Алдарт хөлбөмбөг тайлбарлагч Э.Балжинням агсны тайлбарыг фанатууд нь мөн ч үгүйлж байна даа. “Катар-2022” хөлбөмбөгийн дэлхийн аварга шалгаруулах тэмцээний нээлтийг түүний тайлбараар эхлүүлэхэд Монгол даяараа л омогшиж, огшиж, баярлаж, битүүхэндээ хайртай хөлбөмбөг тайлбарлагчаа хачин ихээр үгүйлж суулаа. Энэ өдрүүдэд яах аргагүй түүний сэтгэл огшоож, хийморь сэргээсэн тайлбаруудын орон зай дутаж байна. Өдийд тэрээр байсан бол

Эрээн асрын өмнө зодог өмсөн дэвсэж

Эртэй, бяртай бөхчүүдтэй мөр зэрэгцэж яваагүй ч

Үе тэнгийн нөхөдтэйгээ шороон талбайд тоглож

Өвдөг, тохой хоёроо шалбалж явсан удаатай

Би хөл бөмбөгийн фанат аа...гээд л онгирч суух байсан биз. Ёстой чиг хэн хүнээс илүү гэгэлзэн догдолж, баярлан хөөрч, бүр “нисэж” явсан үе нь яах аргагүй хөлбөмбөгийн аварга шалгаруулах тэмцээн байдаг байх. Телевизийн буйдхан өрөөнд дэлхийн хөлбөмбөгийн одуудын нэрийг өөрийн хүүхдийн нэр шигээ дуудаж, хөөрч, дэвэрсэн өдрүүд нь яг өдийд дөө гэж бодоход фанатууд нь хоосорч суугаа нь аргагүй. Түүнээс үг сонсож, тайлбарыг нь үлгэрлэн суралцдаг байсан залуу хөлбөмбөг тайлбарлагчид ч цаанаа нэг хөнгөн гунигтай Балжаа ахыгаа дурсаж сууна.

-ХӨЛБӨМБӨГТ ДУРЛАСАН НЬ-

    Үнэхээр ч дурсахгүй байхын аргагүй билээ. Монголчуудыг хөлбөмбөгтэй ойртуулж,  гайхалтай оносон зүйрлэл тайлбаруудаараа энэ спортод дурлуулсан хүн бол тэр. Энэ удаагийн хөлбөмбөгийн дэлхийн аварга шалгаруулах тэмцээнийг туршлагатай, чадвартай, авьяастай тайлбарлагчид сайхан л хүргэж байна. Гэхдээ “Сүрэг адуун дундаас сүргийн манлай нь би гэсэн шиг сугараад л гараад ирж байгаа тэр  Торрэсийг хараач ээ...”, Маню Барса хоёрын тоглолт дээр  “За энэ хоёр баг айдасийн даваа уруудаад зуузай холбон давхиж байгаа хоёр баг байгаа юм даа",

"Пүүзнээс нь газрын үнэр

Подвалкнаас нь тэнгэрийн үнэр

     Түүний охин нь “ Аавын хамгийн Аавын хамгийн үнэнч, хамгийн сайн дэмжигч нь миний эмээ байлаа. Хөл бөмбөг сонирхдоггүй хэрнээ хүүгийнхээ тайлбарыг сонсохын тулд, хоолойг нь чихээрээ мэдрэхийн тулд зурагтаа асаачихаад буйдан дээрээ хэвтэж байдаг. Мөн ч олон шөнө нойргүй хоносон. Ямар сайндаа нэг шөнө аав доод лигийн тоглолт тайлбарлаж байхдаа “Энэ хоёр багийг би ч мэдэхгүй юм байна. Ямар ч хоёр сураггүй баг тоглоод байгаа юм. Энэ тоглолтыг Монголд ганцхан л хүн үзэж байгаа байх. Тэр нь миний ээж” гээд ярьсан гэсэн. Тэрийг нь эмээ үнэхээр л сонсоод хэвтэж байсан байхгүй юу” гэж ярьсан байдаг. Үнэхээр чиг гэр бүлийнхэн нь түүний үнэнч дэмжигч, үзэгч байсан. Анх тэрбээр хөлбөмбөгт дурлаж эхэлсэн үеийн түүх нь мөн их сонин. Тэрээр Сант сумын сургуулийн зургадугаар ангийн сурагч байхдаа олон улсын хүүхдийн “Найрамдал” зусланд амрах хүүхдүүдээс ганцаараа халзан толгойтой байжээ. Тэгээд ичээд өрөөнөөсөө гарахгүй байхдаа Испанид болж байсан хөлбөмбөгийн ДАШТ-ий тоглолтууд телевизээр гарч таараад анх хөлбөмбөгт дурласан гэдэг. Ингэж л хүссэн зорьсон, өөрийг нь соронз шиг татаж явсан зүйлийнхээ ирмэг зүрх нь болж явсаар тэр буцсан. Түүнийг дурсаж, санагалзсан тамирчид, хөлбөмбөгийн фанат, “Балжинням ч нээрээ хачин сайхан тайлбарладаг шүү” гэж түүний тайлбарыг үзэх дуртай ард түмэн өнөөдөр түүгээр дутаж, хөлбөмбөгийн тайлбарыг давсгүй хоол мэт амтгүйхэн үзэж сууна. Цөм л хэрэв Балжаа тайлбарлагч байсан бол одоо ингэж л хэлэх байсан даа гээд алдарт ишлэлүүдийг нь ам уралдан ярьж, зарим нь дуурайн хэлэх гэж оролдож байгаа нь лавтай. Бүр зарим нь хөлбөмбөг үзэхгүй ч суугаа байж мэдэх юм. Гэлээ гээд яах билээ. Тэр байхгүй, буцсан. Хөлбөмбөгийн тайлбарлагч гэх гайхам авьяасаа дэлгэцийн хальсанд үлдээгээд буцсан.

-СЭЛЭНГИЙН БОР ХҮҮ –

Сэлэнгийн хөвөөнд эмээтэйгээ өссөн

Сэлэхийг нь биш орилохыг нь сурсан

Балжинням тайлбарлалаа үзэгчид ээ..гэж өөрийгөө зарлаад тоглолтоо дуусгадаг байсныг нь монголчууд бараг цээжээр мэднэ байх. Ёстой л Сэлэнгэ нуурын хөвөөнд эмээ дээрээ өссөн сахилгагүй бор хүү санамсаргүй хоёр тохиолдлоор хөлбөмбөг үзэж, үүрд дурлаж, дараа нь түүнийхээ тайлбарлагч болж, хүсэл мөрөөдлөөрөө жигүүрлэж амьдарсан. Орос хэлний багшаар төгсөж, сургуульд багшилдгаас бусдаар хөлбөмбөгт хамаг бүхнээ өгч, хөлбөмбөгийн төлөө л төрсөн гэмээр байсныг нь охин нь мөн ярьсан байдаг. Тэрбээр “Аавыгаа анхны тайлбараа хийх гээд ТВ9 телевизийн байр руу 25 жил цуглуулсан тоглогчдын тухай сонины хайчилбараа шар торонд хийгээд гэрээсээ гарч байсныг мартдаггүй юм. Тэрнээс хойш л хөл бөмбөгийн жинхэнэ тайлбарлагч болох замнал нь эхэлсэн дээ. Анхны тайлбараа хийж байхдаа “Би үнэхээр чадах юм байна. Энэ л миний амьдрал юм байна” гэдгийг мэдэрсэн, хамгийн жаргалтай байсан гэсэн дээ, миний аав.  Аав минь хөл бөмбөгийн төлөө бүхий л амьдралаа зориулсан, харамсах зүйлгүйгээр, чин үнэнчээр энэ спортын төлөө амьдарсан хүн. Аавд хөл бөмбөггүй өдөр гэж байгаагүй” гэж ярьсан байдаг. Ийм л хөлбөмбөг гэх спортын төлөө хүсэл мөрөөдөл, өөрт байгаа бүхнээ өгсөн Монголын алдарт хөлбөмбөг тайлбарлагч, Сэлэнгийн хөвөөн өссөн бор хүүг өнөөдөр монголчууд үгүйлж сууна. Тэр ч магад өнөөдрийг, хөлбөмбөгийн дэлхийн аварга шалгаруулах тэмцээнээ үгүйлэн суугаа болов уу.