Улаанбаатар хотноо 2026 оны зургадугаар сарын 4-5-ны өдрүүдэд зохион байгуулагдах Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” олон улсын 11-р бага хуралд болох билээ. Тус хуралд оролцохоор хүрэлцэн ирсэн БНХАУ-ын Засгийн газрын Солонгосын хойгийн асуудал эрхэлсэн Тусгай төлөөлөгч Лю Шяоминийг, Гадаад харилцааны яамны Төрийн нарийн бичгийн дарга Л.Мөнхтүшиг хүлээн авч уулзав.

   Мөн Холбооны Бүгд Найрамдах Герман Улсын Гадаад хэргийн яамны Ази, Номхон далайн орнуудын газрын дэд захирал бөгөөд Зүүн Ази, Зүүн Өмнөд Ази, Номхон далайн орнуудыг хариуцсан дарга, Элчин сайд Иоахим Бертеле, Швейцарын Холбооны Улсын Гадаад хэргийн яамны Төрийн нарийн бичгийн даргын орлогч бөгөөд Ази, Номхон далайн газрын захирал Маркус Лейтнер, Шведийн Хаант Улсын Гадаад хэргийн яамны Солонгосын хойгийн асуудлаарх Тусгай элч, Элчин сайд Петер Семнеби нарыг тус тус хүлээн авч уулзав.

   Төрийн нарийн бичгийн дарга Л.Мөнхтүшиг 2014 оноос жил бүр уламжлал болгон зохион байгуулагдаж буй “Улаанбаатарын яриа хэлэлцээ” олон улсын бага хуралд оролцож буй төлөөлөгчдөд талархал илэрхийлэв. Монгол Улсын гадаад бодлого, Зүүн хойд Азийн бүс нутаг дахь бодлого, үйл ажиллагаа болон хоёр талын харилцаа, хамтын ажиллагааны талаар санал солилцлоо.

  “Улаанбаатарын яриа хэлэлцээ” олон улсын бага хурлыг Стратеги судалгааны хүрээлэнтэй хамтран зохион байгуулдаг бөгөөд энэ удаагийн бага хуралд 30 улс, олон улсын байгууллага, дотоодын эрдэмтэн судлаач зэрэг нийт 250 төлөөлөгч оролцоно.