Олон улсын олимпын хорооны  “Эв санааны нэгдэл”-ээс “Лос Анжелес 2028” олимпын наадамд оролцох тамирчдад дэмжлэг үзүүлэх, олимпын эрхийн тэмцээнүүдэд оролцох боломжийг нэмэгдүүлэх болон олимпод бэлтгэхэд зориулан тамирчдын тэтгэлэгт хөтөлбөр зарласан билээ.

    МҮОХ нь спорт холбоодоос нэр дэвшүүлсэн тамирчны спортын амжилтыг ОУОХ-нд илгээж улмаар ОУОХ нь тухайн олон улсын спорт холбоодтой хамтран судалж үзсэний үндсэн дээр шийдвэр гарч тамирчин, спортын холбоо болон МҮОХ гэсэн гурвалсан гэрээ байгуулаад байна.

    Өнөөдөр ОУОХ-ны гишүүн, МҮОХ-ны ерөнхийлөгч Б. Баттүшиг, ерөнхий нарийн бичгийн дарга  Э. Бадар- Ууган нар тамирчид болон спорт холбоодын төлөөллийг “Олимпик хаус”-т хүлээж авч уулзан, амжилт хүсэв. “Лос Анжелес 2028” олимпын тэтгэлэгт найман спортын төрлийн 12 тамирчин хамрагдахаар боллоо.

Үүнд:

Чөлөөт бөх- Н. Батбилгүүн, Б. Мөнх-Эрдэнэ, Э. Даваанасан

Жүдо бөх- Л. Энхрийлэн, Л. Анхзаяа

Бокс- Б.Мишээлт, О.Есүгэн

Буудлага- О.Есүгэн

Байт харваа- Б. Урантунгалаг

Таэквондо- Г. Энхбаяр

Дугуй- С. Жамбалжамц

Хүндийг өргөлт- Г.Ануужин

   Олимпын тэтгэлэг нь 2025 оны есдүгээр сарын 1-ний өдрөөс эхлэх ба тамирчин олимпын эрхээ авсан тохиолдолд МҮОХ-ноос баталгаажуулснаар 2028 оны наймдугаар сарын 31-ний өдрийг хүртэл хугацаанд үргэлжлэх боломжтой.

   Тамирчинд олгох сарын тэтгэлэг ОУОХ-ны гэрээний дагуу 750 ам.доллар байх ба дөрвөн сар тутамд 3000 ам.доллар санхүүжилт авна. Дашрамд дурдахад: “Парис 2024” тэтгэлэгт хөтөлбөрт найман спортын төрөлд 15 тамирчин хамрагдсан бөгөөд есөн тамирчин олимпын эрхээ хүртэж, хөтөлбөрийг 60 хувийн амжилттай дүүргэсэн билээ.