БНСУ-аас Монголд Улсад суугаа Элчин сайдын нэрэмжит "Элчингийн цом 2025" таеквондо-гийн пүмсэ төрлийн аварга шалгаруулах 15 дахь удаагийн тэмцээн болж өндөрлөсөн билээ. Энэ удаагийн тэмцээнд хөдөө орон нутаг болон нийслэлийн 27 багийн 800 тамирчин өрсөлдсөн юм. Тус тэмцээний “А” ангилалд өрсөлдөж зургаа дахь алтан медалиа хүртсэн Үндэсний шигшээ баг, “Эхлэл” клубийн тамирчин О.Энх-Эрдэнэтэй ярилцлаа.

- “Элчингийн цом-2025” пүмсэгийн тэмцээнээс алтан медаль хүртсэнд баяр хүргэе.

       - Баярлалаа.

–Миний дүү өөрийгөө танилцуулахгүй юу?

        -Намайг Отгонбаярын Энх-Эрдэнэ гэдэг.

–Аль аймаг, хотод төрсөн хүүхэд вэ?

        -Би Улаанбаатар хотод төрж, өссөн.

 -Одоо хэдэн настай вэ?

        -Одоо 13 настай.

-Аль сургуулийн хэд дүгээр ангийн сурагч вэ?

      -Жанжин Д.Сүхбаатарын нэрэмжит, нийслэлийн Сүхбаатар дүүргийн ерөнхий боловсроын 2-р дунд сургуульд сурдаг.

-Чухам яагаад таеквондо-гийн спортыг сонгож хичээллэх болсон бэ?

     -Би бага наснаасаа тулааны спорт сонирхдог байсан. Анх боксын спортыг сонирхож, жаахан байх үедээ боксын мишок, бээлий авахуулаад гэртээ бие дааж боксоор хичээллэх гэж оролддог байсан. Боксын сургалт эсвэл клубт суралцах сонирхолтой байна гээд л ээжээсээ гуйсан. Ээж маань “Охин хүүхдэд боксын спорт хүнд, хатуу, ширүүн төрөл” гэдгийг тайлбарлаж тулааны өөр төрлийн спортуудыг судлаад таеквондо-гийн спортыг санал болгосон юм. Тэгээд л “Эхлэл” клубт элсэж, бэлтгэлээ эхэлсэн. Эхний өдрөөс л  таеквондо надад маш их таалагдсан.

-Одоо хэд дэх жилдээ таеквондо-гоор хичээллэж байгаа вэ?

      -Би найман настай байх үедээ анх хичээллэж эхэлсэн. Энэ жил тав дахь жилдээ хичээллэж байна.

 –Анх таэквондо заасан багш нь хэн бэ?

        -Манай “Эхлэл” клубийн У.Ханд болон С.Түмэндэмбэрэл багш нар маань миний анхны багш нар байгаа юм. Одоо ч “Эхлэл” клуб дээрээ хичээллэдэг.

-Таеквондо-гийн спортын ямар зэрэг цолтой тамирчин бэ?

        -Таеквондо-гийн спортын хар бүс, олон улсын II дантай.

 -Таеквондо-гоос өмнө өөр спортын төрлөөр хичээллэж байсан уу?

         -Таеквондо-гоор хичээллэхээс өмнө боксын спортыг сонирхож байсан. Гэхдээ яг боксоор хичээллэж байсан удаагүй.
 –Таеквондо-гоор өөрийнхөө гаргасан амжилтуудыг танилцуулахгүй юу?

    -Таеквондо-гийн спорт нь тулаан буюу “Kyorugi”, “Poomsae” гэсэн хоёр үндсэн төрлөөр тэмцээн, уралдаан зохион байгуулагддаг. Таеквондо-гийн спортоор хичээллэдэг хүүхдүүд аль алиныг нь хослуулан хичээллэж, тэмцээнд ордог. Бидний хувьд нэг жилдээ дотоодын 20 орчим тэмцээн, олон улсын мөн 2-5 тэмцээнд оролцдог юм. 2021- 2025 онуудын зөвхөн Монгол Улсын аварга шалгаруулах тэмцээний амжилт гэвэл тулааны төрлөөр хоёр алт, нэг мөнгө, нэг хүрэл медаль хүртсэн. Харин пүмсэ төрлөөр гурван алт, нэг мөнгөн медаль тус тус хүртээд байгаа. 2025 оны “Шилдэг эмэгтэй тамирчин”-аар шалгарсан. БНСУ-ын Элчин сайдын нэрэмжит тэмцээн, “Эв нэгдэл цом” гэх мэт бусад тэмцээнүүдэд мөн амжилттай оролцож байгаа. Олон улсын тэмцээний хувьд гэвэл 2024 онд дэлхийн аварга шалгаруулах тэмцээн, 2025 онд Азийн аварга шалгаруулах тэмцээнд тус тус өрсөлдсөн.  Манай улсын шигшээ багийн эрэгтэй тамирчид 2025 оны Ази тивийн аварга шалгаруулах тэмцээнээс пүмсэ төрлөөр анхны хүрэл медалийг хүртсэн амжилттайгаар оролцоод ирсэн байгаа.
 -Сэтгэлд тань хоногшин, хамгийн сайхан дурсамж үлдээсэн ямар тэмцээн байсан бэ?
      -Дэлхийн аварга шалгаруулах тэмцээн анх удаа оролцсо. Дэлхийн дэвжээнд эх орон, аавынхаа нэрийг дуудуулах мөч хамгийн сайхан байсан. Намайг өдий зэрэгт хүргэж, өсгөн, хүмүүжүүлсэн аав, ээж, багш нараараа бахархах сэтгэл төрсөн.
-Эмэгтэй багш, дасгалжуулагчтай байхын давуу тал бий юу?

    -Эмэгтэй багштай байхаар илүү нээлттэй харилцааг үүсгэж бэлтгэлээ хийж чаддаг. Манай багш бодол уншаад байгаа юм шиг маш их мэдрэмжтэй, биднийг мэдэрч хичээлээ заадаг. Бас сэтгэлзүйг маш сайн ойлгож мэдэрч, дэмждэг, хүч өгдөг, урам өгдөг.
-Таеквондо-гоос өөр тулааны спортын тэмцээнд ордог уу?

       -Таеквондо-гоос өөр тулааны спортын тэмцээнд одоохондоо орж үзээгүй.
–Таеквондо-гоор хичээллэхийн хамгийн сайхан мэдрэмж нь юунд байдаг вэ?

    -Таеквондо-гийн спорт өөрөө маш гоё хүндлэлийн спорт. Ёс суртахуун, хүмүүжил, зорилготой байхыг сургадаг. Өөрийгөө удирдаж сурахыг заадаг. Багш нар, таеквондо-гийн гэр бүл, хамт олон, найз нөхөдтэй байхын сайхныг мэдрүүлдэг.