ОУОХ-ны гишүүн, МҮОХ-ны ерөнхийлөгч Б. Баттүшиг өнөөдөр Саудын Арабын Үндэсний олимпын хорооны дэд ерөнхийлөгч, Дэлхийн тэмээн холбооны ерөнхийлөгч, Азийн триатлоны холбооны ерөнхийлөгч ханхүү Фахад Бин Жалави Аль Сауд тэргүүтэй хүндэт зочдыг хүлээн авч уулзлаа.  Уулзалтын үеэр талууд цаашид ҮОХ-дын хамтын ажиллагааг өргөжүүлэх, үүний дотор тэмээн спортын чиглэлээр хамтран ажиллах, харилцан туршлага солилцох талаар санал солилцлоо.

    Саудын Араб нь 2026 оны арванхоёрдугаар сард “Рияд 2026” Азийн танхимын болон тулааны спортын наадмыг спортын 16 төрлөөр зохиохоор бэлтгэл ажил хангаж байгаа бөгөөд “Неом 2029” Азийн өвлийн наадмыг 2029 онд, “Рияд 2034” Азийн зуны наадмыг тус тус зохион байгуулна.

    ҮОХ-д, олон улсын спортын холбоодтой харилцаагаа өргөжүүлж, шинэ чиглэлээр хамтын ажиллагаа эхлүүлэх нь Монголын спортын хөгжилд чухал ач холбогдолтой юм. Уулзалтад МҮОХ-ны тэргүүн дэд ерөнхийлөгч Ч. Наранбаатар, Монголын тэмээн соёл уралдааны холбооны ТУЗ-ын дарга, УИХ-ын гишүүн Р. Сэддорж тус холбооны ерөнхийлөгч Б. Батбаяр нарын төлөөлөгчид оролцов.