Монголын үндэсний шигшээ багийн бүрэлдэхүүнд 27 (өвөл, зун, паралимп) спортын төрөлд 60 дасгалжуулагчийн удирдлага дор нийт 254 тамирчин бэлтгэл сургуулилалтаа хангаж, тэмцээн уралдаанд оролцож байна. Энэ оны эхний аравдугаар сарын байдлаар Үндэсний шигшээ багийн тамирчид олон улсын тэмцээн уралдаанаас одоогийн байдлаар 135 медаль (34 алт, 36 мөнгө, 65 хүрэл) хүртээд байгаа юм.

    Насанд хүрэгчдийн дэлхийн аварга шалгаруулах тэмцээнээс дөрвөн алт, таван мөнгө, найман хүрэл, өсвөр үеийнхний ДАШТ-ээс нэг алт, хоёр хүрэл, залуучуудын ДАШТ-ээс нэг хүрэл медаль хүртсэн байна. Насанд хүрэгчдийн Азийн аваргаас нэг хүрэл, залуучуудын Азийн АШТ-ээс таван алт, дөрвөн мөнгө, дөрвөн хүрэл медаль хүртсэн бол “Их дуулга”-аас зургаан алт, хоёр мөнгө, 11 хүрэл, “Гран при” тэмцээнээс гурван алт, гурван мөнгө, зургаан хүрэл медаль авсан байна.

   Дэлхийн цомоос гурван алт, гурван мөнгө, хоёр хүрэл медаль хүртсэн бөгөөд эрх олгох болон олон улсын бусад тэмцээн уралдаанаас 12 алт, 13 мөнгө, 20 хүрэл медаль хүртлээ. Үндэсний шигшээ багийн энэ оны ууган амжилтыг 2025 оны нэгдүгээр сарын 6-8-ны өдрүүдэд  БНСУ-ын Ганвон хотод болсон цанын 15 км, 10 км гэсэн хоёр зайд Б.Ачбадрах алтан медаль хүртсэн бол отгон амжилтыг өнгөрсөн амралтын өдрүүдэд болсон жүдо бөхийн “Гран при” тэмцээний эрэгтэйчүүдийн 66 кг-ын жинд МУГТ Ё.Басхүү, +100 кг-ын жинд ОУХМ Б.Гончигсүрэн алтан медаль, МУГТ Л.Энхрийлэн мөнгө,ОУХМ  Г.Наранцэцэг, ОУХМ Б.Сүхбат, ОУХМ Л.Сосорбарам нар хүрэл медаль хүртсэн юм.