээ багийн тамирчин, ОУМ М.Амилал болон тус академийн шилдэг сурагдын нэг А.Мичид нар өрсөлдлөө.

     Тэмцээний тэргүүн байрт ОХУ-ын их мастер Ази тивийн аваргын хүрэл медальт Ц.Жамсаран, II байрт гавьяат тамирчин, Их мастер Б.Хатанбаатар, III байрт гавьяат тамирчин, Их мастер Ц.Батчулуун орлоо.  “ACFA” буюу Азийн Шатрын холбооны академи нь Дундад Азийн орнуудад үйл ажиллагаа явуулдаг. Монгол Улсад энэ жилээс албан ёсны эрхтэйгээр ажиллаж эхэллээ. Академийн Монгол дахь салбарыг МУГТ, их мастер А.Энхтуул үүсгэн байгуулж, олон улсын туршлагыг эх орондоо нэвтрүүлж байна.

     Тэрбээр хорин нэгэн насандаа Азийн Шатрын холбооны Гадаад харилцааны албанд ажилладаг байсан бөгөөд өдгөө Монгол Улсад Азийн Шатрын холбооны академийн үйл ажиллагааг амжилттай эхлүүлсэнд тус холбооны ерөнхийлөгч Шейх Султан бин Халифа Аль Нахьяан баярын мэндчилгээ дэвшүүлсэн байна.