Монгол Улсаас төрсөн гурав дахь, Сэлэнгэ аймгаас төрсөн анхны эмэгтэйчүүдийн Олон улсын шатрын их мастер цолтон тэрбээр ёстой л нэг хожлын нүүдэл шиг сонголт хийлээ дээ. Олон улсын шатрын их мастер А.Энхтуул ийм л бүсгүй юм. Тамирчин хүний мөн чанар энд л тодордог болов уу. Тэр эх орноосоо хэзээ ч хувирашгүй мөн чанараа энэ удаагийн сонголтоороо тод харуулж, үүрд эх орныхоо оюунлаг охин нь байхаар тангараг өргөлөө. Тиймээс түүнд бид баярлалаа гэж хэлэх нь зүйтэй.

-НҮҮДЭЛ БҮРТЭЭ ХОЖЛООР ЖИГҮҮРЛЭСЭН ОН ЖИЛҮҮД-

     А.Энхтуул есөн настайгаасаа шатар нүүж эхэлсэн байдаг. Тэгээд 13 насандаа Монгол Улсын шатрын дэд аварга болсон. Үргэлжлүүлэн шатрын дээд амжилтыг тогтоож, 2008 онд Дэлхийн шатрын холбооны эмэгтэйчүүдийн олон улсын мастер цолны хоёр нормыг биелүүлсэн амжилтын түүх бий. Ингэж тэр өсвөр наснаасаа нүүдэл бүртээ хожно гэж итгэж, хожихын төлөө хичээсээр өдгөө манай улсын шатрын спортын тэргүүн эгнээний байлдагч болсон. Түүний шатар дурлаж, өөрийгөө сайжруулж, бэлтгэл сургуулилтаа хийж, тэмцээн, уралдаанд оролцож байсан он жилүүд бол нүүдлээс нүүдлийн хооронд өнгөрсөн. Үргэлж оюун бодолдоо нүүж, хэрхэн өрсөлдөгчөө ялах тухай бодол эргэлдэж байсан нь лавтай. Ийм халуун хүслээр өдгөө 19 жил нүүсэн тэрбээр одоо бол  тулхтай, нухацтай, чамбай тоглогч болсон.

Бодол ухаан нь улам тэлж, илүү уужуу тоглогч болж тогтсон.

-ДАХИАД Л АЛТ-

   Хамгийн сүүлд гэхэд тэрбээр Насанд хүрэгчдийн улсын аварга шалгаруулах эмэгтэйчүүдийн 52 дахь удаагийн шигшээ тэмцээнээс алтан медаль хүртсэнээр амжиотаа ахиулсан. Тэр улам л асаж, дүрэлзэж, шатрын спортын гүн рүү “шумбаж” байгаа тамирчин. Тэр “Шатрын хөлөг бидний амьдрал оршиж байгаа мэт санагддаг.Шатар бол дуусашгүй, хязгаар нь үл үзэгдэх шинжлэх ухаан. Их сэтгэл хөдөлгөм байдаг” гэж ярьсан байдаг. Хийж байгаа хүн л тэр зүйлийнхээ сайхныг мэдэрдэг шиг шатрын сэтгэл хөдөлгөм, өрсөлдөөнт, шар хорыг буцалгадаг үйл явц түүнд бр суужээ. Одоо бараг орсон тэмцээн бүртээ хожил авч, тэргүүлдэггүй юм гэхэд заавал ямар нэгэн амжилтыг бол зоолттой үзүүлж байна.

Шатрыг амьдрал гэж харж, шатрын амьдралд өгсөж, уруудаж, зовлон, жаргалыг нь тэнцүү мэдэрч суугаа тэр. 

-ШАТРЫН БАГШ-

    Түүнийг бид мэднэ. Илүү олон амжилт гаргахыг нь мэднэ. Гэхдээ шатрын ямар багш вэ гэдгийг нь төдийлөн мэдэхгүй. Ганцхан өөрийгөө л харуулаад, өөрийгөө л бэлдээд байвал утгагүй. Хүмүүс улиг болсон зүйлд дургүй. Үндсэндээ “Олон улсын хэмжээний шатрын их мастер А.Энхтуул медаль авлаа, амжилт тогтоолоо” гэх нь бидэнд хэвийн зүйл шиг болсон. Харин тэр өөрийгөө хувааж, илүү олон болгож өсгөж  байгаа нэг зүйл нь багш. Олон ч шавь нартай болсон. Тэрбээр “Би шавь нартаа гэхээс илүү юун түрүүнд эцэг, эхчүүдэд нь хүүхдийнхээ зорилгыг зөв тодорхойлохыг зөвлөдөг. Тууштай хичээлэх үү,эсвэл  дундаас нь орхих уу гэж. Харин шавь нартаа хожих нь чухал биш, хамгийн гол нь сайн өрөг гаргах нь чухал гэж хэлдэг” гэж ярьсан байдаг. Энэ л түүний багшлах онцлог болов уу.

Ирээдүйд оюуны спортод амжилт гаргах хүүхдүүдийг тэр ийн бэлдэж байна.

            Балчир наснаасаа шатрын спортод дурлаж, нэгэн насаа энэ л спортод зориулахаар зорьж яваа түүний амжилт гавьяа их. Цаашид ч олон амжилтыг гаргах байх. Өөрийнх хэлсэн шиг шатрын хөлөг дээр өрнөх амьдралд тэр дандаа хожиж, сонирхолтой содон өрөлтөөр дүүрэн байхыг хүсмээр байна. Хар цагаан шатрын хөлөг дээр шаливхан биетэй энэ бүсгүйн оюун ухаан, сэтгэл зүрх, санаашрал цөм бий.