Монголын хөл бөмбөгийн холбоо (МХБХ)-ны Удирдах зөвлөл 2025 оны аравдугаар сарын 8-ны өдөр хуралдаж, байгууллагын үйл ажиллагаатай холбоотой дараах асуудлыг хэлэлцэн шийдвэрлэжээ.  Удирдах зөвлөлийн хурлаар, нэгдүгээрт, Төв аймаг дахь Монголын хөл бөмбөгийн бэлтгэлийн төв буюу “Эйрдом”-ын менежментийг “Монголын хөл бөмбөгийн холбоо” ТББ өөрөө хариуцан авч ажиллах асуудлыг хэлэлцэж, үүнтэй холбогдуулан бэлтгэлийн төвийн менежментийг хариуцаж байсан “Хөл бөмбөгийн бэлтгэлийн төв’’ ТББ-ыг татан буулгаж МХБХ менежментийг хариуцахаар боллоо.

      Хоёрдугаарт, “Эйрдом”-ыг бие даасан хатуу болон шингэн түлшээр ажиллах халаалтын шинэ зуухыг суурьлуулах ажлыг эхлүүлэхээр болов. Учир нь Төв аймаг дахь Монголын хөл бөмбөгийн бэлтгэлийн төв буюу “Эйрдом” нь одоо цахилгаанаар халдаг системтэй байгаа бөгөөд ачааллын үеэр нэг сарын зардал өндөр байгаа нь алдагдалтай ажиллахад хүргэж байна.

    Ийм хатуу болон шингэн түлшээр ажиллах халаалтын шинэ систем ашиглалтад орсноор зардлыг 80-90 хувь буулгахаар болж байгааг Монголын хөл бөмбөгийн холбоо (МХБХ)-ны Удирдах зөвлөлийн хурлаар хэлэлцэн шийдвэрлэлээ.  Төв аймаг дахь Монголын хөл бөмбөгийн бэлтгэлийн төв буюу “Эйрдом” үүргээ сайн гүйцэтгэсээр ирсэн бөгөөд үйл ажиллагааг шинэ түвшинд гаргах зорилгоор ийнхүү зардлыг багасгах шийдвэрийг гаргажээ.