Олон улсын олимпын хорооны гүйцэтгэх зөвлөл 2028 онд АНУ-ын Лос Анжелес хотод болох олимпын наадамд хүндийн өргөлтийн төрөлд хоёр шинэ жингийн ангиллыг нэмэхийг баталлаа. Ингэснээр нийтдээ 12 жингийн ангилал (эрэгтэй зургаа, эмэгтэй зургаа) болж, тамирчид медалийн төлөө өрсөлдөнө.

    Гэхдээ тамирчдын нийт тоо өөрчлөгдөхгүй бөгөөд 120 хүндийг өргөгч (60 эрэгтэй, 60 эмэгтэй) оролцож, нэг жингийн ангилалд 10 тамирчин өрсөлдөх юм. Лос Анжелес 2028 олимпын хүндийн өргөлтийн төрлийн тэмцээн 2028 оны  долдугаар сарын 25-29-ний өдрүүдэд явагдана.

   Энэ шийдвэрийг Олон улсын хүндийн өргөлтийн холбоо (IWF) болон ОУОХ-ны тамирчдын комиссын саналын дагуу гаргасан бөгөөд жингийн ангиллыг илүү тэнцвэртэй болгох, тамирчдад үзүүлэх дарамтыг багасгах, эрүүл мэндийн эрсдэлийг бууруулах зорилготой гэлээ.

   Олон улсын хүндийн өргөлтийн холбооны Ерөнхийлөгч Мохаммед Жалуд хэлэхдээ “ОУОХ нь манай холбооны санал, үндэслэлийг хүлээн зөвшөөрсөнд бид их баяртай байна. Лос Анжелесийн олимп тамирчид болон үзэгчдийн аль алинд нь баяр хөөр авчрах, гайхалтай наадам болно гэдэгт би итгэлтэй байна” хэмээн онцоллоо.

Шинэ жингийн ангиллууд:

    2025 оны эцэст “IWF” Лос Анжелес 2028-д өрсөлдөх зургаа, зургаан ангиллыг албан ёсоор зарлана. Түүнээс өмнө дараах шинэ ангиллууд хэрэгжиж эхэлнэ:

Эмэгтэйчүүд: 48 кг, 53 кг, 58 кг, 63 кг, 69 кг, 77 кг, -86 кг, +86 кг

Эрэгтэйчүүд: 60 кг, 65 кг, 71 кг, 79 кг, 88 кг, 94 кг, -110 кг, +110 кг байх юм.

   2025 оны аравдугаар сарын 2-11-ний өдрүүдэд Норвеги Улсын Ферде хотод  дэлхийн аварга шалгаруулах тэмцээнээс эхлэн шинэ жингийн ангиллаар тэмцээн уралдаан явагдах болно.