Тамирчин хүний амжилт гаргах хүсэл мөрөөдөлд хязгаар гэж үгүй. Холимог тулааны Ази тивийн аварга болон ДАШТ-д оролцох замын зардлаа олохын тулд блокны үйлдвэрт зуны гурван сар ажиллаж байсан 19 настай охин хэдийнэ дэлхийн зэрэглэлийн тамирчин, олны танил нэгэн болжээ. Энэхүү сэтгэлийн хаттай, тэсвэр, тэвчээртэй охиныг Байгалмаагийн Алтанчимэг гэдэг. Их засаг олон улсын их сургуулийн  Аюулгүй байдал эрх зүйн ангийн гуравдугаар курсийн оюутан.

      Б.Алтанчимэг сүүлийн хоёр жилийн хугацаанд  холимог тулаанаар хичээллэж байгаа.  Тэрбээр тулааны спортын сонгож хичээллэх болсон шалтгаанаа “Ер нь бол тулааны спорт хүнийг хүмүүжүүлэн, хөгжүүлдэг. Сэтгэл зүйн хувьд хат суулган, ухаажуулж, амьдралын зорилготой болгодог. Спортоор хичээллэдэг хүн буруу зам руу ордоггүй. Мөн амьдралыг харах өнцөг нь өөрчлөгддөг. Спорт хүнд тэсвэр тэвчээр суулгадаг болохоор баргийн зүйлд, халирч, нугарч, мохож, шантарч бууж өгдөггүй. Би зөв хүн байхын тулд спортын замыг сонгосон.

     Зөв хүн гэдэг нь эрүүл чийрэг биетэй, биеийн болон сэтгэл зүйн хаттай, бусдын хатуу үгийг даадаг. Тэр тусмаа холимог тулааны спорт бол бие хамгаалах амьдралд ойр спорт. Тамирчнаас богино хугацаанд маш хурдтай, зөв шийдвэр гаргах, сийрэг ухаан, оновчтой цохилт хийхийг шаарддаг онцлогтой төрөл. Өрсөлдөгчийн хөдөлгөөний үйлдэл бүхнийг мэдрэх, мэдрэмж, хариу үйлдлийг хурдан, зөв оновчтой гаргах нь ялалт авах үндэс болдог” хэмээн ярьж байлаа.

       “Хүн үнэхээр чинь сэтгэлээсээ хүсэж  байвал боломжгүй зүйл гэж байдаггүй” гэж  холимог тулаанч Д.Батгэрэл хэлсэн байдаг. Түүний тэр үгийг  Алтанчимэг хэлэх дуртай гэсэн. Яг тэр онч үг шиг холимог тулааны тэмцээнд гялалзсан амжилттай оролцож, өөрийгөө сорихыг хүсдэг юм билээ. Тийм ч учраас тэрбээр “Боломжгүй мэт санагдсан зүйлийг боломжтой болгох”-оор тэмцээний зардлаа олохын тулд зуны гурван сар блокны үйлдвэрт ажиллаж байжээ. Тэр ажил хийсэн үе нь олны сонорт хүрч, багагүй шуугианыг тарьсан.  Сайхан сэтгэлтэй Монгол түмний сэтгэлийн тус дэмээр чамлалтгүй хандив цуглаж, тэр хандивын мөнгөөр ДАШТ болон Азийн аварга шалгаруулах тэмцээнд явж, олны итгэлийг алдалгүй медаль хүртсэн юм.

     Б.Алтанчимэгийн тулааны үндсэн суурь нь таеквондо билээ. Тэрбээр  анх 2020 онд Олон улсын таеквондо-гийн Доржпаламын Аюурзана багшийн  “Мөнх хөх сүлд”  клуб дээр бэлтгэл хийж, тулааны спортын гараагаа тавьжээ.  Таеквондо-гийн 2021, 2022, 2024 оны залуучууд болон насанд хүрэгчдийн улсын аваргын тэмцээнд орж улсын аварга болж байсан.

     Түүнээс хойш Шагдрын Ганбаатар багшийнхаа шавь болж  “One Team” клуб дээр холимог тулааны тамирчин болохоор бэлтгэл сургуулилалтаа хийж байгаа. Таеквондогоор тулалдахад зөвхөн хөлийн өшиглөлт мөн гарын шулуун цохилтын техник ашигладаг нь түүнд бүрэн хангалттай санагдаагүй аж. Тэгээд л дөрөв мөчөө ашиглаж тулалдахаас гадна өчиж, боох, өвдөг, тохойгоор цохих, босоо болон хэвтээ барилдааныг хийж сурахыг илүүд үзжээ.  Б.Алтанчимэг тулааны  үед “calf” болон шулуун цохилтыг гол төлөв хийдэг. 2022 оноос хойш ОУХМ Батцогтын Буяндэлгэр багшийнхаа удирдлаган дор “ББ жюү жицү академи”-д жюү жицүгийн бэлтгэл хийж байв. Хэвтээ тулаанаа сайжруулахын тулд жюү жицүгийн бэлтгэлийг хийж байсан гэнэ лээ. Харин 2025 оны холимог тулааны ДАШТ-ий  хагас шигшээ тулаанд Украины Евгения Какамагийн гарыг өчиж, дэлхийн аваргын мөнгөн медалийн болзол хангасан. Удахгүй ДАШТ-ий алтан медалийн төлөө Ангол Улсын тамирчин Надир Виеиратай тулалдахаар шалгарч үлдээд байна.    

    Б.Алтанчимэг 2022, 2023, 2024 оны олон улсын таеквондогийн улсын аварга.  2023 оны муйатай бокс, кикбокс, шүүт боксын залуучууд ангиллын улсын  аварга.  “WBС” муайтай боксын мөнгөн медальтай.  2024 онд холимог тулааны улсын аварга болсон.  Цэргийн гардан тулааны тэмцээний хүрэл медальтай.  2023 оны “Фалконс файтинг” холимог тулааны ялагч.  2024 оны сонирхогчийн холимог тулааны Ази тивийн аварга шалгаруулах тэмцээний хүрэл медальтай. Холимог тулааны 2024 оны залуучуудын ДАШТ-ээс хүрэл медаль хүртсэн. Энэ жил амжилтаа бататгаж, залуучуудын ДАШТ-ий алтан медалийн төлөө тулалдахаар шалгарч үлдээд байна.