Монголын үндэсний бөхийн холбооны тэргүүн Ц.Магалжав, “Миг даатгал” ХХК-ийн гүйцэтгэх захирал С.Ануужин нар Монгол үндэсний бөхөөр хичээллэж буй хүүхэд, залуус болон хүчит бөхчүүдийг гэнэтийн ослын даатгалд хамруулах хамтын ажиллагааг хэрэгжүүлэх зорилгоор хамтран ажиллах “САНАМЖ БИЧИГ” байгууллаа.

     “Миг Даатгал” ХХК нь “Эрсдэлгүй ирээдүй” хөтөлбөрийн хүрээнд 2025 оны арав дугаар сарын 21–24-ний өдрүүдэд Хэнтий аймагт зохион байгуулагдах өсвөр үе, залуучуудын улсын аварга шалгаруулах тэмцээнд оролцох өсвөрийн бөхчүүдийг гэнэтийн ослын даатгалд хамруулан ажиллах бөгөөд төвлөрсөн даатгалын хураамжаас тодорхой хэмжээг Хэнтий аймгийн өсвөр бөхчүүдийн бэлтгэл, сургуулилалтад хандивлахаар шийдвэрлэжээ.

     Мөн  “Миг Даатгал” ХХК нь МҮБХ-ны “Алтан цом”-ын төлөөх багийн барилдаанд “Эв Монгол” багийг бүрдүүлэн оролцох бөгөөд тус багтаа Монгол Улсын аварга П.Бүрэнтөгс, улсын заан Б.Пүрэвсайхан, улсын заан М.Лхагвагэрэл нарыг урьж оролцуулахаар санал гаргаад байгаа юм.