ОУОХ-ны гишүүн, МҮОХ-ны ерөнхийлөгч Б.Баттүшиг өчигдөр “Мобиком” корпораци ХХК-ийн гүйцэтгэх захирал Ясухиро Очи сантай уулзаж, спортын салбар дахь хамтын ажиллагааны боломж, үндсэн чиглэлүүдийн талаар санал солилцлоо.

    Уулзалтын үеэр талууд 2026 оны есдүгээр сарын 19-нд нээлтээ хийх Япон Улсын Айчи-Нагоя хотын Азийн XX наадамд оролцох Монголын баг, тамирчдыг дэмжих, мөн наадмын үеэр Монгол Улсыг сурталчлах зорилготой “Mongolia House” төслийг хэрэгжүүлэхэд хамтран ажиллах боломжийн талаар ярилцав.

    Мөн “Лос Анжелес 2028” олимпын наадмын бэлтгэл ажлыг эртнээс хангах, ОУОХ-ны чуулган, олон улсын томоохон спортын тэмцээн, наадмыг Монгол Улсад зохион байгуулахад шаардлагатай дэд бүтэц, тэр дундаа орчин үеийн стадион байгуулах чиглэлээр хамтран ажиллах боломжийг судлах талаар санал солилцлоо. Үүнээс гадна гадаадын хөрөнгө оруулалттай компаниудыг спортын хөгжил, олимпын хөдөлгөөнд татан оролцуулах, оролцоог нэмэгдүүлэх шинэ боломжуудыг эрэлхийлэх асуудлыг хөндөн ярив.

   Ясухиро Очи сан нь Японы тэргүүлэх харилцаа холбоо, технологийн компани болох KDDI корпорацид удирдах албан тушаал хашиж байсан туршлагатай бөгөөд өдгөө дижитал санхүүгийн үйлчилгээ, хиймэл оюунд суурилсан ухаалаг туслах зэрэг инновацлаг бүтээгдэхүүнүүдийг хөгжүүлэн ажиллаж байна.

   Эдгээр дэвшилтэт технологийг спортын салбарт нэвтрүүлснээр тамирчдын гүйцэтгэл, бэлтгэл сургуулилтын мэдээллийн нэгдсэн сан бүрдүүлэх, өгөгдөлд суурилсан шийдвэр гаргалтыг хөгжүүлэх, спортын шинжлэх ухааныг дэмжих шинэ боломжууд нээгдэх боломжтой юм.

   Талууд спортын хөгжил, олимпын хөдөлгөөнийг дэмжих, технологи, инноваци болон хөрөнгө оруулалтыг спортын салбарт үр дүнтэй ашиглах чиглэлээр цаашид хамтын ажиллагаагаа өргөжүүлэн ажиллахаар тохиролцов.