Олон улсын олимпын хорооны гишүүн, МҮОХ-ны ерөнхийлөгч Б.Баттүшиг Хорват Улсын Загреб хотноо болсон чөлөөт бөхийн насанд хүрэгчдийн дэлхийн аварга шалгаруулах тэмцээнээс медаль хүртсэн шигшээ баг тамирчдыг хүлээн авч хүндэтгэл үзүүллээ.

    Тэмцээнд Үндэсний шигшээ багийн тамирчдаас эмэгтэйчүүдийн 59 кг-ын жинд ОУХМ Т.Алтжин хүрэл, 62 кг-д Монгол Улсын гавьяат тамирчин П.Орхон хүрэл, 65 кг-д ОУХМ Т.Энхжин хүрэл медаль, эрэгтэйчүүдийн 70 кг-ын жинд Монгол Улсын гавьяат тамирчин Т.Тулга мөнгөн медаль хүртсэн билээ.  Эдгээр тамирчид болоод Монголын чөлөөт бөхийн холбооны удирдлагууд, багш дасгалжуулагчдад МҮОХ-ноос бэлэг дурсгал, мөнгөн шагналаар урамшуулав.